6 ஆம் நூற்றாண்டைச் சேர்ந்த புத்தர் சிலை கண்டுபிடிப்பு

புதுக்கோட்டை அருகே கவிநாடு கண்மாயில் கி.பி. ஆறாம் நூற்றாண்டைச் சேர்ந்த அரிய புத்தர்சிலையை புதுகை அரசு மன்னர் கல்லூரி வரலாற்றுத்துறை பேராசிரியர் அ.சந்திரபோஸ் மற்றும் காந்திய கிராம வளர்ச்சி ஆராய்சி அறக்கட்டளையின் மேலாண்மை இயக்குநர் கே.எம்.சுப்பிரமணியம் ஆகியோர் அண்மையில் கண்டுபிடித்துள்ளனர்.

இது குறித்து அவர்கள் கூறிய தகவல்: வௌ்ளாற்றுடன் இணைந்த கவிநாடு கண்மாய் ஆயிரம் ஏக்கர் பாசன வசதி கொண்ட மாவட்டத்திலேயே மிகப்பெரிய ஏரியாகும்.

இப்புத்தரின் உடைந்த தலை, உடல் மற்றும் கைகள் நீண்ட காலமாக கண்மாய் நீருக்குள் புதையுண்டிருந்தன. இதனால் ஆராய்சியாளர்கள் கண்களுக்கு தென்படாமல் இருந்து வந்துள்ளது. கவிநாடு உடற்பயிற்சிக் கழகத்தில் பயிற்சி பெற்றுவரும் மாணவர்கள் கண்மாயில் குளிக்கும் போது தென்பட்ட இச்சிலையின் தலை மற்றும் உடல் பகுதிகளைக் கண்டெடுத்து கரையில் போட்டுள்ளனர்.

கரை ஓரமாக கிடக்கும் கற்குவியலுடன் இருந்த புத்தர் சிலையின் இடுப்பிற்குக் கீழ் உள்ள பகுதியுடன் குளத்தில் கண்டெடுக்கப்பட்ட உடல் மற்றும் தலைப் பகுதிகளை இணைத்தபோது அது பொருத்தமாக அமைந்தது. இன்னும் உடைந்த கைகளின் பகுதிகள் தண்ணீருக்குள் கிடக்கலாம் என மாணவர்கள் கூறுகின்றனர். புத்தர் சிலையின் உயரம் மூன்றரை அடி. பீடத்தின் அகலம் மூன்றேகால் அடி. வழக்கமான தியான நிலையில் புத்தர் அமர்ந்துள்ளார். உருண்டையான தலையும் நீண்ட காதுகளும் இச்சிற்பத்தின் சிறப்புகளாகும். வழக்கமாக புத்தர் சிலையில் இருக்கும் உஸ்நிஸ் (கொம்பு) இதில் இல்லை. சுருள்முடி தலையை அலங்கரிக்கின்றது.

கவிநாடு கண்மாயின் காவலர்களாக உள்ள தொடுவாய் பிள்ளையார், கருப்பர், ஏழுகண்ணிமார் ஆகிய கடவுளர்களைப்பற்றிக் குறிப்பிட்டுள்ள வரலாற்று ஆய்வாளர்கள் என்.தினகரன் மற்றும் கே.ஆர்.வெங்கடராம அய்யர் ஆகியோர் இப்புத்தர் சிலை பற்றி எதுவும் கூறவில்லை.

புதுக்கோட்டை மாவட்டத்தில், கரூர், வள்ளனூர், வன்னிச்சிப்பட்டிணம், ஆலங்குடிபட்டி, செட்டிபட்டி, சுந்தரபாண்டியன்பட்டிணம் ஆகிய ஆறு இடங்களில் புத்தர் சிலை இருந்ததாகக் குறிப்புகள் உள்ளன. எனவே, கவிநாடு கண்மாயில் கிடைத்த புத்தர் கற்சிலை புதிதாகக் கண்டுபிடிக்கப்பட்ட ஒன்றாகும். மேலும் மற்ற இடங்களில் கிடைத்த சிற்பங்களைவிட இது காலத்தால் மிகப்பழமையானது. மகேந்திரவர்மன் காலத்திற்கு முந்தைய சிற்பமாக இதைக் கருத முடியும்.

இப்புத்தர் சிலை அருகே பழங்கால மக்கள் பயன்படுத்திய நீல நிறக் கல்மணி ஒன்றும் கிடைத்துள்ளது மேலும் சிலையின் அருகில் சிதறிக்கிடக்கும் கருங்கற்கள் இவ்விடத்தில் ஒரு கோயில் இருந்ததைக் காட்டுகின்றன.

புதுக்கோட்டையில் ஆலங்குடிபட்டி, செட்டிபட்டி ஆகிய இடங்களில் இருந்த புத்தர் சிலை தற்போது அவ்விடத்தில் காணவில்லை. எனவே, கவிநாடு கண்மாயில் கண்டெடுக்கப்பட்டுள்ள புத்தர் சிற்பத்தை பாதுகாக்க தமிழக அரசு நடவடிக்கை எடுக்க வேண்டும் என்றனர்.

இத்தனை ஆண்டுகள் கன்மாயில் இருந்திருக்கிறதே. அரிய கண்டுப்பிடிப்பு

ஆறாம் நூற்றாண்டு புத்தர்.. ஆச்சரியமான தகவல் தான்.. நன்றி

போதி மரத்தடியில் ஞானம் கிடைத்த புத்தர்
ஆசையே அழிவிற்கு காரணம் என்ற புத்தர்
இப்போது கண்மாயில் சிலையாய் கண்டெடுக்கப்பட்டுள்ளார்
ஆறாம் நூற்றாண்டு சிலை வடிவில்.

இது ஆறாம் நூற்றாண்டு சிலை என்று எப்படி சோதிக்காமலேயே கண்டுபிடித்தார்கள்

ராஜா wrote:இது ஆறாம் நூற்றாண்டு சிலை என்று எப்படி சோதிக்காமலேயே கண்டுபிடித்தார்கள்

பக்கத்திலேயே எழுதிவைத்துவிட்டு புத்தர் சிலை உட்கார்ந்திருக்குமோ?

ராஜா wrote:இது ஆறாம் நூற்றாண்டு சிலை என்று எப்படி சோதிக்காமலேயே கண்டுபிடித்தார்கள்

சிற்பங்கள் செதுக்கப்பட்ட வடிவமைப்பை வைத்தே தோராயமாக அதன் ஆண்டைக் கணக்கிடுவார்கள் என நினைக்கிறேன் தல!