வருத்தப்படாத வாலிபர் சங்கம் - சினிமா விமர்சனம்

படத்தின் தலைப்பே 'கதை, நீதி எல்லாம் பெரிதாய் எதிர்பார்த்து வராதீர்கள். சும்மா கொஞ்ச நேரம் ஜாலியாக சிரித்து விட்டுப் போங்கள்.' என்பதைச் சொல்லாமலே சொல்லிவிடுகிறது.

அப்புறம் என்ன? சிவகார்த்திகேயன், சூரி இரண்டு நகைச்சுவைத் துப்பாக்கிகளோடு சத்யராஜின் நிஜத் துப்பாக்கியும் இருப்பதால் கலகல மழையில் தாராளமாக நனைந்து விட்டு வரலாம்.

கதை?

மகள், காதல் திருமணம் செய்து கொண்டால், தன் காதை அறுத்துக் கொள்ள வேண்டிய கட்டாயத்தில் இருக்கிறார் சத்யராஜ். எதிர்பார்த்தது போல் மகள், காதல் வலையில் விழுந்துவிட, காதலர்களை மலை மேல் குடி வைத்துவிட்டு, அவர்களைக் கொலை செய்து விட்டதாய் சீன் போடுகிறார். க்ளைமாக்ஸில் என்ன? உண்மை தெரிந்து, சத்யராஜின் காது காணாமல் போவதுதான் வ. வா.ச! இயக்கம், பொன்ராம்.

சிவகார்த்திகேய்ன வழக்கம்போல் நக்கல்களால் நகைக்க வைக்கிறார். கூட சூரி வேறு கவுன்ட்டர் கொடுப்பதால் கலகல கல்லா கட்டுகிறது. காதலிக்குக் கல்யாணம் என்ற பரபரப்பான நிலையில் காதலியிடமிருந்து ஒரு சிறுமி ஓடி வந்து ''அக்கா கூப்பிடறாங்க'' என்று சிவாவிடம் சொல்ல, ''அப்படியா உங்க அக்கா நல்லா இருப்பாங்களா?'' என்று கேஷுவலாகக் கேட்கும்போது தியேட்டர் கிழிகிறது! சிவாவும் சூரியும் பயங்கரமாய் சண்டை போட, குறுக்கே போகும் ஓர் ஆசாமி, ''ஓரமாப் போய் விளையாடுங்கப்பா.'' என்று அஸால்ட்டாகக் கூற, இருவரும் அதிர்ந்து போகும் காட்சி செமை.

புதுமுகம் ஸ்ரீதிவ்யா முகத்தில் ஆவின் பால் வழிகிறது. ஸ்கூல் யூனிஃபார்மில் சாதாரணமாய் இருந்தவர், நம் ஊர் புடவையைக் கட்டியதும் பால்கோவாவாய் மாறிவிடுகிறார்.

கையில் எப்போதும் துப்பாக்கியுடன் சத்யராஜ். கொஞ்சம் அடக்கி வாசித்திருப்பது தெரிகிறது. ஏன் தலைவா? அவர் கூடவே இருக்கும் அந்த நான்கு அல்லக்கைகளும் எரிச்சலைக் கிளப்பிக் கொண்டேயிருக்கிறார்கள்.

ஸ்ரீதிவ்யாவின் கால்களை சிவா ரசிக்கும்போது சூரினயும் ஜொள்ளுவிட, முறைக்கும் சிவாவிடம், 'ஓசியில் ஓடற படத்தை யார் பார்த்தா என்ன?' என்று புலம்புவது பலே! வசனம், ராஜேஷ்!

'ஊதா கலரு ரிப்பன்' பாடலும், 'இந்தப் பொண்ணுங்களே' பாட்டும் பட்டையைக் கிளப்புகிறது. இமான்!!

சத்யராஜின் மனம் மாறவேண்டும் என்பதற்காக ஒரு பசுமாட்டை கிணற்றில் இறக்கி கொடுமைப்படுத்தியிருக்க வேண்டாம்.

பத்து நிமிடமே வந்தாலும் பிந்து மாதவி கண்ணால் சொக்கவைக்கிறார்.

வருத்தத்தை மறக்கலாம்.

 குமுதம்

படம் நல்லாவே இருந்தது சிவகார்த்திகேய்னகாக இன்னொரு முறை பார்க்கலாம்   

பத்து நிமிடமே வந்தாலும் பிந்து மாதவி கண்ணால் சொக்கவைக்கிறார். wrote:

ஆமாம் தல ...ஒரு விதத்தில் சில்க் ஸ்மிதா மாதிரி இருக்குகிறார்

நைட்டு ஒரு பத்து நண்பர்கள் சேர்ந்து தண்ணி அடிச்சு தூங்காம கலாட்டா பண்ணி சிரிச்சுட்டு இருப்பது மாதிரி தான் கதை - விடிஞ்சா போதையும் போச்சு என்ன ஆட்டம் ஆடினோம்ன்னும் தெரியாது. அது மாதிரி பீல் தான் இந்தப் படம் பார்த்தது. வெளில வந்து யோசிச்சா ஒண்ணுமே இல்லை.

வருத்தம் போக்கும் பொருத்தம் இந்த வருத்தபடாத வாலிபர் சங்கம் ...

நானும் பாத்தேனுங்க அம்பூட்டு பெருசா சொல்லிக்கிற மாதிரி இல்ல.

ஒரு தடவ பாக்கலாம்

பார்த்தேன் பார்த்தேன்னு சொல்றிங்க
படத்தோட லிங்க காணோம்

vishwajee wrote:பார்த்தேன் பார்த்தேன்னு சொல்றிங்க
படத்தோட லிங்க காணோம்

அட தேடிப்பாருங்க நன்பரே இருக்க்க்க்க்க்க்க்கும்.

மேல பேசுனவுங்க எல்லாம் தியேட்டர்ல பாத்ததைன்னு நெனக்கிறேன்  

வாழ்க வாழ்க

படத்தில் ஒண்ணுமே இல்லைன்னு கேள்வி பட்டேன்....