ஆண்டுக்கு 20 ஆயிரம் பேர் வெறிநாய்க்கடி நோய்க்கு சாவு

இந்தியாவில் ஆண்டுக்கு 20 ஆயிரம் பேர் ரேபீஸ் நோய்க்கு இறப்பதாக சுகாதாரத் துறை அமைச்சர் கே.சி.வீரமணி தெரிவித்தார்.

உலக வெறிநாய்க் கடி தினத்தையொட்டி (செப். 28), ராஜீவ்காந்தி அரசு பொது மருத்துவமனையில் ரேபீஸ் நோய் குறித்த விழிப்புணர்வு கண்காட்சி புதன்கிழமை தொடங்கியது. சனிக்கிழமை (செப்.28) வரை நடக்கும் இக் கண்காட்சியை தொடக்கி வைத்து, சுகாதாரத் துறை அமைச்சர் கே.சி.வீரமணி பேசியது:

இந்தியளவில் ஆண்டுதோறும் 20 ஆயிரத்துக்கும் மேற்பட்டோர் ரேபீஸ் எனும் வைரஸ் நோய்க்கு இறப்பதாக புள்ளி விவரங்கள் தெரிவிக்கின்றன. இந்நோய் பெரும்பாலும் நாய்கள் மூலம்தான் மனிதர்களுக்கு பரவுகிறது. எனவே, நம் வீடுகளில் செல்லமாக வளர்க்கப்படும் நாய் அல்லது தெரு நாய்கள், நம்மை கடித்தாலோ, அவற்றின் நகம் பட்டு, கை, கால், முகம் போன்ற இடங்களில் சிராய்ப்பு ஏற்பட்டாலோ, அவற்றின் உமிழ்நீர் நம் உடலில் பட்டாலோ, கடிபட்ட இடத்தை தண்ணீரில் கழுவ வேண்டும். உடனடியாக மருத்துவரின் ஆலோசனைப்படி ரேபீஸ் தடுப்பூசி மருந்தை தவணை தவறாமல் போட்டுக் கொள்ள வேண்டும். இல்லையெனில், ரேபீஸ் வைரஸ் நம் உடலுக்குள் சென்று நரம்பு மண்டலத்தை பாதித்து உயிருக்கு ஆபத்தை விளைவித்துவிடும்.

அதேபோல், நாய், பூனை ஆகிய செல்லப் பிராணிகளுக்கு ஆண்டுதோறும் தவறாமல் ரேபீஸ் தடுப்பூசி மருந்து போட வேண்டும். அரசு மருத்துவமனைகளில் வெறிநாய்க் கடி மருத்துவத்துக்காக தமிழக அரசு ரூ.10.5 கோடி ஒதுக்கியுள்ளது. பொதுமக்கள் மத்தியில் வெறிநாய்க் கடி குறித்த விழிப்புணர்வு அதிகரிக்க வேண்டும் என்றார் அமைச்சர்.

ராஜீவ்காந்தி அரசு பொதுமருத்துவமனை முதல்வர் டாக்டர் கனகசபை கூறும்போது, வெறிநாய்க் கடி மருத்துவத்துக்காக, அரசு பொது மருத்துவமனைக்கு ரூ.9 லட்சம் ஒதுக்கப்பட்டுள்ளது. சென்னை மாநகராட்சி பள்ளிகள், கல்லூரிகளில், இந்த விழிப்புணர்வு நிகழ்ச்சியை நடத்த திட்டமிட்டுள்ளோம் என்றார்.

தொடக்க நிகழ்ச்சியில், ராஜீவ்காந்தி அரசு பொது மருத்துவமனை ஆர்.எம்.ஓ. டாக்டர் ஆனந்த் பிரதாப், துணை கண்காணிப்பாளர் டாக்டர் நாராயணசாமி, சென்னை மருத்துவக் கல்லூரி சமூக மருத்துவத் துறை உதவி பேராசிரியர் சித்ரா உள்ளிட்டோர் கலந்து கொண்டனர். நன்றி-தினமணி