மதுரை மீனாட்சி அம்மன் கோயிலில் 108 வீணை வழிபாடு!

**சாமி** · **சாமி** Tue Oct 15, 2013 10:14 am

மதுரை அருள்மிகு மீனாட்சி சுந்தரேசுவரர் கோயிலில் விஜயதசமியை முன்னிட்டு 108 வீணை வழிபாடு திங்கள்கிழமை நடைபெற்றது.

அருள்மிகு மீனாட்சி சுந்தரேசுவரர் கோயிலில் கடந்த 5-ஆம் தேதி முதல் நவராத்திரி கலை விழா கொலு தொடங்கியது. அம்மன் சன்னதி வெளிப்பிரகாரத்தில் அமைக்கப்பட்ட கொலுவில் 16 அரங்கங்கள் அமைக்கப்பட்டன. சர்வபக்தி மயம் எனும் பொருளில் அமைக்கப்பட்ட கொலுவில் சித்திரைத் தேரோட்டம் உள்ளிட்டவை பக்தர்களின் வரவேற்பைப் பெற்றது.

தினமும் மாலையில் அம்மன் சிறப்பு அலங்காரத்தில் எழுந்தருளி பக்தர்களுக்கு அருள்பாலித்தார். கடந்த 9 நாள்களாக நடைபெற்ற கொலு அலங்காரத்தின் நிறைவாக திங்கள்கிழமை பகலில் அம்மன் உச்சிக்கால பூஜை வேளையில் அம்மன் சன்னதியிலிருந்து புறப்பாடாகி ராணிமங்கம்மாள் சன்னதியில் எழுந்தருளினார். அங்கு அபிஷேகம், அலங்காரம் நடைபெற்றது.

பின்னர் மாலையில் அங்கிருந்து புறப்பாடாகிய அம்மன் சுவாமி சன்னதி இரண்டாம் பிரகாரத்தை வலம் வந்து சன்னதியை அடைந்தார்.

விஜயதசமியை முன்னிட்டு கோயில் வளாகத்தில் உள்ள பழைய திருக்கல்யாண மண்டபத்தில் வீணை வழிபாட்டு மன்றம் சார்பில் 108 வீணை வழிபாடு மாலையில் நடைபெற்றது. இதில் வீணை இசைப் பேராசிரியர்கள், மாணவ, மாணவியர் வீணையுடன் பங்கேற்றனர். அம்மன் பக்திப் பாடல்களை 108 வீணையிலும் ஒரே நேரத்தில் வாசித்தது மெய்சிலிர்க்க வைத்தது.

இதில் வீணை வழிபாடு மன்றம், வேதமன்றம், வேணுகானம் குழல் இசை சங்கம், மதுரை நாட்டியாஞ்சலி குழுமம் ஆகியவை பங்கேற்றன.

பின்னர் மதுரை கண் மருத்துவர் ஜி.பாஸ்கரன் புல்லாங்குழலில் தமிழிசை நிகழ்ச்சி நடைபெற்றது. அதன்பின்னர் புவனேஸ்வரியின் பரதநாட்டியம் நிகழ்ந்தது. நிகழ்ச்சியில் ஆயிரக்கணக்கான பக்தர்களும், கோயில் இணை ஆணையர் பி.ஜெயராமன், வழிபாடு மன்றம் சின்னதுரை உள்ளிட்டோர் கலந்துகொண்டனர்.

மதுரை மீனாட்சி அம்மன் கோயிலில் 108 வீணை வழிபாடு!

மதுரை மீனாட்சி அம்மன் கோயிலில் 108 வீணை வழிபாடு!

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக