பாதுகாப்பு இல்லை

இன்று பெங்களுரு வில் ATM இல் பணம் எடுக்க போன பெண் தாக்கப்பட்ட செய்தி கண்டு ,மனம் வருந்தியது. எவருக்கும் எங்கும் பாதுகாப்பு இல்லையே. பணமே முக்கியம். எவ்வழியிலாவது சேர்க்க ஆசை. வீடியோ பாருங்கள்.
ரமணியன்

பெண் மீது கொலைவெறி தாக்குதல்:ஏ.டி.எம்.,களில் பாதுகாப்பு கேள்விகுறி

பெங்களூரு: பெங்கžளூரூவில் ஒரு ஏடிஎம் மையத்தில் ஒரு பெண் கொடூரமாக தாக்கப்பட்டு, அவரிடமிருந்து பணம் கொள்ளையடிக்கப்பட்டுள்ளது. இந்த கொடூரக் காட்சிகள் ஏடிஎம் காமராவில் பதிவாகி உள்ளன.

வங்கிகளில் வாடிக்கையாளர்களின் நெரிசலை தவிர்க்கவும், உடனடியாக பணம் பெறவும் ஏ.டி.எம்.,கள் அறிமுகப்படுத்தப்பட்டன. தற்போது அனைத்து வங்கிகளும், நாடு முழுவதும் ஏராளமான அளவில், மக்கள் அதிகமாக கூடும் இடங்களில் ஏ.டி.எம்.,கள் அமைக்கப்பட்டுள்ளன. இந்த ஏ.டி.எம்.,களில் கண்காணிப்பு கேமராக்கள் பொருத்தப்பட்டுள்ளன. செக்யூரிட்டி ஒருவரும் பணி அமர்த்தப்படுகிறார்.

அரிவாள் வெட்டு:

இந்நிலையில், பல்வேறு குறைபாடுகளால் ஏ.டி.எம்.,களில் கொள்ளை, பணம் பறிப்பு சம்பவங்கள் அரங்கேறி வருகின்றன. இதில் உச்சகட்டமாக, பெங்களூரு, உல்சூர் கேட் போலீஸ் ஸ்டேஷன் அருகில் உள்ள ஒரு ஏ.டி.எம்., மையத்தில் பணம் எடுக்க சென்ற பெண்ணை அரிவாளால் வெட்டி சாய்த்துவிட்டு, கொள்ளையடிக்கப்பட்டுள்ளது.

இந்த ஏ.டி.எம்., மையத்தில் ஒரு பெண் பணம் எடுக்க சென்றுள்ளார். அவரை பின் தொடர்ந்து வந்த ஒரு மர்ம நபர், அப்பெண் ஏ.டி.எம்., மிஷினில் இருந்து பணம் எடுக்கும் வரை காத்திருந்துவிட்டு, பணம் எடுத்ததும் சரேலென ஏ.டி.எம்.,க்குள் புகுந்தார். உடனடியாக ஷட்டரை இறங்கினார். அதிர்ச்சியடைந்த அப்பெண், சத்தம் போட முயற்சித்தபோது, மர்ம நபர் அரிவாளால் அப்பெண்ணை தாக்கினார்.

மீட்பதில் தாமதம்:

இதில் ரத்தகாயம் அடைந்த அப்பெண், மயங்கி சாய்ந்தார். இந்த நேரத்தில், அப்பெண்ணிடம் இருந்து பணத்தையும் மொபைல் மற்றும் கிரெடிட் கார்டுகளை பறித்துக் கொண்டு அந்த மர்ம நபர் தப்பினர். சம்பவம் நடந்து மூன்று மணி நேரம் ஆகியும் அப்பெண் மீ்டகப்படவில்லை. பின்னர், அந்த வழியாக சென்ற சிலர், ஏ.டி.எம்., மையத்தில் இருந்து ரத்தம் வடிவதை பார்த்து, பெண்ணை மீட்டு, மருத்துவமனையில் சேர்த்தனர். எஸ்.ஜே., பார்க் போலீசார் வழக்கு பதிவு, செய்து, கண்காணிப்பு கேமரா மூலம் பதிவான காட்சிகளை அடிப்படையாக கொண்டு குற்றவாளியை தேடி வருகின்றனர்.

குறைபாடுகளால் ஆபத்து

கண்காணிப்பு கேமரா, செக்யூரிட்டி பாதுகாப்பு என அனைத்தும் இருந்தும் சமீப காலமாக ஏ.டி.எம்.,ல் குற்றச் செயல்கள் அதிகரித்து வருகின்றன. செக்யூரிட்டி பணியில் இருந்திருந்தால், பெங்களூரு சம்பவத்தில் பாதிக்கப்பட்ட பெண் தப்பியிருப்பார். மேலும், பல ஏ.டி.எம்.,களில், ஒரே அறைக்குள் இரண்டு, மூன்று ஏ.டி.எம்., மிஷன்கள் பொருத்தப்பட்டுள்ளன. இதுவும் குற்றச் செயல்களுக்கு வசதியாக உள்ளது.

தினமலர்

மலேசியாவில் இதுபோன்ற சம்பவங்கள் எங்கும் எப்பொழுதும் நிகழ்ந்து கொண்டேதான் உள்ளது!