57 ரூபாய் திருடியதாக குற்றச்சாட்டு: 348 முறை நீதிமன்ற விசாரணைக்குச் சென்ற இந்திய தபால்காரர்

இந்திய நீதிமன்றங்களில் நடைபெற்றுக் கொண்டிருக்கும் பல வழக்குகள் வருடக்கணக்காக இழுத்தடிக்கப்படுகின்றன என்ற குற்றச்சாட்டு தொடர்ந்து உள்ளது. அதிகாரபூர்வ கணக்குகளின்படி 30 மில்லியனுக்கும் மேற்பட்ட வழக்குகள் இன்னும் நிலுவையில் உள்ளதாகத் தெரிவிக்கப்பட்டுள்ளது. இவற்றில் சில 1950 ஆம் ஆண்டிலிருந்தும் வழக்கு நடைபெற்று வருவதாகத் தகவல்கள் தெரிவிக்கின்றன.

உமாகாந்த் மிஸ்ரா என்பவர் கடந்த 1984 ஆம் ஆண்டில் தனது 30 ஆவது வயதில் தபால்துறையில் வேலை செய்துகொண்டிருந்தார். உத்தரப் பிரதேச மாநிலத்தில் உள்ள கான்பூர் நகரத்தின் ஹர்ஜிந்தர் நகர்ப் பகுதியில் உள்ள தபால்நிலையம் ஒன்றில் அவர் தபால்காரராகப் பணியாற்றி வந்தார். அந்த ஆண்டு ஜூலை மாதம் 23 ஆம் தேதி அங்கு வந்திருந்த மணியார்டர் தொகையினை உரியவர்களுக்கு அளிப்பதற்காக மிஸ்ராவிடம் 697 ரூபாய், 60 பைசா அளிக்கப்பட்டது. அதில் 300 ரூபாயை உரியவர்களிடம் சேர்ப்பித்த அவர் மீதித் தொகையை மறுநாள் அளிப்பதற்காகத் தன்னுடைய மேலதிகாரியிடம் கொடுத்துள்ளார். மீதித் தொகையை அவர் சரிபார்க்கும்போது அதில் 57 ரூபாய், 60 பைசா குறைந்துள்ளது.

பணத்தைக் கையாடல் செய்ததாக மிஸ்ரா மீது காவல்துறையில் புகார் அளிக்கப்பட்டு அவர் பணியிலிருந்தும் நீக்கப்பட்டுள்ளார். அதன்பின் இந்த வழக்கு விசாரணைக்காக 348 முறை நீதிமன்றத்திற்கு சென்றுள்ளதாகக் கூறிய மிஸ்ரா வழக்கு செலவிற்காக தன்னுடைய வீடு, நிலம் அனைத்தையும் விற்றதாகத் தெரிவித்துள்ளார். சிறு, சிறு வேலைகள் செய்து குடும்பத்திற்கு பணஉதவி அளித்தபோதும் தன்னுடைய சுற்றத்தினரே தான் இருப்பதற்கு வீடும், உணவும் அளித்து தங்களைக் காப்பாற்றியதாக மிஸ்ரா குறிப்பிட்டார்.

கிட்டத்தட்ட முப்பது வருடங்களாக நடந்த இந்த வழக்கில் சாட்சியங்கள் இல்லை என்று சென்ற வாரம்தான் மிஸ்ரா வழக்கிலிருந்து விடுவிக்கப்பட்டுள்ளார். இந்த வழக்கிற்காக சில காலம் சிறைத்தண்டனையையும் அனுபவித்ததாகக் கூறும் அவர் தான் குற்றவாளி இல்லை என்பதை நிரூபிப்பதற்காகவே இத்தனை காலம் காத்திருந்ததாகவும் கூறினார். இனிமேல் இதற்கான நஷ்டஈடு மற்றும் பணிநிமித்தம் எனக்குக் கிடைத்திருக்க வேண்டிய அனைத்துத் தொகைக்காவும் தான் முயற்சி செய்யப்போவதாக அவர் கூறுகின்றார்.
malaimalar

57 ரூபாய் அதிக பணம் தான். இதே அவர் 2000 கோடி, 1லட்சம் கோடி, என்றால் சும்மா விட்டு இருப்பார்கள்..