50 ஆண்டுகளில் 1000 படங்களுக்கு இசை: (சங்கர்) கணேஷ் சாதனை !

நேற்று (நவம்பர் 17) இசை அமைப்பாளர் (சங்கர்) கணேசுக்கு 64வது பிறந்த நாள். அதோடு அவர் சினிமாவிற்கு இசை அமைக்கத் தொடங்கி 50 ஆண்டுகள் நிறைவடைவதால் இந்த பிறந்த நாள் அவருக்கு ரொம்பவே ஸ்பெஷல். (சங்கர்) கணேஷ் பற்றி ஒரு சின்ன பிளாஷ்பேக் ஓட்டிப் பார்க்கலாமா...

பக்கா சென்னை வாசி. அப்பா சின்னசாமி ராணுவத்தில் டிரைவர். அவர் ரிட்டையர் ஆனதும் சினிமா கம்பெனிகளின் டிரைவரானார். இப்படித்தான் கணேஷ் சினிமாவுக்குள் வருகிறார். அப்போ வந்த சினிமா பாட்டுகளை அப்படியே மனப்பாடம் பண்ணி பாடிக்கொண்டே அப்பாவுடன் ஸ்டூடியோ ஸ்டூடியோவாக அலைவார். எம்.எஸ்.விசுவநாதன் குரூப்பில் சேர்ந்து விட்டால் பெரிய ஆளா வந்திடலாம் என்று தினமும் அவர் வீட்டு வாசலில் போய் நிற்பார். இன்னொரு வாசலில் நிற்பார் சங்கராமன். இருவரும் வாசல்படி பிரண்டானார்கள். அவர்கள் காத்திருப்புக்கு பலன் கிடைத்தது. சங்கரை எம்.எஸ்.வி சேர்த்துக் கொண்டார். கணேசை ஜி.கே.வெங்கடேஷ் சேர்த்துக் கொண்டார்.

தனிதனி குருக்களிடம் இருவருமே இசை கற்றார்கள். கணேசும் ஒரு கட்டத்தில் எம்.எஸ்.வி குரூப்பில் சேர்ந்து விட சங்கர்-கணேஷ் ஜோடி அங்கே உருவானது. விஸ்வநாதன்&ராமமூர்த்தி மாதிரி நாமும் சங்கர்-கணேஷ் என்ற பெயரில் இசை அமைக்க வேண்டும் என்று திட்டம்போட்டார்கள். எம்.எஸ்.வியை அடிக்கடி சந்திக்க வரும் கவியரசர் கண்ணதாசனுக்கு அவருக்கு பிடிச்சதை ஓடி ஓடி வாங்கிக் கொடுத்து அவர் மனதில் இடம் பிடித்தார்கள். அவரிடம் "அண்ணா நாங்க தனியா இசை அமைக்கணும் நீங்கதான் சான்ஸ் வாங்கிக் கொடுக்கணும்" என்று கோரிக்கை மனு போட்டார்கள். நகரத்தில் திருடன், நான் யார் தெரியுமா என இரண்டு படங்களில் சான்ஸ் வாங்கிக் கொடுத்தார் கவிஞர். இரண்டு படத்துக்கும் அருமையா இசை அமைச்சாங்க. இவுங்க கெட்ட நேரம் ரெண்டு படமும் ரிலீசாகல.

மீண்டும் கவியரசர் கால்ல போய் விழுந்தாங்க. அவர் சாண்டோ சின்னப்பா தேவர்கிட்ட பேசி மகராசி படத்துல வாய்ப்பு வாங்கிக் கொடுத்தார். அந்த படம் 1963ல் ரிலீசாச்சு. பாட்டுகள் ஹிட்டாச்சு. கவிஞருக்கும், தேவருக்கும் நன்றி தெரிவிக்கும் விதமாக இப்போதும் டைட்டில் கார்டுகளில் தன் பெயருக்கு முன்னால் "கவிஞர் வழங்கும் தேவரின் சங்கர் கணேஷ்" என்று தான் போடுகிறார்.

சரவாண பிலிம்ஸ் ஜி.என்.வேலுமணியின் மகள் ரவிச்சந்திரிகாவை காதலித்து பலத்த எதிர்ப்புகளுக்கிடையே திருமணம் செய்து கொண்ட மகிழச்சியான நிகழ்ச்சியும், உற்ற சகோதரனாக இருந்த சங்கர் கருத்து வேறுபாடால் பிரிந்து சென்ற சோக நிகழ்வும் நடந்தது. சங்கர் பிரிந்தாலும் இப்போதும் தன் பெயரை (சங்கர்)&கணேஷ் என்றுதான் போட்டுக் கொள்கிறார்.

நான் உன்னை நினைச்சேன், ஒத்தயடிப்பாதை, அஸ்திவாரம், நெருப்பு கிளி, ரிக்ஷா தம்பி படங்களில் ஹீரோவாக நடித்தார். ஜெகதல பிரதாபன். நான் உன்னை நினைச்சேன் என்கிற படங்களை டைரக்ட் செய்தார். சங்கருடன் இணைந்து 400 படங்களுக்கும் அவரை பிரிந்த பிறகு 650 படங்களுக்குமாய் ஆக மொத்தம் 1050 படங்களுக்கு இசை அமைத்திருக்கிறார்.
வெள்ளை அல்லது கருப்பு உடை, கழுத்துநிறைய தங்க சங்கிலிகள், கை நிறைய மோதிரங்கள், சட்டையின் மேலிரண்டு பட்டன்களை திறந்துவிட்டுக் கொள்ளும் ஸ்டைல் இதுதான் கணேசின் அடையாளம். ஒரு முறை வாய்ப்பு கொடுக்க மறுத்தற்காக ஒரு இளைஞன் வெடிகுண்டு பார்சலை கணேஷ் வீட்டுக்கு தபாலில் அனுப்ப அதை பிரித்தபோது குண்டு வெடித்ததில் கை விரல்களை இழந்தார். அன்று முதல் அந்த கைக்கு உறை அணிவதை வழக்கமாக்கிக் கொண்டார்.
பாராட்டு விழா

(சங்கர்) கணேசின் 50ம் ஆண்டு விழாவும் 64வது பிறந்த நாள் விழாவும் காமராஜர் அரங்கத்தில் நேற்று (நவம்பர் 17) சிறப்பாக நடந்தது. முன்னணி இசை அமைப்பாளர்கள் கலந்து கொண்டு அவரை வாழ்த்தினார்கள். விழாவில் கணேஷ் பேசும்போது கூறியதாவது: 1963ல் மகராசி படத்தில் அறிமுகமாகி எல்லா மொழிகளிலும் சேர்த்து 1050 படங்களுக்கு இசை அமைத்துவிட்டேன். இப்போது கருவேலன், பப்பு கொப்பம்மா, இயக்குனர் என்ற படங்களுக்கு இசை அமைத்து வருகிறேன். 7 படத்துல நடிச்சேன், 2 படம் டைரக்ட் பண்ணினேன். சில படங்களில் ஒரு பாட்டுக்கு ஆடினேன். இப்போதும் வின் என்ற படத்தில் ஆடுகிறேன்.

நிறைய இளைஞர்கள் இப்போ இசை அமைக்க வர்றாங்க. வாய்ப்பு கொடுத்தா அவுங்களோட போட்டி போடத் தயார். உடம்பில் உயிர் இருக்கிற வரைக்கும் தொடர்ந்து இசை அமைத்துக் கொண்டும், பாடிக்கொண்டும் இருப்பேன். என்றார்.

கணேசின் இசைப் பயணம் தொடர வாழ்த்துவோம் !

நன்றி : தினமலர்