சபரிமலையில் அய்யப்பனை தரிசனம் செய்ய 6 மணி நேரம் காத்திருக்கும் பக்தர்கள்

by **ராஜா** Sun Nov 24, 2013 2:57 pm

சபரிமலையில் மண்டல பூஜைக்காக கடந்த 15–ந்தேதி நடை திறக்கப்பட்டது. அன்று முதல் அய்யப்பனுக்கு நெய் அபிஷேகம் உள்பட பல்வேறு வழிபாடுகள் நடந்து வருகிறது.

முதல் நாளில் இருந்தே சபரிமலையில் பக்தர்கள் கூட்டம் அலைமோதியது. இதை தொடர்ந்து பக்தர்களுக்கு பல்வேறு கட்டுப்பாடுகள் விதிக்கப்பட்டுள்ளது. சபரிமலையில் பல இடங்களில் கயிறுகள் கட்டப்பட்டு பக்தர்கள் தடுத்து நிறுத்தப்படுகிறார்கள்.

அதன் பிறகு அவர்கள் குழுக்களாக பிரிக்கப்பட்டு மலை ஏறிச்சென்று அய்யப்பனை தரிசிக்க அனுப்பி வைக்கப்படுகிறார்கள். பக்தர்கள் கூட்டம் அதிகரித்துக் கொண்டே இருப்பதால் சுவாமி அய்யப்பனை தரிசனம் செய்ய 6 மணி நேரம் வரை நீண்ட வரிசையில் பக்தர்கள் காத்திருக்க வேண்டி உள்ளது.

மேலும் சபரிமலையில் கனமழை பெய்து வருவதால் பக்தர்கள் புனித நீராடும் பம்பை ஆற்றில் வெள்ளம் அதிகளவில் செல்கிறது. எனவே அங்கு பாதுகாப்புக்கு தேவையான ஏற்பாடுகள் செய்யப்பட்டுள்ளது.

பம்பையிலிருந்து சன்னிதானம் செல்லும் நீலிமலை பகுதியில் உள்ள சுவாமி அய்யப்பன் சாலையில் நேற்று பக்தர்கள் சரண கோஷம் முழங்க சென்று கொண்டிருந்தனர். அப்போது ஒரு புலி உறுமியபடி அந்த சாலையை கடந்து சென்றது.

இதனால் பீதி அடைந்த பக்தர்கள் இதுபற்றி தேவசம் போர்டுக்கும் வனத்துறைக்கும் தகவல் தெரிவித்தனர். அவர்கள் அங்குச் சென்று பார்வையிட்டனர்.

இந்த ஆண்டு சபரிமலைக்கு செல்லும் கன்னி சாமிகள் கூட்டம் அதிகளவில் காணப்படுகிறது. மேலும் ஏராளமான பக்தர்கள் தங்கள் குழந்தைகளுடன் சபரிமலைக்கு இந்த ஆண்டு வருகை தருகிறார்கள்.

அவர்கள் பாதுகாப்புக்காக போலீசார் புதிய ஏற்பாடு செய்துள்ளனர். அதன்படி, விசேஷ அடையாள அட்டை தயாரிக்கப்பட்டுள்ளது. அதில் அந்த குழந்தைகளின் பெயர், பெற்றோர் பெயர், முகவரி மற்றும் தொலைபேசி எண் குறிப்பிடப்பட்டுள்ளது. அந்த அட்டை அணிவிக்கப்பட்ட பிறகுதான் குழந்தைகள் மலையோர அனுமதிக்கப்படுகிறார்கள்.