93 வயதில் உலக சாதனை!

**சிவா** · **சிவா** Fri Nov 08, 2013 2:03 pm

93 வயதில் ஒருவருக்கு, கண்பார்வை மங்கி, கேட்கும் திறன் குறைந்து, ஞாபக மறதியின் ஆக்டோபஸ் பிடிக்குள் சிக்கித் திணறிக் கொண்டு, நடை தள்ளாடுவது என்பது பொதுவான நிகழ்வு.

"இல்லை அதெல்லாம் சுத்தம் ஹம்பக்' என்கிறார் நமது கண்களுக்கு ஓர் ஆரோக்ய தேவதையாக அதிசயங்களை நிகழ்த்திக் கொண்டு இருக்கும் ஞானம்மாள். கோவை கணபதியைச் சேர்ந்த இவர், இந்த வயதிலும் 50க்கும் அதிகமான யோகாக்களை அசராமல் செய்வதுடன் எங்கு போட்டிகள் நடந்தாலும் தங்கப் பதக்கங்களையும், பரிசுகளையும் பாராட்டுக்களையும் அள்ளிக் கொண்டு இருக்கிறார்.

நாம் அங்கு போனபொழுது மாமியாரும், மருமகளும் ஒரே மாதிரியான யோகாவை "நீயா, நானா?' என்று போட்டி போட்டுக் கொண்டு அசத்திக் கொண்டிருந்தார்கள்.

நாம் கொஞ்சம் தயங்கிப் பின்வாங்கிய பொழுது அருகிலிருந்த அவரது மகன் யோகா நிபுணர் டாக்டர். பாலகிருஷ்ணன் "அச்சச்சோ... அதெல்லாம் ஒண்ணும் இல்லைங்க; இது ஆரோக்கியமான போட்டி தானுங்க. என் அம்மாதான் என் மனைவிக்கு யோகா குரு. எங்க அம்மா எங்கெல்லாம் சாதனை செய்றாங்களோ மாமியார் மெச்சிய மருமகளாக அதை என் மனைவியும் தொடர்ந்து பரிசுகளைத் தட்டி வருகிறார்' என்றார் கூலாக.

அவர் பேச ஆரம்பித்த பொழுது, 23 வயது இளைஞியாகவே ஞானம்மாள் தெரிந்தார்.

"சொந்த ஊர் பொள்ளாச்சி பக்கத்தில் ஜமீன் காளியாபுரம். நான் 1920ல் பிறந்தேன். எங்கள் குடும்பத்தில் தொடர்ந்து ஐந்து தலைமுறையாக யோகா பயிற்சிகள் செய்து வருகின்றனர். எனது கணவரும் யோகா நிபுணர்.

எனது தாத்தா மன்னாருவிடம் சிறு வயதிலேயே யோகா கற்றுக் கொண்டேன். 50க்கும் அதிகமான யோகா ஆசனங்களைக் கற்றுக் கொண்ட நான் திருமணத்துக்குப் பின்பு பரம்பரையான யோகாவை கைவிடக்கூடாது என்று வீட்டிலேயே பயிற்சிகள் எடுக்க ஆரம்பித்தேன். என்னிடம் பயிற்சி பெற்ற 62 பேர் இன்று யோகா பயிற்சியாளர்களாக பல்வேறு இடங்களில் பயிற்சியளித்து வருகின்றனர். எனக்கு இரண்டு மகன்கள் மூன்று மகள்கள். எல்லோருமே யோகா ஆசிரியர்கள். ஐந்து குழந்தைகளும் வீட்டில்தான் எனக்கும் நார்மல் பிரசவத்தில் பிறந்தனர். எனக்கு இதுவரை எந்த வியாதியும் வந்ததில்லை, மருத்துவமனைக்குச் சென்றதுமில்லை. முழு உடல்நலத்துடன் ஆரோக்கியத்துடன் இருக்கிறேன்' என்றார்.

"யோகா பயிற்சிகள் தினசரி செய்தால் உள்ளுறுப்புகளுக்கு ரத்த ஓட்டம் கிடைக்கும். கணையம், சிறுநீரகம், இதயம் முழு பலத்துடன் இயங்கி நோய் எதிர்ப்பு சக்தி உருவாகும். யோகா செய்தால் பெண்களுக்கு கர்ப்பப்பை பிரச்னை தாமாகவே நீங்கிவிடும். இந்த விழிப்புணர்ச்சியை ஏற்படுத்த மருதமலையில் வாழும் ஆதிவாசிப் பெண்களுக்கு இலவசமாக யோகாசனம் கற்றுக் கொடுத்து வருகிறேன். எலும்பு மூட்டுகள் எனக்கு வலுவுள்ளதாக இருக்கின்றன. இந்த வயதிலும் இரவில் படுக்கப் போனால் அதிகாலையில்தான் விழிப்பேன். இடையில் விழிப்பு வராத ஆழ்ந்த உறக்கம் கிடைக்கிறது' என்றார்.

சாதனைகள்: கோவை ராமநாதபுரத்தில் 50 வயதுக்கு மேற்பட்டோருக்கான யோகா போட்டிகளில் 1500க்கும் மேற்பட்டவர்கள் கலந்து கொண்டார்கள். இதில் இவரும் கலந்து கொண்டு பலவகையான கடினமான ஆசனங்களைச் செய்து அசத்தி தங்கப் பதக்கம் பெற்றுள்ளார். கோவை சி.எம்.எஸ். பள்ளியில் நடந்த மாநில அளவிலான யோகா போட்டியில் வெள்ளிப் பதக்கமும், புஞ்சை புளியம்பட்டியில் நடந்த மாநில அளவிலான போட்டிகளில் தங்கப்பதக்கமும், கோவை யோகா டிரஸ்ட் சென்øனை இன்டர்நேஷனல் சார்பில் நடத்தப்பட்ட தேசிய அளவிலான யோகாசனப் போட்டிகளில் முதலிடம் பெற்று தங்கப்பதக்கம் கைப்பற்றியதுடன் அந்தமானில் நடைபெற்ற யோகாசனப் போட்டிகளுக்கும் தேர்வாகி "சாம்பியன் ஆஃப் சாம்பியன்ஸ்' பிரிவில் தங்கப் பதக்கம் பெற்றிருக்கிறார்.

- கோவை பாலா