காங்கிரஸ் கூட்டத்தில் கிண்டல்–ரகளை: மலையாள காமெடி நடிகருக்கு அடி–உதை

திருவனந்தபுரம் அருகே உள்ள ஆலப்புழாவை அடுத்த அரிபரம்பு என்ற இடத்தில் இளைஞர் காங்கிரஸ் சார்பில், மத்திய காங்கிரஸ் அரசின் சாதனை விளக்க கூட்டம் நடந்தது. கூட்டத்தில், ஏராளமான கட்சி பிரமுகர்கள் கலந்து கொண்டு அரசின் சாதனைகளை விளக்கி பேசிக் கொண்டிருந்தனர்.

அப்போது பிரபல மலையாள சிரிப்பு நடிகர் அனூப் சந்திரன் அங்கு வந்தார். அவர் அடிக்கடி சத்தம் போட்டு சிரித்து கிண்டல் செய்ததாக கூறப்படுகிறது. இது இளைஞர் காங்கிரசாருக்கு ஆத்திரத்தை ஏற்படுத்தியது. அவர்கள் பலமுறை எச்சரித்தும் அனூப் சந்திரன் கண்டுகொள்ளவில்லை.

இந்த நிலையில் பொறுமை இழந்த சில இளைஞர் காங்கிரஸ் தொண்டர்கள் நடிகர் அனூப் சந்திரனுடன் தகராறில் ஈடுபட்டனர். வாய்த்தகராறு முற்றியதில் அனூப்சந்திரனை தொண்டர்கள் சரமாரியாக அடித்து உதைத்தனர். இதனால் கூட்டத்தில் பெரும் பரபரப்பு ஏற்பட்டது.

அதன் பிறகு அனூப் சந்திரனை தொண்டர்கள் பிடித்துச்சென்று பாதுகாப்பு பணியில் ஈடுபட்டிருந்த போலீசாரிடம் ஒப்படைத்தனர். கூட்டத்தில் ரகளை செய்ததாக கூறி அனூப் சந்திரனை போலீசார் கைது செய்தனர்.

இதுபற்றி நடிகர் அனூப் சந்திரன் கூறும்போது, ‘எனது வீட்டு அருகே காங்கிரஸ் கட்சி கூட்டம் நடந்து கொண்டு இருந்தது. அவர்கள் என்ன பேசுகிறார்கள் என்பதை நான் கேட்டுக் கொண்டு இருந்தேன்.

மத்திய அரசின் கிராமப்புற வேலை வாய்ப்பு திட்டம் தான் உலகிலேயே மிகச் சிறந்த திட்டம் என்று சிலர் கூட்டத்தில் பேசினார்கள். இதை கேட்டதும் எனக்கு சிரிப்பு வந்து விட்டது. அடக்க முடியாமல் சிரித்து விட்டேன். இதனால் ஆத்திரமடைந்த காங்கிரசார் கூட்டத்திற்கு இடையூறு செய்ததாக என் மீது புகார் செய்து கைது செய்ய வைத்து விட்டனர்’ என்றார்.

காங்கிரஸ் தரப்பில் நிர்வாகிகள் சிலர் கூறும் போது, ‘நடிகர் அனூப் சந்திரன் மது போதையில் எங்கள் கூட்டத்திற்கு வந்து இடையூறு செய்தார். அதனால் தான் அவரை போலீசில் பிடித்துக் கொடுத்தோம்’ என்றனர். நடிகர் அனூப் சந்திரன் கைது செய்யப்பட்டது கேரளாவில் பரபரப்பை ஏற்படுத்தி உள்ளது.
malaimalar

மத்திய அரசின் கிராமப்புற வேலை வாய்ப்பு திட்டம்
தான் உலகிலேயே மிகச் சிறந்த திட்டம் ...
-
இந்த பேச்சை கேட்டுவிட்டு வீட்டுக்குள் ஓடிப்போய்
சிரித்திருந்திருந்தால் அடி உதையிலிருந்து தப்பி\
இருக்கலாம்...!!