இலங்கை செல்ல மறுத்து விமானநிலையத்தில் பயணச்சீட்டை கிழித்து எறிந்த பெண்

by மீனு Wed Oct 28, 2009 4:46 am

போலி பாஸ்போர்ட்டில் வந்த இலங்கை இளம்பெண், மீண்டும் நாடு திரும்ப மறுத்து விமான டிக்கெட்டை கிழித்து எறிந்தார். இதனால், விமான நிலையத்தில் பெரும் பரபரப்பு ஏற்பட்டது. அவரை இலங்கை தூதரகத்தில் போலீசார் ஒப்படைத்துள்ளனர்.

இலங்கை அனுராதபுரத்தை சேர்ந்தவர் நிஷாராணி (29). இவர் குவைத்தில் வேலை செய்த போது ஆந்திராவை சேர்ந்த ஒரு வாலிபரை காதலித்துள்ளார். அவர் மீண்டும் ஆந்திரா சென்றுவிட்டார். ஆனால், காதலனை பற்றி எந்த தகவலும் நிஷாராணிக்கு தெரியவில்லை. இதையடுத்து, ஏஜென்ட் மூலம் போலி பாஸ்போர்ட் பெற்று ஆந்திர மாநிலம், ரேணிகுண்டாவுக்கு சென்றார். அங்கு விமான நிலையத்தில் நிஷாராணியின் பாஸ்போர்ட் போலி என்பதை குடியுரிமை அதிகாரிகள் கண்டுபிடித்தனர்.

ரேனிகுண்டா விமான நிலைய போலீசார், மண்ணூர் போலீஸ் நிலையத்தில் நிஷாராணியை ஒப்படைத்தனர். போலீசாரும் அவரை கடப்பா நீதிமன்றத்தில் ஆஜர்படுத்தினர். இந்த வழக்கில், கடந்த 2007ல் நிஷாராணிக்கு 3 ஆண்டு சிறை தண்டனை வழங்கபட்டு சிறையில் அடைக்கப்பட்டார். அதன்பின்பு, நன்னடத்தை காரணமாக 2 ஆண்டில் விடுவிக்கப்பட்டார். இதையடுத்து, நிஷாராணியை மீண்டும் இலங்கைக்கு அனுப்பி வைக்க ராஜம்பேட்டை நீதிமன்றம் உத்தரவிட்டது.

இலங்கை தூதர் மூலம் எமர்ஜென்சி சான்றிதழ் பெற்று நிஷாராணியை இலங்கைக்கு அனுப்ப கடப்பா கலெக்டர் ஏற்பாடு செய்தார். இதையடுத்து, நிஷாராணியை ஆந்திர போலீசார் சென்னை விமான நிலையத்துக்கு அழைத்து வந்தனர். நேற்று முன்தினம் நள்ளிரவு 12.30 மணிக்கு கொழும்பு புறப்படும் விமானத்தில் நிஷாராணி செல்வதாக இருந்தது.

எல்லா சோதனைகளும் முடிந்த நிலையில் திடீரென, ‘‘நான் இலங்கைக்கு செல்லமாட்டேன். எனக்கு அங்கு உறவினர் யாரும் இல்லை. எனது காதலனை தேடி கண்டுபிடித்து திருமணம் செய்து கொள்ள வேண்டும். என்னை இந்தியாவிலேயே விட்டு விடுங்கள்" என்று கூறி, விமான டிக்கெட்டை கிழித்து எறிந்தார் நிஷாராணி. அதிர்ச்சி அடைந்த பைலட்டுகள், அவரை விமானத்தில் வலுக்கட்டாயமாக ஏற்ற முயன்றனர்.

தகவல் அறிந்து விரைந்து வந்த ஜெட் ஏர்லைன்ஸ் அதிகாரிகள், "வலுக்கட்டாயமாக விமானத்தில் ஏற்றினால், நடுவழியில் ஏதேனும் தகராறு செய்வார்" என்று கூறி, நிஷாராணியின் பயணத்தை ரத்து செய்தனர். அதன் பின்பு விமான நிலைய அதிகாரிகள், நிஷா ராணியை ஆந்திர போலீசாரிடமே ஒப்படைத்தனர். ஆந்திர போலீசார் என்ன செய்வது என்று தெரியாமல் திகைத்தனர்.

அவர்கள் ஆந்திர அதிகாரிகளை தொடர்பு கொண்டு கேட்டபோது ‘‘நீதிமன்ற உத்தரவுபடி, எப்படியாவது நிஷாராணியை இலங்கைக்கு அனுப்புங்கள்" என்று கூறிவிட்டனர். விமான நிலைய போலீசார் உதவியுடன் சென்னையில் உள்ள இலங்கை தூதரகத்தில் நிஷாராணியை ஆந்திர போலீசார் ஒப்படைத்தனர். இதனால் விமான நிலையத்தில் பெரும் பரபரப்பு ஏற்பட்டது