ஆசிரியர் தினம்

ஸ்டீபன் தேவராஜ் · 10/09/2013

ஆசிரியர் தினம்
----------------------------------------
தன் பிறந்த நாளை கொண்டாட,
தாரை, தப்பட்டை, ஊதுகிறான் இன்று....!
கட் அவுட் வைத்து, கலர் கலராய்,வெடி வெடித்து,
கலக்குகிறான் ஊரை...!
இந்த புகழ் என்றும் நிலைத்திடுமா?!

இல்லை.....

காற்றில் அடித்து சிதறும் பஞ்சை போல,
காலத்தால் அழிந்துவிடும்.

செப்டம்பர் ஐந்தாம் நாளை,
செழிப்புடன் கொண்டாடி மகிழ்கிறோம்....
தனக்கென இல்லாது தன் பணிக்காக,
தாரை வார்த்து தந்ததினால்,
அழியா புகழ் கொண்ட நாளாய்,
ஆசிரயர் தினமாய் கொண்டாடுகிறோம்.

ஆசிரிய பணி....
வாழ்வாதார பணி அல்ல
வாழ்வை ஆதாரமாக்கும் பணி!!

அகர முதல என தொடங்கி,
அர்த்தமுள்ள வாழ்க்கைக்கு,
ஆணிவேராய் திகழ்பவர் ஆசிரியரே !.

கள்வனாலும் கவர முடியா
கல்வி எனும் செல்வத்தை,
எழுத்தை அறிவித்து
ஏணிப்படியாய் நின்று,
அறிஞரும், கலைஞரும்
அவனிதனில் உருவாக,
கருவாக இருப்பவர் ஆசிரியரே!...

ஆசிரிய பணி தொழில் அல்ல தொண்டு!!

ஆதவனின் ஒளியை உள்வாங்கி
அனைவரையும் கவர்ந்திடும் குளிர் நிலவாய்,
பாரினில் ஒளி காண
பங்கு பெரும் இருவர் போல,

ஆசிரியரின் படைப்பில் மாணவன்,
அரிச்சுவடி தொடங்கி
அணுசக்திவரை அரிய பெரிய காரியங்களில்,
அவனிதனில் உயர்வை காண்கிறான்.

என்னே உயரிய பணி!!....

அர்ப்பணித்த வாழ்கையே அப்பணி!....

சிலை செதுக்கிடும் சிறப்பிக்கு
கல் இசைந்து கொடுக்கிறது...!

குயவன் கையில் களிமண்
பாத்திரத்திற்கு வளைந்து கொடுக்கிறது...!

மாணவனும் ஆசானுக்கு அர்ப்பணித்து கீழ்படிந்தால்,

ஆசிரிய தொண்டு உயரும்,
பயணங்கள் தொடரும்...!

-ஆசிரிய தினத்திற்கான என் கவிதை…..
நா. ஸ்டீபன் தேவராஜ்.

**Dr.S.Soundarapandian** · **Dr.S.Soundarapandian** Wed Oct 02, 2013 12:29 pm

ஸ்டீபன் தேவராஜ் உள்ளம் எனக்குப் புரிகிறது ! மராட்டிய மாநிலத்தில் இரண்டு ஆண்டுகள் அறிவியல் மற்றும் கணக்கு ஆசிரியராகப் பணிபுரிந்தவன் நான் ! அங்கிருந்த மாணவ , மாணவியர் இன்னும் என் கண்ணுக்குள்ளேயே இருக்கிறார்கள் ! இலண்டன் , ஆப்பிரிக்கா முதலிய பல நாடுகளைச் சேர்ந்தவர்கள் அவர்கள் ! உலகெங்குமுள்ள மாணவர்கள் ஆசிரியர்
என்றாலே ஒரு மரியாதை கொள்கிறார்கள் என்பதற்கு நானே சாட்சி !மனித குலத்தின் பெருமை - ஆசிரியப் பணி !

ஆசிரியர் தினம்

ஆசிரியர் தினம்

ஆசிரியர் தினம்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக