The Fall 2006- வீழ்ச்சி -இயக்குநர் - தர்சேம் சிங்

விபத்தாகிப் போன ஒரு சினிமா காட்சியை நாம் திரையில் பார்க்கிறோம். பீத்தோவனின் ஏழாவது சிம்பொனி பின்னணியில் ஒலிக்கிறது. (பீத்தோவன் மறைந்து 186 வருடங்களானாலும் அவரது இசை இன்னும் பரவலாக உபயோகிக்கப்படுகிறது. சமீபத்தில் தமிழில் வெளியான நேரம் திரைப்படத்தில் கூட பீத்தோவனின் Fur Elise சில காட்சிகளில் பயன்படுத்தப்பட்டிருந்தது).

லாஸ் ஏஞ்சல்ஸில் இருக்கும் ஒரு மருத்துவமனையில் விபத்தில் கால்கள் பாதிக்கப்பட்ட ஒரு சினிமா ஸ்டன்ட் கலைஞன் சிகிச்சை பெற்று வருகிறான். ஆரஞ்சு பறிக்கப் போய் கீழே விழுந்து கையில் காயமடைந்த ஒரு சிறுமியும் அதே மருத்துவமனையில் அனுமதிக்கப்பட்டிருக்கிறாள். அவர்கள் இருவருக்குமிடையில் நட்பு உருவாகிறது.

அவன் அவளுக்கு ஒரு கதை சொல்லத் தொடங்குகிறான். அந்தக் கதை வெகு நீளமானது. அந்தக் கதை அதீத கற்பனைக் கதையானாலும் அவனது வாழ்க்கையோடு பின்னிப்பிணைந்துள்ளது. அந்தக் கதையை அவளுக்குச் சொல்வது அவள் மீது கொண்ட அன்பினால் அல்ல. அவளை மார்ஃபைன் மாத்திரைகளைத் திருடச் செய்து அதன் மூலமாகத் தன் வாழ்வை முடிக்க முடிவு செய்திருந்தான் அவன். அந்தச் சிறுமி காரணம் புரியாமல் அவனுக்கு உதவினாலும் அவன் முயற்சிகள் தோல்வியடைகின்றன.

அவன் அவளுக்குச் சொல்லும் கதை இன்னும் நீள்கிறது. அந்தக் கதையில் அவனுடைய முன்னாள் காதலியும், அவளுடைய இப்போதைய காதலனும் கதை மாந்தராகிறார்கள். தனது வாழ்க்கையையே கதையாக்குகிறான் அவன். தொடர்ந்து அந்தச் சிறுமியும் கதை மாந்தரில் ஒருவராகிறாள்.

இத்திரைப்படத்தின் காட்சியமைப்புகள் மிகச் சிறப்பானவை. ஒரு அதீதக் கற்பனைக் கதையையும், இயல்பு வாழ்க்கையையும் பிணைத்து உருவாக்கியிருப்பது ஒரு சிறந்த முயற்சி. மிகச்சிறந்த திரைப்படங்கள் வரிசையில் இடம்பெற முழுத்தகுதியுள்ள திரைப்படம் இது.