நாமக்கல்லில் 58 பெண் கொத்தடிமைகள் மீட்பு

நாமக்கல் அருகே உள்ள மணிக்கட்டிபுதூரில் ஜெம்ஸ் அக்ரோ பார்ம்ஸ் என்ற பெயரில் உணவுப் பொருட்களை பதப்படுத்தி வெளிநாடுகளுக்கு ஏற்றுமதி செய்யும் தொழிற்சாலை இயங்கி வருகிறது. இதில் சத்தீஸ்கரை சேர்ந்த 58 பெண்கள் கொத்தடிமைகளாக வேலைப்பார்த்து வந்தனர்.

இங்கிருந்து தப்பி சென்ற ராஜேஸ்வரி என்ற பெண் இதுப்பற்றி அந்த மாநிலத்தின் நாராயணப்பூர் மாவட்ட கலெக்டரிடம் புகார் செய்தார். இதையடுத்து அந்த மாநில வருவாய்த்துறை, தொழிலாளர் நலத்துறை அதிகாரிகள் 7 பேர் கொண்ட குழு நாமக்கல்லுக்கு அனுப்பி வைக்கப்பட்டனர். அவர்கள் கலெக்டர் தட்சிணாமூர்த்தியை சந்தித்து நடந்த விபரங்களை தெரிவித்தனர்.

இதையடுத்து அதிகாரிகள் குழுவினர் திடீரென நேற்று அந்த தொழிற் சாலையில் ஆய்வு மேற்கொண்டனர். அப்போது சத்தீஸ்கர் மாநிலத்தை சேர்ந்த 58 பெண்கள் கொத்தடிமைகளாக பணியாற்றி வந்தது தெரியவந்தது. இதையடுத்து அவர்கள் அனைவரும் மீட்கப்பட்டு கலெக்டர் அலுவலகத்துக்கு அழைத்து வரப்பட்டனர்.

அவர்களுக்கு முதல் கட்டமாக தலா ரூ. 1000 நிவாரணமாக வழங்கப்பட்டது. இதையடுத்து 58 பெண்களும் தனி பஸ் மூலம் அனுப்பி வைக்கப்பட்டனர்.

மேலும் இங்கு வேலை பார்த்த பெண்களுக்கு மாதம் தலா ரூ. 3 ஆயிரம் சம்பளம் வழங்கப்படும் என்று அழைத்து வந்து இருக்கிறார்கள்.

ஆனால் தெரிவித்தப்படி ஊதியத்தை அந்த பெண்களிடம் வழங்காமல், அவர்களை பணியில் சேர்த்து விட்ட 2 இடைத்தரகர்களின் வங்கி கணக்கில் மாதம் 2 லட்சம் ரூபாய்க்கு மேல் செலுத்தப்பட்டு வந்ததும், அந்த பெண்களுக்கு சம்பளம் கொடுக்காமல் ஏமாற்றி வந்ததும் தெரியவந்தது.

இது தொடர்பாக தப்பி வந்த ராஜேஸ்வரி மற்றும் சில பெண்கள் கூறியதாவது:–

சத்தீஸ்கர் மாநிலத்தில் பின் தங்கிய கிராமங்களை சேர்ந்த 16 வயது முதல் 30 வயதுக்குட்பட்ட திருமணம் ஆகாத பெண்களிடம் இடைத்தரகர்கள் ஆசை வார்த்தை கூறி, இந்த தொழிற்சாலைக்கு அழைத்து வந்தனர். அந்த வகையில் கடந்த ஆகஸ்ட் மாதம் சுமார் 20 பெண்களை இடைத்தரகர் டீஜோகோரம் திருப்பதிக்கு சுற்றுலா அழைத்து வந்தார்.

வந்த இடத்தில் அனைத்து பெண்களுக்கும் தலா ரூ. 3 ஆயிரம் செலவானதாகவும், அந்த தொகையை நாமக்கல் தொழிற்சாலையில் வேலை செய்து கழிக்கும்படியும் கூறி இந்த தொழிற்சாலையில் அடைத்து விட்டார்.

இங்கு காலை 7 மணி முதல் இரவு 7 மணி வரையும், சில நேரம் இரவு 10 மணி வரையும் பெண்கள் வேலையில் ஈடுபட்டதுடன், குறுகிய 2 அறைகளிலேயே அனைத்து பெண்களும் தங்க வைக்கப்பட்டு இருந்தனர். இது தவிர அவர்கள் கூறியபடி மாதம் ரூ. 3 ஆயிரம் வழங்காமல் மாதம் ரூ. 200 மட்டுமே அளித்தனர்.

இவ்வாறு அவர்கள் கண்ணீருடன் தெரிவித்தனர்.

இது தொடர்பாக நாமக்கல் கலெக்டர் தட்சிணாமூர்த்தி வெளியிட்டுள்ள அறிக்கையில் கூறியிருப்பதாவது:–

நாமக்கல் மாவட்டத்தில் தொழிலாளர்களை கொத்தடிமைகளாக பணியமர்த்தியுள்ள அனைத்து தொழிற்சாலைகளிலும் ஆய்வுகள் நடத்தப்படும். அப்போது தொழிற்சாலைகள் துறை, தொழிலாளர் நலத்துறை விதிகளுக்கு புறம்பாக தொழிலாளர்களை அடைத்து வைத்து பணியில் ஈடுபடுத்துவது கண்டுபிடிக்கப்பட்டால் அவர்கள் மீது சட்டப்படி நடவடிக்கை எடுக்கப்படும். விசாரணையின் முடிவில் குற்றச்சாட்டுகள் உறுதியானால் அந்த தொழிற்சாலையின் உரிமையாளர், இடைத்தரகர்களுக்கு தலா 3 ஆண்டுகள் வரை சிறை தண்டனையும், அபராதமும் விதிக்கப்படும்.

இவ்வாறு அதில் கூறியுள்ளார்.

58 பெண்கள் கொத்தடிமைகளாக வைத்து மீட்கப்பட்டது தொடர்பாக கம்பெனி உரிமையாளர் மற்றும் 2 மேலாளர்கள் மீதும் வேலகவுண்டம்பட்டி போலீசார் வழக்குப்பதிவு செய்துள்ளனர்.

மாலைமலர்