சவுதியில் இருந்து 1.4 லட்சம் இந்தியர் வருகை !

சவுதியில் இருந்து 1.4 லட்சம் இந்தியர் வருகை !

'புதிய சட்டம் காரணமாக, சவுதி அரேபியாவில் இருந்து, கடந்த ஆண்டில், ஒரு லட்சத்து, 35 ஆயிரம் இந்தியர்களை, அந்நாட்டு அரசு வெளியேற்றியுள்ளது. இன்னமும் அங்கு, 1.4 லட்சம் இந்தியர்கள் உள்ளனர். அவர்களுக்கு அசம்பாவிதம் ஏதும் வராத வகையில் நடவடிக்கைகள் எடுக்கப்படுகின்றன' என்று, மத்திய அரசு அறிவித்துள்ளது.

'நிதாகத்' சட்டம்:

சவுதி அரேபியாவில் உள்ள இந்தியர்களால் தங்கள் நாட்டைச் சேர்ந்தவர்களுக்கு வேலைவாய்ப்பு குறைவதாக கூறி, 'நிதாகத்' சட்டத்தை, அந்நாடு நிறைவேற்றி இருக்கிறது. இதனால், அங்கு தங்கியிருக்கும் இந்தியர்கள், பெருமளவில், தாயகம் திரும்பி வருகின்றனர்; இதில், கேரளா, தமிழகம் மாநிலத்தைச் சேர்ந்தவர்கள் அதிகம். வெளிநாடுவாழ் இந்தியர் நலத்துறை அமைச்சர், வயலார் ரவி, டில்லியில் நேற்று, நிருபர்களிடம் கூறியதாவது: 'பிரவாசி பாரத்' என்ற பெயரில், ஒவ்வொரு ஆண்டும், வெளிநாடுவாழ் இந்தியர்கள் பங்கேற்கும், மாபெரும் மாநாடு நடத்தப்பட்டு வருகிறது. அந்த வகையில், வெளிநாடு வாழ் இந்தியர்களின், 12வது மாநாடு, ஜனவரி மாதம், டில்லியில் நடைபெறுகிறது. சவுதி அரேபியா, கடந்த ஆண்டு, மேற்கொண்ட, நிதாகத் சட்டத்தால், முறையான குடியேற்ற சட்டஉரிமை ஆவணங்கள் இல்லாத, 1.50 லட்சம் இந்தியர்கள், வெளியேற்றப்பட நேர்ந்தது. இருப்பினும், இந்த நடவடிக்கையினால், இந்தியர்களின் எண்ணிக்கை, சவுதி அரேபியாவில் குறையவில்லை. கடந்த ஆண்டு, 24 லட்சம் இந்தியர்கள் அங்கு இருந்தனர். அடுத்தடுத்த குடியேற்றத்தின் மூலம், இந்த ஆண்டு, 28 லட்சமாக, இந்தியர் எண்ணிக்கை உயர்ந்திருக்கிறது.

அதிகாரிகளுடன் ஆலோசனை:

இந்த சட்டம், கடந்த ஏப்ரல் மாதம் கொண்டு வரப்பட்டவுடன், மத்திய அரசின் உயர் மட்டக்குழு ஒன்று, சவுதி அரேபியாவுக்கு விரைந்து, அங்கு குடியேற்றத் துறை அதிகாரிகளுடன், ஆலோசனை நடத்தியது. இதனால், முறையான ஆவ ணங்கள் இல்லாமல் இருந்தாலும், இந்தியர்கள் அனைவரும், எந்தவிதமான துன்புறுத்தலுக்கும் ஆளாக்கப்படாமல், வெளியேற்றப்பட்டனர். அவர்களது வீடுகளில் நுழைந்து, இம்சிக்கும் நடவடிக்கைகள் தடுக்கப்பட்டிருக்கின்றன. முறையான ஆவணங்கள் இல்லாமல் இருக்கும் இந்தியர்களை அழைத்து வர, தூதரக அளவில் முயற்சிகள் மேற்கொள்ளப்பட்டிருக்கின்றன. இவ்வாறு, அமைச்சர் வயலார் ரவி, கூறினார்.

nandri : dinamalar