தோற்கப் பழகுவோம்...!!! (Mano Red)

by Mano Red Mon Sep 30, 2013 4:07 pm

தோல்வி தரும் சோகத்தினை
தோளில் சுமந்து நிற்கையில்,
வேட்கையுடன் வெற்றிக்கனி பறிக்க
விடாமுயற்சியுடன் வா நண்பா
தோற்கப் பழகுவோம்..!!

இன்னல்கள் கூடி வந்து
இகழ்ந்து சிரித்தாலும்,
இறப்பு கண்முன்னே
இழிவாய் நின்றாலும்,
தோல்வி கண்டு பயம் வேண்டாம்
தோற்கப் பழகுவோம்..!!

முதல் முயற்சியிலே
முழு வெற்றியென்பது,
அனுபவமில்லா ஆசிரியனிடம்
அரைகுறையாய் பயின்றதற்குச் சமம்..!!
நல்ல தோல்விகள் தரும்
நன் மந்திரம் கற்க
தோற்கப் பழகுவோம்..!!

கசக்கும் தோல்வி நிலையை
களிப்புடன் ஏற்கும் போது,
இனிக்கும் வெற்றி வந்து
இனிமையுடன் கை கோர்க்கும்..!!
தட்டிப் பறிக்கும் வெற்றி வேண்டாம்
தனித்துவம் பெற்றுத் திகழ
தோற்கப் பழகுவோம்...!!

விட்டுகொடுக்கும் நட்பையும்,
வினையின் போது
விட்டுவிலகும் நட்பையும்,
வெளிக்கொணர்வது தோல்வியே..!!
தீய நட்பிலிருந்து விலகி
தீங்கில்லா உண்மை நட்பறியத்
தோற்கப் பழகுவோம்..!!!

சிந்தனையில் தீமூட்டவும்,
சிறு மூளையை கிளறிவிடவும்,
அதிசிறந்த திட்டமிடவும்,
அறிவுச் சுடரை புதுப்பிக்கவும்,
அவகாசம் தரும் தோல்வியை ஏற்றுத்
தோற்கப் பழகுவோம்...!!!

கடந்து போகும் தோல்வி கண்டு
துவண்டு விட வேண்டாம்..!!
தற்காலிகமான தோல்வியின் வலி
தன்னிகரில்லா வெற்றிக்கு வழி..!!
வெற்றியென்பது மரமெனில்
தோல்வியே அதன் விதை..!!
தொடர் வெற்றி பெற நன்றாகத்
தோற்கப் பழகுவோம்...!!

by **ஜாஹீதாபானு** Mon Sep 30, 2013 4:21 pm

அருமை மனோ ரெட்

by Mano Red Mon Sep 30, 2013 4:24 pm

மிக்க மகிழ்ச்சி மேடம்..!!!உங்களின் ஊக்குவித்தல்க்கு நன்றி ...

by **சிவா** Mon Sep 30, 2013 4:55 pm

தங்களின் கவிதைகள் அனைத்தும் முத்துக்கள் மனோ!

ஆனால் இங்கு தங்களின் பதிவுகளை மட்டும் பதிவிடாமல் மற்றவர்களின் பதிவுகளையும் படித்து பின்னூட்டம் எழுது ஊக்குவியுங்கள்! அப்பொழுதுதான் தங்களின் படைப்புக்களும் மற்றவர்களால் கவனிக்கப்படும்!

by **ஜாஹீதாபானு** Mon Sep 30, 2013 4:56 pm

சிவா wrote:தங்களின் கவிதைகள் முத்துக்கள் மனோ!

ஆனால் இங்கு தங்களின் பதிவுகளை மட்டும் பதிவிடாமல் மற்றவர்களின் பதிவுகளையும் படித்து பின்னூட்டம் எழுது ஊக்குவியுங்கள்! அப்பொழுதுதான் தங்களின் படைப்புக்களும் மற்றவர்களால் கவனிக்கப்படும்!