பொங்கல், புலவுகள் மற்றும் சித்திரான்னங்கள் -கர்நாடகா பாணி புளியோதரை!

by **krishnaamma** Thu Sep 19, 2013 11:18 am

First topic message reminder :

இந்த திரி il நாம் பொங்கல் வகைகள் மற்றும் சித்திரான்னங்கள் செய்முறைகளை பார்போம். நாம் சாதாரணமாக ஆடிப்பெருக்கு தினங்களில் அல்லது வெளியே பிக்னிக் போல வெளியே செல்லும் நேரங்களில் சாம்பார் மற்றும் ரசம் எடுத்துசெல்வது கடினம். எனவே நாம் கலந்த சாத வகைகளை ...... அதாவது பொங்கல் மற்றும் சித்திரான்னங்களை எடுத்து செல்வது வழக்கம். அவ்வாறு எடுத்து செல்லும் சாத வகைகள் என்னென்ன , அவற்றை எப்படி செய்வது என்பதை இந்த திரி இல் பார்க்கலாம் புன்னகை

இதில் வழக்கமாக செய்யும் வெண் பொங்கல், சர்க்கரை பொங்கல், புளியோதரை , புளியோதரை வாககளும் மற்றும் புதினா சாதம், கொத்துமல்லி சாதம், பூண்டு சாதம் புலவுகள் என பலவும் வரப்போகிறது புன்னகை

பொறுத்திருந்து படியுங்கள் !

by **krishnaamma** Sun Nov 01, 2020 9:23 pm

கர்நாடகா புளியோதரை!

தேவையான பொருட்கள்:

எள் 25 - 30 கிராம்
தனியா 2 டேபிள் ஸ்பூன்
கடலை பருப்பு 1 tab.sp
உளுத்தம் பருப்பு 1 டீஸ்பூன்
சீரகம் 1 டீஸ்பூன்
கடுகு 1 டீ ஸ்பூன்
மிளகு 1 டீ ஸ்பூன்
வெந்தயம் 1/4 டீ ஸ்பூன்
மிளகாய் வற்றல் 10 - 12
கறிவேப்பிலை கொஞ்சம்

புளி 100 கிராம். (நன்கு அலம்பி, கொஞ்சம் உப்பு போட்டு,கெட்டியாக கரைத்துவைக்கவும். )
கொப்பரை 1/2 கப்
வெல்லம் 50 கிராம்
நல்லெண்ணெய் 75 முதல் 100 கிராம்
மஞ்சள் பொடி 1 டீ ஸ்பூன்
பெருங்காயப் பொடி 1/4 டீ ஸ்பூன்
உப்பு

தாளிக்க:

கடலை பருப்பு, உளுத்தம் பருப்பு மற்றும் கடுகு ஒவ்வொன்றும் 1 டீ ஸ்பூன்
ஒரு கை முழு வேர்கடலை

செய்முறை:

எள்ளை வெறும் வாணலியில் வறுக்கவும்
ஒரு தட்டில் கொட்டவும்.
ஒரு பாத்திரத்தில் எண்ணெய் விட்டு, அதில் தனியா, கடலை பருப்பு, உளுத்தம் பருப்பு, சீரகம் சேர்க்கவும்.
பின் மிளகு, கடுகு மற்றும் வெந்தயம் சேர்க்கவும்.
நன்கு வறுக்கவும்.
அதிலேயே, மிளகாய் வற்றல், கறிவேப்பிலை இரண்டையும் போடவும்.
நல்ல வாசனை வரும் வரை வறுக்கவும்
இதையும் ஒரு தட்டுக்கு மாற்றி விடவும்.
கொப்பரைத் தேங்காயை வறுக்கவும் அதே தட்டில் கொட்டி வைக்கவும்
வாணலியில் எண்ணெய் விடவும்.
அதில் கடுகு போட்டு வெடித்ததும், கெட்டியான புளிக்கரைசலை விடவும்.
மஞ்சள் பொடி சேர்த்து நன்கு கிளறவும்
சுமார் 15-20 நிமிடங்கள் அது அப்படியே கொதிக்கட்டும்.
அவ்வப்போது கிளறி விடவும்.
தேவைப்பட்டால் மூடி வைக்கலாம்.
அதற்குள் , ஆறின மசாலா சாமான்களை மிக்சி இல் பொடித்துக் கொள்ளவும்.
கொதிக்கும் புளித்தண்ணீரில் கொஞ்சம் உப்பு சேர்க்கவும்.
(புளி கரைக்கும் போதே அதில், ஏற்கனவே உப்பு சேர்த்துள்ளோம் என்பதை நினைவில் கொள்ளுங்கள்.)
பொடித்த வெல்லம் சேர்க்கவும்
நன்றாக கிளறி விடவும்
இபொழுது எண்ணை பிரிய ஆரம்பிக்கும்.
உடனே நாம் பொடித்து வைத்துள்ள மசாலா பொடியை போட்டு, நன்கு கிளரவும்.
அடுப்பை சின்னதாக்கவும்.
அது நன்றாக கலந்து லேகியப்பதம் போல வரும் வரை நன்கு கிளறி இறக்கவும்.
ஒரு பேசினில் வடித்த சாதத்தை போட்டு அதில் கொஞ்சம் நல்லெண்ணை விட்டு குலுக்கவும்.
ஒரு சிறிய கடாயில் எண்ணெய் சூடாக்கவும்
கடுகு, கடலை மற்றும் உளுத்தம் பருப்பு போடவும்.
அதிலேயே வேர்கடலையையும் கறிவேப்பிலையும் போட்டு நன்கு வறுத்து, பேசினில் வைத்துள்ள சாதத்தின் மீது கொட்டவும்.
ஏற்க்கனவே செய்து வைத்துள்ள புளிக்காய்ச்சலில் இருந்து கொஞ்சம் எடுத்து சாதத்தில் போட்டு நன்கு கிளரவும்.
அருமையான கர்னாடகா பாணி புளியோதரை தயார்.
கொஞ்சம் இனிப்பு சுவையுடன் இருப்பதால் இதைக் குழந்தைகள் விரும்புவர்.

மீதமுள்ள புளியோதரை கலவையை 6 மாதங்கள் வரை குளிர்சாதன பெட்டியில் வைத்து உபயோகிக்கலாம் புன்னகை