தீபாவளி நிகழ்ச்சி தயாரிப்பில் சேனல்கள் தீவிரம்

nandagopal.d · nandagopal.d Fri Oct 25, 2013 8:52 pm

இந்த ஆண்டு தீபாவளி சிறப்பு நிகழ்ச்சிக்காக சேனல்கள் போட்டி போட்டுக்கொண்டு நிகழ்ச்சிகளை தயாரித்து வருகிறது. இந்த ஆண்டு நிகழ்ச்சி தயாரிப்பில் கடும்போட்டி நிலவி வருகிறது. காரணம் பண பலத்துடன் சில புதிய சேனல்களும் களம் இறங்க இருக்கிறது.

புதுப்படங்களின் சேனல் உரிமையை வாங்கி இருக்கும் சேனல்கள் அந்த படத்தின் நட்சத்திரங்கள் தங்கள் சேனலுக்கு மட்டும்தான் பேட்டி தரவேண்டும், தங்கள் நிகழ்ச்சியில்தான் பங்கேற்க வேண்டும் என்று ஒப்பந்தம்போட்டு அதன்படி நிகழ்ச்சி தயாரித்து வருகின்றன. எப்போதும்போல இந்த ஆண்டும் தீபாவளி சிறப்பு நிகழ்ச்சியை திரைப்பட நிகழ்ச்சிகள் ஆக்கிரமித்துக் கொள்ளும்.

வழக்கம்போல ஆஸ்தான நிலைய வித்வான்களை வைத்து எல்லா சேனல்களும் சிறப்பு பட்டி மன்றங்களை நடத்தி வருகிறது. இதில் சம்பளம் பெறாத ஜூனியர் ஆர்ட்டிஸ்டுகளாக பொதுமக்கள் நடித்து வருகிறார்கள்.

புதிய திரைப்படங்களையும் போட்டிபோட்டு ஒளிபரப்ப இருக்கிறார்கள். தாங்கள் என்ன படம் ஒளிபரப்பலாம் என்பதை விட அடுத்த சேனல் என்ன படம் ஒளிபரப்ப இருக்கிறது என்பதை துப்பறிவதில்தான் எல்லா சேனல்களும் ஈடுபட்டிருக்கிறது. அனேகமாக எல்லா சேனல்களிலும் புத்தம்புது திரைப்படங்கள் அணிவகுக்கும்.

சில சேனல்கள் ஒருபடி மேலேபோய் சிறப்பு பேட்டி அளிக்க ஒப்புக் கொள்ளும் நடிகர் நடிகைகளுக்கு விலை உயர்ந்த பரிசு பொருட்களோ இல்லாவிட்டால் பெரும் தொகையையோ சன்மானமாக கொடுக்கின்றன. இதனால் பணமோ பரிசு பொருளோ தராத சேனல்களுக்கு பேட்டி தராமல் தவிர்த்து விடுகிறார்கள் நடிகர் நடிகைகள்.

பலகோடி புரளும் இந்த தீபாவளி சிறப்பு நிகழ்ச்சி தயாரிப்பை பார்த்து மிரண்டுபோயிருக்கிறது சிறிய சேனல்கள். அவர்களும் தங்கள் பங்கிற்கு சின்ன சின்ன நடிகர்களை வைத்து ஏதோ நிகழ்ச்சிகளை தயாரித்துக் கொண்டிருக்கிறார்கள். டப்பிங் படங்கள், அல்லது மக்கள் கவனத்துக்கே வராத சிறிய படங்களை வாங்கி ஒளிபரப்ப இருக்கிறார்கள்.

சேனல்களின் போட்டியால் ரசிகர்களுக்கு கொண்டாட்டமாக இருந்தாலும். கோடிக் கணக்கில் செலவு செய்து நிகழ்ச்சி தயாரித்து வழங்கிவிட்டு அந்தப் பணத்தை நம் பாக்கெட்டில் இருந்து வேறு வழியில் எடுக்கப்போகிறார்கள் என்பது தெரியாமல் நம் மக்களும் தீபாவளி முழுவதையும் டி.வி.பெட்டிமுன் அமர்ந்து கொண்டாட இருக்கிறார்கள்.

நன்றிகள் :சினிமா தினமலர்

**M.M.SENTHIL** · **M.M.SENTHIL** Fri Oct 25, 2013 9:51 pm

இந்த டிவி வந்தவுடன் எந்த பண்டிகையும், பண்டிகைபோல் தெரியவில்லை. உறவுகள் ஒன்று கூடி கதை பேசி திரிந்ததெல்லாம் அந்தகாலம். இப்போது, பண்டிகை என்றாலே எந்த சேனலில் எந்த படம் என்றுதான் மனம் பார்க்கிறது.