நாங்கள் சுடுகுழல் முன்னே முடங்கிப் போயிருக்கின்றோம்”: மீளக்குடியமர்ந்துள்ள மக்கள்

http://www.meenagam.org/?p=14602
நாங்கள் சுடுகுழல் முன்னே முடங்கிப் போயிருக்கின்றோம்”: மீளக்குடியமர்ந்துள்ள மக்கள்



எழுதியவர்வன்னியன் on October 29, 2009
பிரிவு: செய்திகள்



முட்கம்பி
வேலிக்குள் இருந்து வெளியேறிய நாங்கள் சுடுகுழல் முன்னே முடங்கிப்
போயிருக்கின்றோம் என்று வன்னியில் இடம்பெயர்ந்து மீளக்குடியமர்ந்துள்ள
மக்கள் தெரிவித்துள்ளனர்.

வன்னியில் சிறீலங்காப் படையினரின் போர்
நடவடிக்கையால் இடம்பெயர்ந்த மக்கள் வவுனியா செட்டிகுளத்தில் உள்ள தடுப்பு
முகாம்களில், முட்கம்பி வேலிக்குள் அடைத்து வைத்துவிட்டு தற்போது மக்களை
மீளக்குடியமர்த்தியுள்ளதாக சிறீலங்கா அரசு தெரிவித்துள்ளது.

இன்நிலையில் மீளக்குடியமர்ந்த மக்கள்
தமது வாய்கள் அடைக்கப்பட்ட நிலையில் சுடுகுழல் முன்னே முடங்கிப்போயுள்ளோம்
என்று தெரிவித்துள்ளனர். உலக நாடுகளிடம் நிதியினை பெற்றுக் கொள்ளும்
நோக்கிலும், தமிழ்மக்கள் மீது சிறீலங்கா அரசு கருணைகாட்டுகிறது, என்ற
நோக்கிலும் இடம்பெயர்ந்த பெருமளவான தமிழ் மக்கள் முகாம்களில் இருந்து
வெளியில் எடுத்து அவர்களது சொந்த மாவட்டங்களில் முகாம்களில்
தங்கவைக்கப்பட்டுள்ளார்கள்.

குறிப்பாக யாழ்ப்பாணத்தில்
ஐம்பதாயிரத்திற்கு மேற்பட்ட மக்கள் மீளக்குடியமர்தவுள்ளதாக கூறிக்கொண்டு
பாடசாலைகளிலும் பொது மண்டபங்களிலும், தங்க வைக்கப்பட்டுள்ளார்கள். இவ்வாறே
கிளிநொச்சி மாவட்டத்தினை சேர்ந்த மக்கள் சிறீலங்காப் படையினரின் முகாம்கள்
அமைந்துள்ள இடங்களுக்கருகில் பாடசாலைகளில் தங்கவைக்கப்பட்டுள்ளார்கள்.

குறிப்பாக கிளிநொச்சி நகரில் உள்ள
கிளிநொச்சி மகாவித்தியாலயத்தில் கூடதங்கவைக்கப்படாமல் அங்குள்ள சிங்கள
மகாவித்தியாலத்திலே தங்கவைக்கப்பட்டுள்ளார்கள். இதேபோன்று மாங்குளம்,
ஒட்டிசுட்டான் பிரதேசங்களிலும் சிறீலங்காப் படையினரின் பாரிய
தளங்களுக்கருகில் கூடாரங்கள் அமைக்கப்பட்ட நிலையில் மக்கள்
வாழ்கின்றார்கள்.

மல்லாவி பாலிநகர்பகுதியிலும் அங்குள்ள
சிறீலங்கா ஊர்காவல் படைதளத்திற்கு அண்மையில் மக்கள்
தங்கவைக்கப்பட்டுள்ளார்கள். இம்மக்களை அடிமைகளாக வைத்து மக்களின்
சொந்தகாணிகளை சீர்செய்யும் பணிகளினை சிறீலங்காப் படையினர் மேற்கொண்டு
வருகின்றார்கள். அங்கு மக்களின் நடமாட்ட சுதந்திரம் சிறீலங்காப்
படையினரின் சுடுகுழல் முன்தான் உள்ளது.

மக்கள் தமது காணிகளை சீர்செய்ய
செல்வதாயின் அங்கும் சிறீலங்காப் படையினரால்தான் அழைத்து
செல்லப்படுகிறார்கள். முகாம்களில் இருக்கும்போது மக்களால் பணம் கொடுத்து
வாங்கப்பட்ட கையடக்க தொலைபேசிகளைக்கூட சிறீலங்காப் படையினர்
பறித்துள்ளார்கள்.

அங்கு நடக்கும் அல்லது நடக்கப்போகும்
நிகழ்வுகள் வெளியில் தெரிந்துவிடக்கூடாது என்பதற்காகவே சிறீலங்காப்
படையினரால் இவ்வாறன நடவடிக்கை மேற்கொள்ளப்பட்டுள்ளது. இன்நிலையில்தான்
எதுவும் அறியாத அடைக்கப்பட்ட மக்களாக சுடுகுழல்முன்னே தமது செந்த
இடங்களில் கூடாரங்களில் வாழ்ந்து கொண்டிருப்பதாக மீளக்குடியமர்ந்துள்ள
மக்கள் தெரிவித்துள்ளனர்.
(Visited 52 times, 42 visits today)

எதுவும் அறியாத அடைக்கப்பட்ட மக்களாக சுடுகுழல்முன்னே தமது செந்த
இடங்களில் கூடாரங்களில் வாழ்ந்து கொண்டிருப்பதாக மீளக்குடியமர்ந்துள்ள
மக்கள் தெரிவித்துள்ளனர்.

ஆம் மக்கள் இங்கே சொல்ல்பவைதான் உண்மைகள்.. இன்னுமா இவர்களி இப்படி படுத்தனும்..பாவம் நம் மக்கள்..