நரேந்திர மோடி18ம் தேதி சென்னை வருகிறார்!

பா.ஜ., பிரதமர் வேட்பாளர் நரேந்திர மோடி, வரும், 18ம் தேதி சென்னை வரவுள்ளார். அப்போது, தமிழகத்தில் எந்த கட்சியோடு கூட்டணி வைத்துக் கொள்வது என்பது குறித்து, அவர், மாநில நிர்வாகிகளோடு விவாதிக்கக் கூடும் என, கூறப்படுகிறது. இதனால், அவருடைய வருகை அரசியல் வட்டாரங்களில் மிகுந்த எதிர்பார்ப்பை ஏற்படுத்தி உள்ளது.

கடந்த செப்டம்பர் 26ம் தேதி, திருச்சியில் நடந்த இளந்தாமரை மாநாட்டில் மோடி பங்கேற்றதால், லட்சக்கணக்கான இளைஞர்கள், அவர் பேச்சைக் கேட்க திரண்டனர். இது தமிழக அரசியல் கட்சிகள் மட்டுமன்றி, பா.ஜ.,வையே ஆச்சரியப் படுத்தியது. இதனால், பா.ஜ., தமிழக அரசியல் கணக்குகளில் தற்போது சேர்க்கப்பட்டு வருகிறது. அதோடு, பா.ஜ., எந்த தமிழக கட்சியோடு கூட்டணி அமைக்கும், என்ற எதிர்பார்ப்பும் அரசியல் வட்டாரங்களில் எழுந்து உள்ளது. இதன் எதிரொலியாகத் தான், தி.மு.க., தலைவர் கருணாநிதியும், ஏற்காடு இடைத் தேர்தலுக்கு பா.ஜ., ஆதரவை கேட்டு அந்த கட்சிக்கு, நேற்று முன்தினம், கடிதம் அனுப்பி இருந்தார்.

இந்த சூழலில், வரும் 18ம் தேதி மாலை, மோடி சென்னை வருகிறார்.மயிலாப்பூர் மியூசிக் அகடமி அரங்கில் நடக்கும், நானி பல்கிவாலா அறக்கட்டளை நிகழ்ச்சியில், அவர் கலந்து கொண்டு, அருண் ஷோரி எழுதியுள்ள நூலை வெளியிடுகிறார். இந்த நிகழ்ச்சிக்காக, 18ம் தேதி, மாலை 6:00 மணிக்கு சென்னை வரும் மோடி, நிகழ்ச்சியை முடித்து, அன்று இரவே திரும்பும் வகையில் நிகழ்ச்சி ஏற்பாடு செய்யப்பட்டு உள்ளது.ஆனால், மாநில பா.ஜ., நிர்வாகிகள், மோடியுடன், லோக்சபா தேர்தல் குறித்த ஆலோசனை நடத்த வேண்டும் என, பா.ஜ., தேசிய தலைவர் ராஜ்நாத் சிங்கிடம் தெரிவித்து உள்ளனர். இந்த தகவல் மோடிக்கு தெரிவிக்கப்பட்டு உள்ளதாகவும், அவர் பயண ஏற்பாடுகளை மாற்றுவது குறித்துபரிசீலித்து வருவதாகவும் கூறப்படுகிறது.

மோடியின் பயண ஏற்பாடுகள் மாறினால், அவர், மாநில பா.ஜ., நிர்வாகிகளோடு கூட்டணி குறித்து விவாதிப்பதோடு, மற்ற தமிழக அரசியல் கட்சி நிர்வாகிகள் சிலரையும் சந்திக்க வாய்ப்பு உள்ளதாக, பா.ஜ., வட்டாரங்கள் தெரிவித்தன. மோடி வருகைக்கு, இன்னும் 10 நாள் அவகாசம் இருப்பதால், அதற்குள் எதுவும் நடக்கலாம் என்கின்றனர், பா.ஜ., நிர்வாகிகள்.

தினமலர்

வாருங்கள் எதிர்கால இந்தியாவே