பாலாறு

முன்பு "சரஸ்வதி - ஒரு நதியின் மறைவு' பற்றி எழுதி இருந்தேன். சரஸ்வதி மட்டுமல்ல, உலகின் பல்வேறு நதிகள் தங்களது போக்கை மாற்றிக் கொண்டிருக்கின்றன. காணாமல்போன நதிகள், அழிந்துபோன நகரங்கள் என்று பட்டியலிடத் தொடங்கினால், கணக்கு வழக்கே இருக்காது. தமிழகத்திலும் அதுபோல பல மாற்றங்கள் நிகழ்ந்திருக்கின்றன என்பதை வெளிப்படுத்துகிறது மா. இராசமாணிக்கனாரின் "பத்துப்பாட்டு ஆராய்ச்சி'.

தென்னிந்திய வரலாற்றிலும், கல்வெட்டுகளிலும் பயிற்சி பெற்றிருந்த மா. இராசமாணிக்கனாரை "பத்துப்பாட்டு' பற்றிய விரிவான ஆராய்ச்சி நூலை எழுதப் பணித்தவர் சென்னைப் பல்கலைக்கழகத் தமிழ் ஆராய்ச்சித்துறை தலைவராக இருந்த பேராசிரியர் ரா.பி. சேதுப்பிள்ளை. அதன்படி, நான்கு ஆண்டுகள் ஆராய்ச்சி செய்து மா. இராசமாணிக்கனார் அரிய பல செய்திகளைக் கண்டுபிடித்துத் தமிழ்கூறு நல்லுலகத்திற்குத் தந்திருக்கிறார்.

மா. இராசமாணிக்கனாரின் ஆராய்ச்சி என்பது ஏட்டளவு ஆராய்ச்சி அல்ல. சங்ககால மதுரை, சங்ககாலக் கச்சி மாநகர், எயிற்பட்டினம், மாவிலங்கை, ஓய்மா நாடு, இடைக்கழி நாடு, நன்னனது மலைநாடு போன்றவற்றை நேரில் கண்டு ஆய்ந்து தொகுத்த நூல் "பத்துப்பாட்டு ஆராய்ச்சி'!

சரஸ்வதி நதி போலவே, நமது பாலாறும் திசைமாறிப் பாய்ந்து வருவதைக் கண்டு பிடிக்கிறார் மா. இராசமாணிக்கனார். மைசூர் நாட்டில் கோலார் மாவட்டத்தில் தோன்றும் பாலாறு, கோலார், முல்பாகல், சீனிவாசபுரம், பெüரிங்பேட்டை ஆகியவை வழியாகத் தென்கிழக்கில் பாய்ந்து, வாணியம்பாடி பள்ளத்தாக்கை அடைகிறது. சவ்வாது மலைகளின் குறுக்கீட்டால் சிறிது வடக்கில் சென்று, பின்பு கிழக்கு நோக்கிப் பாய்கிறது. காவேரிப்பாக்கத்துக்கு அப்பால் காஞ்சிபுரம் வட்டத்துள் நுழைந்து காஞ்சிக்குத் தென்கிழக்கில் சென்று செங்கல்பட்டுக்கு அப்பால் சதுரப்பட்டினத்திற்கு மூன்று கல் தொலைவில் கடலில் கலக்கிறது.

காவேரிப்பாக்கத்திற்கு அருகில் கொண்டாபுரம் என்னும் சிற்றூரில் உள்ள கோயில் கல்வெட்டின்படி அக்கோயில் பாலாற்றுக்குத் தெற்கில் இருந்திருக்க வேண்டும். இப்போது கோயில் பாலாற்றுக்கு வடக்கில் உள்ளது.

காஞ்சியிலிருந்து கலிங்கத்தின் மீது படையெடுத்துச் சென்ற முதலாம் குலோத்துங்கனின் (கி.பி.1070-1120) படைத்தலைவன் கருணாகரத் தொண்டைமான் காஞ்சிக்கும் கலிங்கத்துக்கும் இடையில் கடந்த முதல் ஆறு பாலாறு என்று கலிங்கத்துப்பரணி கூறுகிறது. அப்படியானால், 11, 12-ஆவது நூற்றாண்டுகளில் பாலாறு காஞ்சிக்கு வடக்கில் பாய்ந்து கொண்டிருந்ததா?

திருவேற்காடு பாலாற்றின் வடகரையில் இருந்ததாக சேக்கிழார் பெருமான் பெரியபுராணத்தில் குறிப்பிடுகிறார். திருமுல்லைவாயில் பாலாற்றின் வடகரையில் அமைந்திருந்ததாக சுந்தரமூர்த்தி நாயனார் பாடியுள்ளார்.

மேலே குறிப்பிட்ட சான்றுகள் அல்லாமல் மேலும் பல சான்றுகள் கி.பி. 12-ஆம் நூற்றாண்டு வரையில் பாலாறு, காஞ்சிக்கு வடக்கில் உள்ள திருமாற்பேறு, வடகிழக்கில் உள்ள திருப்பாச்சூர், திருவேற்காடு, திருமுல்லைவாயில் வழியாகச் சென்று எண்ணூருக்கு அருகில் கடலில் கலந்திருக்க வேண்டும் என்று தெரிவிக்கிறார் மா. இராசமாணிக்கனார்.

இதைப் போலவே, கூடல்மாநகர் எது என்பது பற்றியும் சான்றுகளுடன் விரிவாக ஆராய்ச்சி செய்து பதிவு செய்கிறார். பத்துப்பாட்டின் காலம் முதல், ஆற்றுப்படை வழிகள், ஐவகை நிலங்கள், நாடுகள், தொண்டை நாடு, ஓய்மா நாடு, சோழநாடு, பாண்டிநாடு உள்ளிட்ட நாடுகளின் ஊர்கள், சங்க காலம் பற்றிய ஆய்வு, அன்றைய அரசியல், இல்வாழ்க்கை, விளையாட்டுகள், சமயம், அழகுக் கலைகள் என்று ஒன்றுவிடாமல் "பத்துப்பாட்டை' ஆதாரமாகக்கொண்டு ஆய்வு செய்திருக்கிறார்.

தமிழ் இலக்கிய ஆய்வு மாணவர்களும், தமிழர்தம் சரித்திரத்தில் ஆர்வமுள்ளவர்களும் கட்டாயம் படிக்க வேண்டிய நூல் இது. நூலகர்களுக்கு ஒரு வேண்டுகோள்! உங்கள் நூலகத்தில் இந்தப் புத்தகம் இல்லாமல் போனால், உங்கள் நூலகம் முழுமையானதாகக் கருதப்படாது! - தினமணி - கலாரசிகன் பகுதியில் இருந்து