புண்ணியம் தரும் திருக்கார்த்திகை!

"கார்த்திகைக்கு அப்புறம் மழையில்லை கர்ணனுக்கு அப்புறம் கொடையுமில்லை'

கார்த்திகை மாதம் பல சிறப்புகள் கொண்ட அற்புதமான மாதம் ஆகும். கார்த்திகை மாதத்தின் முதல் தினம் "முடவன் முழுக்கு' என்று சொல்லப்படுகிறது. முடவன் ஒருவனுக்கு கடவுள் முக்தி கொடுத்தமையால், அன்றைய தினம், நாம் புண்ணிய நதிகளில் நீராடினால், நமக்கும் முக்தி கிடைக்கும் என்பது ஐதிகம்.

* விளக்கு சமர்ப்பிக்கும் வைபவம்!

சாதாரணமாக, பித்தளைக் குட்டி விளக்குகளை தாம்பூலத்தில் வைத்துக் கொடுக்கலாம். ஆலயத்துக்கு விளக்குகள் சமர்ப்பித்தால் மிகவும் புண்ணியம். நமது சகல விருப்பங்களையும் விரைவில் நிறைவேற்றும். இரண்டு பித்தளை அல்லது வெண்கல குத்துவிளக்குகளை வாங்கி, நிறைய பூ சாற்றவும். மஞ்சள், குங்குமம் இடவும். நிறைய நெய் அல்லது நல்லெண்ணெய் விட்டு, பஞ்சுத் திரியைப் போட்டு, ஐந்து முகங்களையும் ஏற்றி ஏதேனும் ஓர் ஆலயத்தில் சன்னதியில் கொண்டு சமர்ப்பித்து, அர்ச்சனை செய்தால், கண்டிப்பாகப் பலன் கிடைக்கும். முக்கியமாகத் திருமணம் நடைபெறும். புத்திரபாக்கியம், சொந்தவீடு என எந்த விருப்பமும் நிறைவேறும். கார்த்திகை மாத வெள்ளிக்கிழமைகளில் சமர்ப்பித்தால், கூடுதல் விசேஷம். வினைகள் அகன்று, விருப்பம் நிறைவேறும்.

* புஷ்பாஞ்சலி சேவை!

கைசிக ஏகாதசி தினத்தன்று, மாலையில் ஆறு மணியிலிருந்தே, நங்கநல்லூரில் உள்ள உத்தர குருவாயூரப்பன் ஆலயத்தில் கூடைக் கூடையாக, மலர்கள் குவிந்து விடும். ஒவ்வொரு ஸ்வாமி சன்னதியாக இந்த மலர் மழை பொழியும். கடைசியில் குருவாயூரப்பனுக்குப் புஷ்பாஞ்சலி நடைபெறும். சன்னதி வாசலில், மல்லிகை, முல்லை, தவனம், சாமந்தி மலர்களால் தோரணங்கள் ஆடும்போது, "வாருங்கள் எங்கள் கண்ணனைக் கண்ணாரக் கண்டு களியுங்கள்' என அழைப்பது போல் தோன்றும். தாமரை மலர்கள், சிவப்பு, வெள்ளை, ரோஜா மலர்கள், மணம் நிறைந்த வெண்மையான மல்லிகை, முல்லை, இருவாட்சி, சாமந்தி, தவனம் என கூடைக் கூடையாக, அர்ச்சகர், மலர்களை மிக மிக மெதுவாக, மழை போல குருவாயூரப்பனின் மீது சமர்ப்பித்துக் கொண்டே இருப்பார். மலை போல் மலர்கள் குவிந்து விடும். கடைசியில், தீபாராதனை நடைபெறும். பின்பு, அவற்றை மற்ற கூடைகளில் நிரப்பி விடுவார்கள். இதுபோல், மலர்களால் அஞ்சலி செய்து கொண்டே இருப்பார்கள். பார்க்க கண் கொள்ளாக் காட்சியாக இருக்கும்.

* கார்த்திகை பஞ்சமி

கார்த்திகை பஞ்சமி நன்னாளில் அவதரித்த ஸ்ரீஅலர்மேலு மங்கைத் தாயாருக்கு அற்புதமான உற்சவம் நடைபெறும். ஸ்ரீயாகிய மகாலட்சுமியின் திருவருள் கிடைத்திட, அவளது திருவடிகளைப் பணிந்திடுவோம்.

* கார்த்திகை ஞாயிறு

கார்த்திகை ஞாயிற்றுக்கிழமை ஸ்ரீ லட்சுமி நரசிம்மருக்கு மிகவும் உகந்த தினம். அன்றைய தினம் விரதம் இருந்து ஸ்ரீ மந்த்ரி ராஜபத ஸ்தோத்திரம் சொல்வது மிகவும் நல்லது.

* கார்த்திகை பௌர்ணமி

கார்த்திகை பௌர்ணமி தினத்தில்தான், எல்லா ஆலயங்களிலும், விளக்குகள் ஏற்றுவார்கள். இல்லங்களிலும், இருள் நீக்க, விளக்குகள் ஏற்றி மகிழ்வோம். ஆலயங்களில், சொக்கப்பானை கொளுத்துவார்கள். சாதாரண பௌர்ணமியே அம்பாளுக்கு உகந்தது. கார்த்திகை பௌர்ணமி என்றால் கேட்கவே வேண்டாம். அன்றைய தினம் அம்பாளுக்கு விளக்கேற்றி வழிபட செல்வம் பெருகும்.

* கார்த்திகை கிருத்திகை

கார்த்திகை மாத கிருத்திகை கார்த்திகேயனாம் ஸ்ரீ முருகனுக்கு மிகவும் உகந்த தினம். அவல் பொரி உருண்டைகள் செய்து, அப்பம் செய்து நிவேதனம் செய்ய வேண்டும்.

* கைசிக ஏகாதசி

கார்த்திகை மாதத்தில், சுக்லபட்சத்தில் வரும் ஏகாதசியே கைசிக ஏகாதசி என்று கொண்டாடப்படும். அன்றைய தினம், உப்பில்லாமல் விரதம் கடைபிடித்தால் 108 ஏகாதசிகள் விரதம் இருந்த பலன் கிடைக்கும் என்பது ஐதிகம். பழம், பால், பயத்தம் பருப்பு கஞ்சி என உண்டு அன்று முழுவதும் கடவுளைத் தியானம் செய்ய அற்புதப் பலன் கிடைக்கும்.

- வஸந்தா வேணுகோபால்