செஸ் போட்டியின் பிறப்பிடம் இந்தியா: ஜெயலலிதா பேச்சு

சென்னை: உலக செஸ் போட்டியை இன்று தொடங்கி வைத்துப்பேசிய முதலமைச்சர் ஜெயலலிதா, 1500 ஆண்டுகள் பழமைவாய்ந்த செஸ் போட்டியின் பிறப்பிடம் இந்தியா என்று பெருமிதத்துடன் கூறினார்.

இந்தியாவில் முதல் முறையாக உலக செஸ் சாம்பியன் போட்டி சென்னையில் நடத்தப்படுகிறது. இந்த போட்டி வருகிற 9 ஆம் தேதி முதல் 26 ஆம் தேதி வரை சென்னை, அண்ணா சாலையில் உள்ள ஹயாத் நட்சத்திர ஓட்டலில் நடக்கிறது.தமிழக அரசின் முழுமையான ஆதரவுடன் தமிழ்நாடு செஸ் சங்கம் இந்தப் போட்டியை நடத்துகிறது.

ஜெயலலிதா பேச்சு

இந்நிலையில், உலக செஸ் போட்டியின் தொடக்க விழா நேரு உள் விளையாட்டு அரங்கில் இன்று மாலை 4 மணிக்கு தொடங்கியது. முதலமைச்சர் ஜெயலலிதா இப்போட்டியை தொடங்கி வைத்தார்.

தொடக்க விழாவில் பேசிய ஜெயலலிதா, 1500 ஆண்டுகள் பழமைவாய்ந்த செஸ் போட்டியின் பிறப்பிடம் இந்தியா என்று பெருமிதத்துடன் கூறினார். மேலும் உலக செஸ் போட்டியை சென்னையில் நடத்துவதற்காக தமது அரசு ரூ.29 கோடி ஒதுக்கீடு செய்துள்ளதாக குறிப்பிட்டார்.

விஸ்வநாதன் ஆனந்துக்கு பாராட்டு

இந்தியாவின் செஸ் வீரர்களில் விஸ்வநாதன் ஆனந்த முதன்மையானவர் என்றும், தொடர்ந்து மூன்று முறை சர்வதேச சாம்பியன் பட்டத்தை வென்றவர் எனறும் ஜெயலலிதா தனது உரையில் பாராட்டு தெரிவித்தார்.

தொடக்க விழா நிகழ்ச்சி முடிந்ததும் வீணை காயத்திரியின் இசை நிகழ்ச்சி, நடிகை ஷோபனா மற்றும் ஊர்மிளா சத்யநாராயணா ஆகியோரின் பரத நாட்டிய நிகழ்ச்சியும் நடைபெற இருக்கிறது. கார்ல்செனின் நாடான நார்வே நாட்டு இசை நிகழ்ச்சி இடம் பெறுகிறது.

விஸ்வநாதன் ஆனந்த் - மாக்னஸ் கார்ல்சென் மோதல்

இந்த போட்டியில், 5 முறை உலக சாம்பியன் பட்டத்தை வென்றவரும், இந்திய கிராண்ட் மாஸ்டருமான விஸ்வநாதன் ஆனந்த்தும், நார்வே கிராண்ட் மாஸ்டர் மாக்னஸ் கார்ல்சென்னும் மோதுகிறார்கள்.

ஆனந்த், கார்ல்சென் மோதும் உலக செஸ் போட்டி 12 சுற்றுகளை கொண்டது. இருவரும் சமநிலை வகித்தால் 28 ஆம் தேதி அன்று டைபிரேக்கர் ஆட்டம் நடைபெறும். 11, 14, 17, 20, 23, 25, 27 ஆகிய தேதிகள் ஓய்வு நாட்களாகும்.

ஆனந்தும், கார்ல்சென்னும் இதுவரை 62 போட்டிகளில் மோதியுள்ளனர். இதில் ஆனந்த் 15 ஆட்டங்களில் (வெள்ளை நிற காய்கள் 7, கறுப்பு நிற காய்கள் 8) வெற்றி பெற்றுள்ளார். கார்ல் சென் 11 ஆட்டங்களில் வெற்றி (வெள்ளை 7, கறுப்பு 4) பெற்றுள்ளார். 36 ஆட்டம் சமனில் முடிந்தது.