பீகாரில் ஒரு கிலோ உப்பு ரூ. 150க்கு விற்பனை !

by **krishnaamma** Fri Nov 15, 2013 2:11 pm

பாட்னா, நவ. 15–

பீகார் மாநிலம் முழுவதும் நேற்று உப்பு தொடர்பாக திடீரென ஒரு வதந்தி பரவியது. உப்புக்கு கடும் தட்டுப்பாடு ஏற்பட்டு விட்டது. இனி ஒரு மாதத்துக்கு உப்பே கிடைக்காது’’ என்று மக்களிடையே யாரோ வதந்தியை ஏற்படுத்தி விட்டனர்.

அந்த வதந்தியை உண்மையென நம்பிய மக்கள் கூட்டம் கூட்டமாக கடைகளுக்கு படையெடுத்தனர். போட்டி போட்டுக் கொண்டு அதிகமான உப்பை வாங்கினார்கள்.

உப்புக்கு திடீரென கிராக்கி ஏற்பட்டு விட்டதை உணர்ந்த வியாபாரிகள் உடனே விலையை உயர்த்தி விட்டனர். பெரும்பாலான வியாபாரிகள் ஒரு கிலோ உப்பை 150 ரூபாய் வரைக்கும் விற்றனர்.

சமஸ்திபூர், வைசாலி உள்பட பல ஊர்களில் பெரிய கடைக்காரர்கள் உப்பு மூட்டைகளை விற்க மறுத்து பதுக்கினார்கள். விலை மேலும் அதிகரிக்கும் என்று அவர்கள் எதிர் பார்த்தனர். அவர்கள் உப்பை விற்க மறுத்ததால் பொது மக்கள் அவர்களுடன் தகராறில் ஈடுபட்டனர்.

இதையடுத்து பீகார் மாநில அரசு உப்புக்கு எந்த தட்டுப்பாடும் இல்லை. மக்கள் பீதி அடைய வேண்டாம். உப்பை பதுக்குபவர்கள் மீது கடும் நடவடிக்கை எடுக்கப்படும் என்று எச்சரித்தது.

என்றாலும் அரசின் எச்சரிக்கையை மீறி 3 வியாபாரிகள் உப்பை அதிக விலைக்கு விற்றனர். 4 ரூபாய்க்கு விற்க வேண்டிய உப்பை அவர்கள் 60 ரூபாய்க்கு விற்றதாக தெரிய வந்தது.

இதையடுத்து அவர்கள் 3 பேரையும் போலீசார் கைது செய்தனர். அவர்களை காவலில் வைக்க மாசிஸ்திரேட் உத்தர விட்டார்.

நன்றி : மாலை மலர்