கூடங்குளம் அருகே குண்டுவெடிப்பு: சிறுமிகள் உட்பட 6 பேர் பரிதாப பலி

திருநெல்வேலி: கூடங்குளம் அருகே வெடிகுண்டுகள் வெடித்ததில், இரண்டு சிறுமிகள் உட்பட ஆறு பேர் பலியாயினர். பலர் காயமுற்றனர்.

திருநெல்வேலி மாவட்டம் கூடங்குளத்தை அடுத்துள்ள கடற்கரை கிராமம் இடிந்தகரை. கூடங்குளம் அணுஉலைக்கு எதிரான போராட்டக்காரர்கள், இங்கு தொடர் போராட்டத்தில் ஈடுபட்டுவருகின்றனர். இடிந்தகரையை ஒட்டியுள்ள கடற்கரை கிராமம் கூத்தங்குழி. இந்த கிராமத்தை சேர்ந்தவர்கள், தாதுமணல் ஆலைகளில் பணிபுரிகிறார்கள். ஆலையில் பணிபுரிபவர்கள் ஒரு தரப்பாகவும், ஆலைக்கு எதிர்ப்பு தெரிவிப்பவர்கள் இன்னொரு தரப்பாகவும் அடிக்கடி மோதலில் ஈடுபட்டுவந்தனர். இதில் நாட்டு வெடிகுண்டுகள் சர்வசாதாரணமாக வீசப்படும். தாதுமணல் ஆலை எதிர்ப்பாளர்கள் மீது கூடங்குளம் போலீசார் அடிக்கடி வழக்குகள் போட்டனர். இதனால் கூத்தங்குழியை சேர்ந்தவர்கள் பாதுகாப்பு கருதி, இடிந்தகரையை ஒட்டியுள்ள சுனாமி காலனி வீடுகளில் தஞ்சம் புகுந்தனர்.

மீனவர்கள் கடலில் மீன்பிடிப்பதற்கும், இருதரப்பு மோதலின் போது வெடிகுண்டுகளை பயன்படுத்துகிறார்கள். சுனாமி காலனியில் தங்கியுள்ள கூத்தங்குழியை சேர்ந்தவர்கள் பூட்டிய வீடுகளில் பதுக்கி வைத்திருந்த வெடிகுண்டுகள் நேற்று மாலை 6.30 மணிக்கு பயங்கர சத்தத்துடன் வெடித்தன. இதில் இரண்டு வீடுகள் தரைமட்டமாகின. வீட்டில் இருந்த ஒன்றரை வயது சிறுமி, 10 வயது சிறுமி, ஒரு பெரியவர் மற்றும் ஒரு பெண் உள்ளிட்ட நான்கு பேர் சம்பவ இடத்தில் பலியாயினர். ஆஸ்பத்திரிக்கு கொண்டு செல்லும் வழியில் இருவர் உயிரிழந்தனர். எட்டுக்கும் மேற்பட்டோர் காயமுற்றனர். சம்பவம் மாலை நேரத்தில் நடந்ததால், மின்இணைப்புகள் துண்டிக்கப்பட்டு இருட்டாக இருந்தது. இறந்தவர்கள் மற்றும் காயமுற்றவர்களின் எண்ணிக்கை முழுமையாக தெரியவில்லை. மற்ற வீடுகளிலும் நாட்டுவெடிகுண்டுகள் வெடிக்கலாம் என்ற பீதியில் வீடுகளை காலிசெய்து மக்கள் இடிந்தகரை கிராமத்திற்குசென்றனர்.

போலீஸ் செல்லவில்லை:

கூடங்குளம் அணுஉலைக்கு எதிரான போராட்டம் துவங்கிய கடந்த ஒன்றரை ஆண்டு காலமாக,போராட்டக்காரர்கள் முகாமிட்டுள்ள இடிந்தகரை, சுனாமிகாலனி ஆகிய பகுதிகளுக்கு போலீசார் செல்வதில்லை. இதனால் இடிந்தகரை, சுனாமி காலனியில் நடக்கும் சமூக விரோத செயல்களையும், வெடிகுண்டு பதுக்கல் உள்ளிட்டவற்றை போலீசார் கண்டுகொள்ளவில்லை. போராட்டகாரர்களுக்கு எதிராக வெறுமனே வழக்கு தொடர்வதை மட்டுமே பணியாக கொண்டிருந்தனர். வெடிகுண்டு சம்பவம் மாலை 6.30 மணிக்கு நடந்துள்ளது. ஆனால் சம்பவ இடத்திற்கு விஜயேந்திர பிதரி எஸ்.பி., உள்ளிட்ட அதிகாரிகள் இரவு 9 மணிக்கு பிறகே சென்றனர். தீயணைப்பு படையினரும், இடிந்தகரையை சேர்ந்த இளைஞர்களும்தான் மீட்புபணிகளை மேற்கொண்டனர். வெடிகுண்டு தயாரித்த போதுதான் விபத்து நடந்துள்ளது.

இறந்தவர்கள் விபரம்:

விபத்து நடந்த வீட்டில் எத்தனை பேர் இருந்தார்கள் என, தெரியவில்லை. குண்டு வெடித்த வீட்டிற்கு எதிர்வீட்டில் வசித்த சத்யம், ரோஸ் தம்பதிகளின் ஏழரை வயது மகள் சுபிதா, ஒரு வயது மகன் செபஸ்டன், பக்கத்துவீட்டில் வசித்த பிரமிளா, வியாகப்பன், 37, ஆகியோர் பெயர்கள் தெரிந்துள்ளன. தரைமட்டமான வீட்டில் இறந்தவர்கள் குறித்து தகவல் இல்லை.

தினமலர்

கூடங்குளத்துக்கு எப்பவுமே ராசி இல்லை போல. பாவம் அந்த உயிர் நீத்த ஜீவன்கள்.