கூடங்குளம் அணுஉலையில் வெற்றிகரமாக மின் உற்பத்தி துவங்கியது

திருநெல்வேலி: கூடங்குளம் அணுமின் நிலையத்தின் முதலாவது அணுஉலையில் 75 மெ.வா., மின் உற்பத்தி துவங்கியது.அதிகாலை 2.45 மணிக்கு மின் உற்பத்தி துவங்கியதாக அணுமின் வளாக அதிகாரி சுந்தர் தெரிவித்தார்.

கூடங்குளம் அணுமின் நிலையம்:

தென்னிந்தியாவில் நிலவி வரும் மின்சார தட்டுப்பாட்டை சரிசெய்வதற்காக மத்திய அரசு, ரஷ்யாவுடன் இணைந்து ரூ.1700 கோடி முதலீட்டில் கூடங்குளத்தில் அணுமின் நிலையத்தை நிறுவியது. சுமார் 1000 மெகாவாட் மின்உற்பத்தி திறன் கொண்ட இந்த அணுமின் நிலையத்தில் உற்பத்தி செய்யப்படும் மின்சாரம் தமிழகம், கேரளா, கர்நாடகா, புதுச்சேரி ஆகிய மாநிலங்களுக்கு மத்திய மின்தொகுப்பு பகிர்வின் மூலம் பகிர்ந்தளிக்கப்படும் என மத்திய அரசு தெரிவித்தது. கூடங்குளம் அணுஉலை பாதுகாப்பாற்ற நிலையில் உள்ளதாக கூடங்குளம் எதிர்ப்பு குழுவினர் பல்வேறு போராட்டங்களை நடத்தினர். இருப்பினும் மத்திய அணுசக்தி ஒழுங்குமுறை ஆணையம் பல்வேறு கட்ட சோதனைகளை நடத்தி, அணுஉலையின் பாதுகாப்பை உறுதி செய்தது.

மின் உற்பத்தி துவக்கம்:

மத்திய அரசு, திருநெல்வேலி மாவட்டம் கூடங்குளத்தில் தலா 1000 மெகா வாட் மின் உற்பத்தித்திறன் கொண்ட இரண்டு அணு உலைகளை அமைத்துள்ளது.அணு மின் நிலைய கட்டுமான பணி முடிந்து, மின் உற்பத்தி துவங்கும் நேரத்தில் இதற்கு எதிராக அயல்நாட்டு உதவி பெறும் சில விஷமிகள் நடத்திய போராட்டத்தால் மின் உற்பத்தி துவங்குவதில் தாமதம் ஏற்பட்டது. பின், போராட்டத்தை முடிவுக்கு கொண்டு வர, தமிழக அரசு ஒத்துழைப்பு வழங்கியதை அடுத்து, மின் உற்பத்திக்கான பணிகள் மேற்கொள்ளப்பட்டு வருகின்றன.

படிப்படியாக உற்பத்தி அதிகரி்க்கப்படும்:

முன்னதாக,அணு உலையில் உள்ள ஒவ்வொரு சாதனமும் எப்படி செயல்படுகிறது என கண்காணிக்கப்பட்டது. மேலும், மின் உற்பத்திக்கு பயன்படுத்தப்படும் தண்ணீர், உயர் அழுத்தம் மூலம் நீராவியாக மாற்றி, மீண்டும் தண்ணீராக மாற்றப்படுகிறது.இதில், முதல் அணுஉலையில், "கிரிட்டிக்காலிடி' எனப்படும், மின்உற்பத்திக்கான ஆரம்ப கட்ட பணிகள், ஜூலை 13ல் துவங்கின. அந்த அணுஉலையில் ஆகஸ்ட் இறுதிக்குள் மின்உற்பத்தி துவங்கப்படுமென அணுசக்திதுறை உயரதிகாரிகள் தெரிவித்தனர். ஆனால், அறிவித்தபடி துவங்கப்படவில்லை. இந்நிலையில் மின் உற்பத்தி துவங்குவதற்கான பணிகள், இறுதி கட்டத்தை எட்டிய நிலையில் நள்ளிரவு 2.45 மணிக்கு மின் உற்பத்தி துவங்கியது.முதலில் 75 மெகாவாட்டாக உற்பத்தி செய்யப்பட்டு பின்னர் படிப்படியாக மின் உற்பத்தி அதிகரிக்கப்படும். நெல்லை அருகே உள்ள அபிஷேகப்பட்டி பகுதியில் உள்ள மத்திய மின்தொகுப்புடன் இணைத்து மின்சாரம் அனுப்பும் பணியும் நடைபெற்று வருகிறது என அணுமின் வளாக இயக்குனர் ஆர்.எஸ்.சுந்தர் தெரிவித்துள்ளார்.

     

பாதுகாப்பு விதிகளை  சரியானமுறையில் கண்காணித்து , மின் உற்பத்தி செய்து ,மக்கள் நம்பிக்கையை பெற்று, கூடங்குளம் , யாவரும் கூடும்களம் ஆக ஆசை. மக்கள் நலமும் முக்கியம் மக்கள் நலமாக வாழ மின்சாரமும் முக்கியம்.

ரமணியன்

படிப்படியாக அதிகரிச்சி நிறைய மின்சாரம் கிடைக்கவேன்டும்