நிலுவை வழக்குகளை முடிக்க 400 ஆண்டுகள் கூட ஆகலாம்

கிருஷ்ணகிரி: கிருஷ்ணகிரி ஒருங்கிணைந்த நீதிமன்ற வளாகத்தில் மகளிர் நீதிமன்றம் மற்றும் மாற்று முறை சமரச தீர்வு மையம் ஆகிய நீதிமன்றங்களின் தொடக்க விழா நேற்று நடந்தது. விழாவில் தமிழக உள்ளாட்சி மற்றும் சட்டத்துறை அமைச்சர் கே.பி.முனுசாமி, சென்னை உயர்நீதிமன்ற நீதிபதி சுந்தரேஷ் ஆகியோர் சிறப்பு விருந்தினராக கலந்து கொண்டு புதிய நீதிமன்றங்களை திறந்து வைத்தனர். விழாவில் நீதிபதி சுந்தரேஷ் பேசியதாவது: பெண்களுக்கு எதிராக 100 குற்றங்கள் நடந்தால், 5 குற்றங்கள் மட்டுமே வெளியில் தெரிகிறது. பல காரணங்களால் பெண்கள் தங்களுக்கு எதிராக நடத்தப்படும் குற்றங்களை வெளியில் சொல்வதில்லை. பெண்களுக்கு எதிராக நிகழ்த்தப்படும் குற்றங்களுக்கு கடுமையான தண்டனை வழங்கப்பட வேண்டும். அப்போதுதான் அந்த குற்றங்கள் தடுக்கப்படும். இந்தியாவில் தற்போது நிலுவையில் உள்ள வழக்குகளை முடிக்க 400 ஆண்டுகள் கூட ஆகலாம். இதற்கு நீதிபதிகள் பற்றாக்குறை உள்பட பல்வேறு காரணங்கள் உள்ளன. இன்னும் 20 ஆண்டுகளில் இந்தியாவில் தற்போது உள்ள வழக்குகளை போல் 3 மடங்கு எண்ணிக்கையிலான வழக்குகள் நிலுவையில் இருக்கும்.
குறிப்பாக சிவில் வழக்குகள் அதிகமாக இருக்கும். இதற்கு பொதுமக்களும், வழக்கறிஞர்களும் மாற்றுமுறை சமரச தீர்வு மையத்தை அணுக வேண்டும். இதன் மூலம் வழக்கில் சம்பந்தப்பட்ட இருவருக்கும் சாதகமான தீர்ப்பு கிடைக்கும். சமரச மையத்தில் இரு தரப்புக்குமே வெற்றி கிடைக்கும். இவ்வாறு நீதிபதி சுந்தரேஷ் பேசினார்.

நன்றி தினகரன்