மீனவர்களை விடுவிக்காததை கண்டித்து படகுகளில் வெள்ளைக்கொடி ஏந்தி இலங்கையில் 27ம் தேதி தஞ்சம்

நாகை: புதுக்கோட்டை மாவட்டம் கோட்டைப்பட்டினம், ஜெகதாப்பட்டினத்தை சேர்ந்த 19 மீனவர்களை இலங்கை கடற்படையினர் கடந்த 18ம் தேதி சிறை பிடித்தனர். இலங்கை கடற்படையினரின் அட்டகாசத்தை கண்டித்தும், இலங்கை கடற்படையினரால் கைது செய்யப்பட்ட மீனவர்களை விடுதலை செய்யவும் மத்திய, மாநில அரசுகள் உடனே நடவடிக்கை எடுக்க வேண்டும் என வலியுறுத்தியும் புதுக்கோட்டை மாவட்டத்தை சேர்ந்த மீனவர்கள் காலவரையற்ற வேலை நிறுத்தத்தில் ஈடுபடுவது என முடிவு செய்தனர். அதன்படி புதுக்கோட்டை மாவட்டம் கோட்டைப்பட்டினம், ஜெகதாப்பட்டினம் உள்ளிட்ட மீனவ கிராமங்களை சேர்ந்த மீனவர்கள் நேற்று முதல் கடலுக்கு செல்லாமல் காலவரையற்ற வேலை நிறுத்தத்தை துவக்கி உள்ளனர். இதேபோல் நாகை தாலுகாவை சேர்ந்த 1000 விசைப்படகுகளை சேர்ந்த சுமார் 10 ஆயிரம் விசைப்படகு மீனவர்கள் கடலுக்கு மீன்பிடிக்க செல்லாமல் தொடர் வேலைநிறுத்தத்தில் ஈடுபட்டுள்ளனர். நேற்று 15வது நாளாக மீனவர்கள் கடலுக்கு செல்லவில்லை. இந்நிலையில் போராட்டத்தை தீவிரப்படுத்துவதற்காக நாகையில் நேற்று அவசர ஆலோசனை கூட்டம் நடந்தது. இதில் நாகை, திருவாரூர், தஞ்சாவூர், புதுக்கோட்டை, ராமநாதபுரம் மற்றும் காரைக்கால் ஆகிய 6 மாவட்டங்களை சேர்ந்த மீனவ கிராம பஞ்சாயத்தார் கலந்து கொண்டனர். இதில் நிறைவேற்றப்பட்ட தீர்மானங்கள்: இலங்கை சிறையில் உள்ள நாகை மற்றும் காரைக்கால் மாவட்டத்தை சேர்ந்த 65 மீனவர்கள், 9 படகுகளை வரும் 25ம் தேதிக்குள் விடுதலை செய்ய மத்திய, மாநில அரசுகள் நடவடிக்கை எடுக்க வேண்டும். இல்லாவிட்டால், நாகை, காரைக்கால், திருவாரூர், தஞ்சாவூர், புதுக்கோட்டை, ராமநாதபுரம் ஆகிய 6 மாவட்டங்களை சேர்ந்த அனைத்து மீனவர்களும் ஒருங்கிணைந்து வரும் 27ம் தேதி அன்று விசைப்படகுகளில் வெள்ளைக்கொடி ஏந்தி இலங்கை சென்று தஞ்சம் அடைவது ஆகிய தீர்மானங்கள் ஏகமனதாக நிறைவேற்றப்பட்டது.



நன்றி தினகரன்