பரவுகிறது -குளம் தூர்வாரும் கரசேவை

பொங்கலூர்:ஆண்டிபாளையம் குளம், பொதுமக்கள் பங்களிப்புடன் தூர்வாரப்படுவதை தொடர்ந்து, பிற பகுதிகளை சேர்ந்தவர்களும், தங்கள் பகுதி குளங்களை தூர்வாரும் முயற்சியில் ஆர்வம் காட்டி வருகின்றனர். பொங்கலூர், கண்டியன்கோவில் ஊராட்சியில் உள்ள நாவிதன்பாறை குளத்தை தூர் வாரும் பணி இன்று நடக்கிறது.



அலகுமலையில் உற்பத்தியாகும் உப்புக்கரை பள்ளம், ஆலாம்பாளையம், உப்புக்கரைபாளையம், கண்டியன்கோவில், குளத்துப்பாளையம், கருங்காளிபாளையம், பெரியாரியபட்டி, தங்காய்புதூர், படியூர், ராசாப்பாளையம் உள்ளிட்ட பகுதிகள் வழியாக சென்று நொய்யல் நதியில் கலக்கிறது. இந்த ஓடையில், மழைக்காலங்களில் வெள்ள நீர் பெருக்கெடுத்து ஓடும். ஓடையில் தடுப்பணை இருந்தபோதிலும், போதிய பராமரிப்பின்றி, முட்புதர் முளைத்துள்ளது.


அவற்றில் ஒன்றுதான், பெரியாரியபட்டியில் இருந்து தங்காய்புதூர் வரை நீண்டுள்ள நாவிதன்பாறை குளம். இது, ஏழரை ஏக்கர் பரப்பளவுள்ளது. பல ஆண்டுகளாக கண்டுகொள்ளப் படாமல் இருந்ததால், முட்புதர் மண்டியுள்ளது.இதன் மதகு பகுதி சேதமாகியுள்ளதால், குளத்தில் பாதியளவு தண்ணீர் மட்டுமே நிரம்பியது. உபரியாக வரும் மழை நீர் ஓடையில் சென்று நொய்யலில் கலந்து வீணாகியது.


இந்தாண்டு முன் னெப் போதும் இல்லாத வகையில்,வறட்சி தாண்டவமாடுவதால், விவசாயிகள் தண்ணீரின் மகத்துவத்தை உணர்ந்துள்ளனர்.எனவே, அப்பகுதி விவசாயிகள் ஒன்றிணைந்து மதகு பகுதியை சீரமைத்தனர். மழைக்காலத்தில், குளத்துக்கு வரும் நீரை முழுமையாக தேக்கினால், குளக்கரை உடைந்து விடும் சூழல் ஏற்பட்டது. எனவே, குளத்தை தூர் வாரும் பணியையும் துவக்க முடிவு செய்துள்ளனர்.


இன்று நடக்கும் தூர் வாரும் பணியில், ஊராட்சி நிர்வாகத்துடன் ஒன்றிணைந்து, மீனாட்சிவலசு, மருதுறையான்வலசு, பெரியாரியபட்டி, தங்காய்புதூர் ஆகிய பகுதிகளை சேர்ந்த விவசாயிகள், கண்டியன்கோவில் பி.ஏ.பி., பாசன நீரினை பயன்படுத்துவோர் சங்கம், தொடக்க வேளாண் கூட்டுறவு கடன் சங்க உறுப்பினர்கள், கண்டியன்கோவில் கண்டீஸ்வர சுவாமி திருக்கோவில் வழிபாட்டு குழு, மாவட்ட தென்னை விவசாயிகள் சங்கம், வலுப்பூரம்மன் கோவில் வழிபாட்டு குழுவினர் ஈடுபடுகின்றனர்.

நன்றி தினமலர்