இலங்கையில் வடக்கு மாகாண முதல்-மந்திரியாக விக்னேஸ்வரன் இன்று பதவி ஏற்பு

by **டார்வின்** Mon Oct 07, 2013 5:35 pm

இலங்கையில் வடக்கு மாகாண முதல்-மந்திரியாக விக்னேஸ்வரன் இன்று (திங்கட்கிழமை) பதவி ஏற்கிறார். அவருக்கு இலங்கை அதிபர் ராஜபக்சே பதவிப்பிரமாணம் செய்து வைக்கிறார். இலங்கையில் விடுதலைப்புலிகளுடனான போர் முடிவடைந்து 25 ஆண்டுகளுக்கு பின்னர் முதல் முறையாக நடந்த வடக்கு மாகாண கவுன்சிலுக்கு கடந்த மாதம் 21-ந்தேதி தேர்தல் நடந்தது.

இதில் தமிழ் தேசிய கூட்டமைப்பு மொத்தம் உள்ள 38 இடங்களில் 30 இடங்களை பெற்று வரலாற்று சிறப்பு மிகு வெற்றி பெற்றது. இதைத்தொடர்ந்து தேர்வு பெற்ற உறுப்பினர்கள் வடக்கு மாகாண முதல்-மந்திரியாக விக்னேஸ்வரனை தேர்ந்து எடுத்தனர். இவர், முன்பு இலங்கை சுப்ரீம் கோர்ட்டு நீதிபதியாக பதவி வகித்தவர்.

வடக்கு மாகாண முதல்-மந்திரியாக 73 வயதான விக்னேஸ்வரன் இன்று (திங்கட்கிழமை) பதவி ஏற்கிறார். இலங்கை அதிபர் ராஜபக்சே அலுவலகத்தில் நடைபெறும் பதவி ஏற்பு விழாவில், அவருக்கு ராஜபக்சே பதவிப்பிரமாணம் செய்து வைக்கிறார்.

ஆனால் இந்த பதவி ஏற்பு விழாவில் தமிழ் தேசிய கூட்டணி தலைவர்கள் யாரும் பங்கேற்க மாட்டார்கள் என தெரிகிறது. விக்னேஸ்வரனுக்கு இலங்கை அதிபர் ராஜபக்சே பதவிப்பிரமாணம் செய்வது பெரும்பாலான தமிழ் தேசிய கூட்டமைப்பினர் விரும்பவில்லை.

இதனால் அவர்கள் பதவி ஏற்பு விழாவை புறக்கணிப்பதாக அறிவித்து உள்ளனர். ஆனாலும் நல்லெண்ண அடிப்படையில் இலங்கை அதிபர் முன்னிலையில் விக்னேஸ்வரன் பதவி ஏற்பார் என தமிழ் தேசிய கூட்டணி தலைவர் ஒருவர் தெரிவித்தார்.
மாலைமலர் ,,