போலீஸ் உடையில் தீவிரவாதிகளா?

நடிகர் கமல்ஹாசனுக்கு புகழ்சேர்த்த படங்களில் ஒன்று 1987–ம் ஆண்டு வெளியான ‘நாயகன்’ திரைப்படம். மும்பையில் உள்ள ஒரு பெரிய தாதாவாக அதிலும், சாதாரண ஏழை–எளிய மக்களுக்காக பல கொடுமைகளை அழிக்கும் தாதாவாக கமல்ஹாசன் நடித்து இருப்பார். காமக்கொடூரனாக, லஞ்சப் பேர்வழியாக, ஏழைகளை துன்புறுத்துவதில் மகிழ்ச்சி காண்பவனாக உள்ள ஒரு போலீஸ் இன்ஸ்பெக்டரை கொன்றுவிடுவார். அந்த போலீஸ் இன்ஸ்பெக்டரின் மனவளர்ச்சி குன்றிய மகனை தத்து எடுத்து வளர்ப்பார். கடைசி காட்சியில் பல ஆண்டுகளுக்கு பிறகு, அதே மனவளர்ச்சி குன்றிய மகன் வாலிபனாக வளர்ந்த நிலையில், தன் தகப்பனாரின் போலீஸ் சீருடையை அணிந்து ஒரு கூட்டத்தில் கமல்ஹாசனை சுட்டுக்கொல்வதுபோல காட்சி வரும். அது படம் என்றாலும், மறைந்த பிரதமர் இந்திரா காந்தியை, அவரது மெய்க்காவலர்களான போலீஸ் அதிகாரிகள் தான் சுட்டுக்கொன்றனர் என்பதை யாரும் மறந்துவிடக்கூடாது. ராஜீவ்காந்தி கொலையின்போது ஒற்றைக்கண் சிவராசன், பத்திரிகை நிருபர் போல நோட்டு, பேனாவை வைத்துக்கொண்டு வந்ததைத்தொடர்ந்து, இன்றளவும் முக்கிய தலைவர்கள் கலந்துகொள்ளும் நிகழ்ச்சிகளில் செய்தி சேகரிக்க வரும் பத்திரிகையாளர்களை அடையாள அட்டை இருக்கிறதா? என்பதையும், அவர்கள் பத்திரிகை நிருபர்கள்தானா? என்பதையும் அரசின் செய்தித்துறை அதிகாரிகளை வைத்து சோதனை செய்த பிறகுதான் உள்ளே விடுகிறார்கள்.

எனவே, தலைவர்களுக்கு குறிவைத்து திட்டமிடும் தீவிரவாதிகள் எந்த அடையாளங்களுடனும் வரக்கூடும் என்பது உறுதியாகிவிட்டது. இப்போது அதே சோதனையை இனி பாதுகாப்புக்காக வரும் போலீசாருக்கும் செய்யவேண்டிய கட்டாயம் வந்துவிட்டது. பா.ஜ.க.வின் பிரதமர் வேட்பாளரான குஜராத் முதல்–மந்திரி நரேந்திரமோடியின் பாதுகாப்பு விஷயத்தில் மிகவும் எச்சரிக்கையாக இருக்கவேண்டும். இப்போது அவர் நாடு முழுவதும் சூறாவளி சுற்றுப்பயணத்தை மேற்கொண்டு இருக்கிறார். பாட்னாவில் அவர் பேச இருந்த மைதானத்திலும் மற்றும் பல இடங்களிலும் வெடிகுண்டுகள் வெடித்தன. இந்த சம்பவத்தின்போது, கைது செய்யப்பட்ட ஒருவன் தடை செய்யப்பட்ட இந்தியன் முஜாகிதீன் என்ற தீவிரவாத இயக்கத்தின் ஆள். அவன் மோடியை தீர்த்துக்கட்டவே வந்தோம் என்று சொல்லிவிட்டான். இப்போது நாளை பெங்களூரு வர நரேந்திரமோடி திட்டமிட்டு இருக்கிறார். இந்த நேரத்தில் அவருக்கு பலத்த போலீஸ் பாதுகாப்பு கொடுக்க போலீசார் திட்டமிட்டுள்ளனர்.

இந்த நிலையில், போலீசாருக்கு ஒரு தகவல் கிடைத்தது. பொதுவாக எந்த மாநிலம் என்றாலும், போலீஸ் சீருடை, நர்சுகள் சீருடை போன்றவற்றை சில குறிப்பிட்ட டெய்லர்களே பரம்பரை பரம்பரையாக தைப்பார்கள். அப்படி ஒரு டெய்லரிடம் பெங்களூருவில் வடஇந்தியரைப்போல தோற்றமளித்த வயதான ஒருவன் வந்து 10 செட் போலீஸ் சீருடை, தொப்பி, லத்தி போன்றவற்றை வாங்கியிருக்கிறான். நரேந்திரமோடி பெங்களூரு வர இருக்கும் நேரத்தில் யாரோ அடையாளம் தெரியாதவன் இப்படி 10 செட் போலீஸ் யூனிபார்ம் வாங்கினான் என்றால், அதன் நோக்கம் நன்றாக புரிந்துவிட்டது. அதுவும் போலீஸ் கான்ஸ்டபிள் சீருடை. அதிகாரிகள் சீருடை என்றால் யார் இவர்? புதிதாக இருக்கிறாரே என்று கண்டுபிடித்துவிடலாம். போலீஸ்காரர்கள் என்றால் வெளி ஊரில் இருந்து விசேஷ பணிக்காக வந்து இருப்பார் என்று மற்றவர்கள் நினைத்துக்கொள்வார்கள் என்ற திட்டத்தில் தீவிரவாதிகள் பயன்படுத்த வாங்கி இருக்கிறார்கள். இந்த திட்டம் வெளியே தெரிந்துவிட்டது. இல்லையென்றால், நினைத்துக்கூட பார்க்க முடியவில்லை.

கர்நாடக போலீசார் நல்லவேளையாக கண்டுபிடித்து தீவிர நடவடிக்கை எடுக்க தொடங்கிவிட்டனர். பேலஸ் கிரவுண்டு என்று சொல்லப்படும் அரண்மனை மைதானத்துக்கு மோடியின் பாதுகாப்புக்காக வரும் அனைத்து போலீஸ்காரர்களுக்கும் விஷேச பாஸ்கள் வழங்கப்படும். இந்த அடையாள அட்டை உள்ளவர்கள் தான் அந்த மைதானத்துக்குள் அனுமதிக்கப்படுவார்கள் என்று போலீஸ் கமிஷனர் அறிவித்துவிட்டார். மொத்தத்தில், நரேந்திரமோடி தீவிரவாதிகளின் பிடியில் இருக்கிறார் என்பது தெள்ளத்தெளிவாக தெரிந்துவிட்டது. எனவே, அவருடைய பாதுகாப்பு தொடர்பாக இன்னும் கண்ணும் கருத்துமாக இருக்கவேண்டும். அவர்களின் எல்லா முயற்சிக்களையும் முறியடிக்க மத்திய, மாநில அரசுகளின் போலீசார் மட்டுமல்லாமல், உளவுப்பிரிவும் கண்ணும் கருத்துமாக செயல்படவேண்டும், பாதுகாப்பு இன்னும் பலப்படுத்தப்பட வேண்டும், ஜனநாயகம் காப்பாற்றப்படவேண்டும் என்பதை பெங்களூரு பாடமாக சொல்லிவிட்டது.

தினத்தந்தி

நல்ல திறமைமிகு மனிதருக்குக்தான் எத்தனை சோதனை.