ஆந்திராவில் தனியார் பேருந்தில் பயங்கர தீ விபத்து: 44 பேர் பலி

ரேவதி · ரேவதி Wed 30 Oct 2013 - 14:34

ஆந்திராவில் இன்று அதிகாலையில் தனியார் சொகுசுப் பேருந்தில் ஏற்பட்ட தீ விபத்தில் பலியானோர் எண்ணிக்கை 44- ஆக அதிகரித்துள்ளது.

பெங்களூருவில் இருந்து ஹைதராபாத்துக்கு சென்று கொண்டிருந்த தனியார் பேருந்தில் இன்று அதிகாலை 4.30 மணியளவில் தீ பிடித்தது.

பேருந்து, மெகபூப் நகர் மாவட்டம், கோதக்கோட்டா என்ற ஊர் அருகே வந்த போது, சாலையின் நடுவே இருந்த தடுப்பில் பலமாக மோதியதில் எரிபொருள் டேங்க் வெடித்து விபத்து ஏற்பட்டதாக தெரிகிறது.

அதிகாலை நேரம் என்பதால் பெரும்பாலான பயணிகள் நல்ல உறக்கத்தில் இருந்துள்ளனர். திடீரென தீ பிடித்ததால் தப்பிக்க முடியாமல் 44 பயணிகள் உடல் கருகி பலியானதாக தெரிகிறது.

பேருந்தின் ஓட்டுநர், நடத்துனர் உள்பட 7 பேர் தீக்காயங்களுடன் தப்பித்தனர். பேருந்தில் 51 பேர் இருந்துள்ளனர். அவர்களில் பெரும்பாலானோர் ஆந்திரம் மாநிலத்தைச் சேர்ந்தவர்களே.

தீக்காயங்களுடன் தப்பித்த 7 பேர், அருகில் உள்ள வானாபார்தி அரசு மருத்துவமனையில் மருத்துவமனையில் சிகிச்சைக்காக அனுமதிக்கப்பட்டுள்ளனர்.

மூத்த போலீஸ் அதிகாரிகளும், வருவாய் துறையினரும் சம்பவ இடத்துக்கு விரைந்துள்ளனர். இந்தச் சம்பவத்தை தொடர்ந்து ஹைதராபாத் - பெங்களூரு சாலையில் போக்குவரத்து நெரிசல் ஏற்பட்டுள்ளது.

அடையாளம் காண்பதில் சிக்கல் :

விபத்தில் பலியான 44 பேரது உடலும் அடையாளம் காண முடியாத அளவிற்கு கருகியுள்ளதால், உடல்களை அடையாளம் காண்பதில் சிக்கல் ஏற்பட்டுள்ளது.

குளிர் சாதன பேருந்து என்பதால், பேருந்தில் தானியங்கி தாழ் போடப்பட்டிருந்த்து. இதனால் விபத்து நேர்ந்த போது கதவை திறப்பதில் சிக்கல் ஏற்பட்டுள்ளதாக காவல்துறை தெரிவித்துள்ளது.

பேருந்து விபத்து குறித்து விசாரணை நடத்தப்படும் என மாநில போக்குவரத்து அமைச்சர் போட்ஸா சத்யநாராயணா தெரிவித்துள்ளார். சம்பவ இடத்தை, மாநில தகவல் அமைச்சர் டி.கே.அருணா நேரில் பார்வையிட்டார்.

ஒய்.எஸ்.ஆர்.காங்கிரஸ் தலைவர் ஜெகன்மோகன் ரெட்டி, டி.ஆர்.எஸ். தலைவர் சந்திரபாபு நாயுடு ஆகியோர்,44 உயிர்களை பலி வாங்கிய பேருந்து விபத்து குறித்து தாங்கள் அதிர்ச்சி அடைந்துள்ளதாக தெரிவித்துள்ளனர்.

ஹெல்ப்லைன் எண்கள்:

ஆந்திர பேருந்து விபத்து குறித்து தகவல் அறிய ஹெல்ப்லைன் தொலைபேசி எண்கள் அறிவிக்கப்பட்டுள்ளன. 9494600100, 08542—245927, 245930, 245932 என்ற எண்களில் தொடர்பு கொண்டு தகவல்களை அறியலாம்.

விபத்தில் உயிர் பிழைத்தவர்கள் விபரம்:

ஸ்ரீகர் (ஹைதராபத்), ஜெய்சிங் (உத்தரபிரதேசம்), மஸர் பாஷா(பெங்களூரு), ஜோகேஷ்(பெங்களூரு) மற்றும் ராஜேஷ்(ஹைதராபத்). ஓட்டுநர் ஃபிரோஸ் மற்றும் நடத்துனர் ஃபியாஸ்.

The Hindu