ஜெயலலிதா மன்னிப்பு கேட்க வேண்டும்: காஞ்சி மடத்தில் சுப்பிரமணிய சுவாமி பேட்டி

காஞ்சி சங்கர மடத்தின் சங்கராச்சாரியார் ஜயந்திர சரஸ்வதி சுவாமி மீது பொய் வழக்கு தொடர்ந்த தமிழக முதல்வர் ஜெயலலிதா மன்னிப்பு கேட்க வேண்டும் என்று ஜனதா கட்சியை பா.ஜ.க.வில் அண்மையில் இணைத்துக் கொண்ட சுப்பிரணிய சுவாமி தெரிவித்தார்.

காஞ்சிபுரம் வரதராஜ பெருமாள் கோயில் மேலாளர் சங்கரராமன் கொலை வழக்கில் இருந்து விடுவிக்கப்பட்ட காஞ்சி சங்கர மட பீடாதிபதி ஜயந்திர சரஸ்வதி சுவாமிகள் புதுச்சேரியில் இருந்து திருச்செந்தூர் செந்தில் ஆண்டவரை தரிசனம் செய்ய சென்றார். அங்கு சிறப்பு தரிசனம் மேற்கொண்ட ஜயந்திர சரஸ்வதி சுவாமிகள் சனிக்கிழமை இன்று காலை 9 மணிக்கு சங்கரமடம் திரும்பினார்.

சங்கரமடம் அருகே உள்ள சர்வதீர்த்தக் குள பகுதியில் அவருக்கு சிறப்பான வரவேற்பு அளிக்கப்பட்டது. அங்கிருந்து காரிலேயே அவரை ஊர்வலமாக அழைத்துச் சென்றனர். ஏகாம்பரநாதர் கோயில் வழியாக அவரை சங்கர மடத்துக்கு பக்தர்கள் அழைத்து வந்தனர். சங்கர மட வாசலில் ஜயந்திர சரஸ்வதி சுவாமிக்கு பூரண கும்ப மரியாதை அளிக்கப்பட்டது. அப்போது ஜனதா கட்சியை பா.ஜ.க.வில் அண்மையில் இணைத்துக் கொண்ட சுப்பிரணிய சுவாமி உள்ளிட்டோர் ஜயந்திர சரஸ்வதி சுவாமியை வரவேற்றனர்.

அப்போது சுப்பிரமணிய சுவாமி செய்தியாளர்களிடம் கூறியது:

கடந்த 8 ஆண்டுகளுக்கு முன்பு ஜயந்திரர் சரஸ்வதி சுவாமி மீது தமிழக அரசு வழக்கு தொடர்ந்தபோதே, இந்த வழக்கு தள்ளுபடியாகும் என்று நான் கூறியிருந்தேன். சிலரை திருப்திப்படுத்தவே ஜயந்திர சரஸ்வதி சுவாமி மீது வழக்கு தொடரப்பட்டது. இந்த வழக்கில் இருந்து சங்கராச்சாரியார்கள் விடுவிக்கப்பட்டது, இந்து மதத்துக்கு கிடைத்த வெற்றி. தமிழக முதல்வர் ஜெயலலிதா, தனது தவறை உணர்ந்து, சங்கர மடத்துக்கு நேரில் வந்து சங்கராச்சாரியார்களிடம் மன்னிப்பு கேட்க வேண்டும். உண்மைக் குற்றவாளிகளை கண்டுபிடிப்பது அரசின் கடமை. தமிழக அரசால் முடியவில்லை என்றால், அந்த வழக்கை சி.பி.சி.ஐ.டி. விசாரணைக்கு மாற்றலாம் என்றார் அவர்.

தினமணி