செம்மொழி மாநாடு : கருணாநிதிக்கு சம்மன்

கோவையில் நடந்த, செம்மொழி மாநாட்டுக்காக செய்யப்பட்ட செலவில் முறைகேடு நடந்திருப்பதாகக் கூறப்படுவதால், கருணாநிதி உள்ளிட்ட நால்வருக்கு, விரைவில் சம்மன் அனுப்பப்படவுள்ளது.

கடந்த, 2010, ஜூன், 23ம் தேதி முதல், 27ம் தேதி வரை, கோவையில், செம்மொழி மாநாடு நடந்தது. இந்த மாநாட்டு குழுவில், கருணாநிதி, ஸ்டாலின், அன்பழகன், கனிமொழி மற்றும் அரசு அதிகாரிகள் இருந்தனர். இந்த மாநாட்டிற்காக, 380 கோடி ரூபாய் செலவு செய்யப்படும்' என, அப்போதைய முதல்வர் கருணாநிதி அறிவித்தார். ஆனால், 301 கோடி ரூபாய் மட்டுமே செலவு செய்யப்பட்டதாக, மாநாடு முடிந்தவுடன், சட்டசபையில் தெரிவித்தார். இந்த மாறுபட்ட தகவலால், சென்னை, சிந்தாதிரிப்பேட்டையைச் சேர்ந்த ரமேஷ்பாபு என்பவர், தகவல் அறியும் உரிமைச் சட்டத்தில், உண்மையான செலவு விவரத்தை வழங்கும்படி கடிதம் எழுதினார். ஆனால், அப்போதைய அரசு, எந்த பதிலும் அனுப்பாததால், ரமேஷ்பாபு அமைதியாக இருந்தார்.

இந்நிலையில், 2012, ஜூன் மாதத்தில், அ.தி.மு.க., அரசு பதவியேற்றதையடுத்து, செம்மொழி மாநாட்டிற்கான செலவுத் தொகையை அறிய, தமிழ் வளர்ச்சித் துறை, தமிழக தணிக்கைத் துறை மற்றும் கோவை மாவட்ட நிர்வாகத்திற்கு மீண்டும் கடிதம் எழுதினார். இதற்கு, மூன்று துறைகளில் இருந்தும் பதில் வந்தது. அதில், செம்மொழி மாநாட்டுக்காக, 151.22 கோடி ரூபாய் செலவிடப்பட்டதாக, தணிக்கைத் துறை தெரிவித்தது. தமிழ் வளர்ச்சித் துறை, 262.63 கோடி ரூபாய் செலவிடப்பட்டதாக கணக்கு காட்டியது. கோவை மாவட்ட கலெக்டர் அலுவலகத்தில் இருந்து வந்த கடிதத்தில், கோவை மாநகர மேம்பாட்டுக்கான கட்டமைப்பு செலவுகளுக்காக, 193.63 கோடி ரூபாய்; மாநாட்டு பணிக்காக, 69 கோடி ரூபாய் என, மொத்தம், 262.63 கோடி ரூபாய் செலவானதாக குறிப்பிட்டிருந்தது. தமிழ் வளர்ச்சித் துறை மற்றும் கோவை மாவட்ட நிர்வாகம் அளித்த செலவுக் கணக்கு ஒன்றாக இருந்தாலும், தணிக்கைத் துறை கணக்குடன் ஒத்துப் போகாததால், முறைகேடு நடந்துள்ளதாக, தலைமைச் செயலர் மற்றும் லஞ்ச ஒழிப்புத் துறை இயக்குனருக்கும், டிச., 20, 2012ல் புகார் அனுப்பினார். பதில் இல்லாததால், பிப்.,5, மார்ச், 8ம் தேதிகளில் மீண்டும் புகார் அனுப்பினார்.

இதற்கும் எந்த நடவடிக்கையும் எடுக்கப்படாததால், ஜூன்,21ம் தேதி சென்னை உயர்நீதிமன்றத்தில் வழக்கு தொடர்ந்தார். இந்த வழக்கை பல்வேறு நீதிபதிகள் விசாரித்தனர்.
இறுதியாக, இந்த வழக்கை விசாரித்த, நீதிபதி மாலா, புகார் மீது தீவிர விசாரணை மற்றும் குற்றச்சாட்டு பதிவுக்கு உத்தரவிட்டார்.தற்போது, செம்மொழி மாநாடு குறித்த அனைத்துத் துறை ஆவணங்களையும், லஞ்ச ஒழிப்பு போலீசார் கைப்பற்றியுள்ளனர். அந்தந்த துறை ஊழியர்களையும் அழைத்து விசாரித்து வருகின்றனர் மாநாட்டு செலவில், முறைகேடு தொடர்பான விசாரணைக்கு வரும் படி, குழுவினர் அனைவருக்கும் சம்மன் அனுப்ப, லஞ்ச ஒழிப்புத் துறை தயாராகி வருகிறது. விரைவில், கருணாநிதி உள்ளிட்ட, நால்வருக்கும், சம்மன் அனுப்பப்படும், என்று தெரிகிறது.


நன்றி தினமலர்