இராவணன் வழிபட்ட தலம்!

சப்தரிஷிகள் வழிபட்ட சப்தரிஷீஸ்வரர் திருச்சிராப்பள்ளி மாவட்டம், துறையூர்க்கு அருகில், திருத்தலையூர் என்ற ஊரில் அருள்புரிகிறார்.

ராவணேஸ்வரன் இலங்கையிலிருந்து கயிலாயத்திற்கு வான்மார்க்கமாக சென்று வழிபடுவதை வழக்கமாகக் கொண்டிருந்தான். அப்படிச் செல்கையில் ஒருநாள், திருத்தலையூரில் ரிஷிகள் சிவனை பிரதிஷ்டை செய்து வழிபடுவதைக் கண்டான். தானும் வழிபட நினைத்து திருத்தலையூருக்கு வந்தான். அவனைக் கண்ட ரிஷிகள் அஞ்சி, அருகிலிருந்த மருதமரத்தில் ஐக்கியமடைந்தார்கள். பிறகு இராவணன் தனியாக ஒரு லிங்கத்தை புற்று மணலில் பிரதிஷ்டை செய்து, வஸ்திரம், பூ, மாலை, பழங்கள் என படைத்து வழிபட்டான். ஆனால் அவன் தரையில் வீழ்ந்து வணங்கி எழும்போது சிவலிங்கம் மறைந்துவிட்டது.

இதனால் வருத்தமடைந்த ராவணனிடம், ""ரிஷிகள் சிவலிங்கத்திற்கு சித்ரான்னங்கள் வைத்து பூஜை செய்தார்கள். எனவேதான் நான் அவர்களுக்குக் காட்சியளித்தேன்'' என்று அசரீரியாக ஒலித்தான் இறைவன். இதனால் வருந்திய ராவணன், இறைவனைக் காண ஆவல் கொண்டு யாகம் வளர்த்தான். நெருப்பில் தனது ஒவ்வொரு தலையாகக் கிள்ளி எறிந்தான். பத்தாவது தலையைக் கிள்ளும்போது இறைவன் காட்சியளித்தார். இவ்வாறு ராவணன் ஒவ்வொரு தலையாகத் திருகியதால் இத்தலத்திற்கு திருகுதலையூர் என்ற திருநாமம் ஏற்பட்டதாக வரலாறு. இதுவே மருவி திருத்தலையூர் என்று அழைக்கப்படுகிறது.

மேலும் ருத்ரபசுபதி நாயனார் முக்தியடைந்த தலமாகவும் இது கருதப்படுகிறது. இத்தகைய சிறப்பு வாய்ந்த இத்தலத்தில் அருளும் சப்தரிஷீஸ்வரர் ஆலயம் மிகவும் சிதிலமடைந்துள்ளது. தற்போது திருப்பணிகள் நடந்துகொண்டிருக்கின்றன. தகவலுக்கு: 97903 29346 - தினமணி