போலீசாருக்கு பயந்து ஊரை காலி செய்த கிராமத்தினர்: மலை அடிவாரத்தில் தங்கினர்

தேனி: தேனி அருகே போலீசுக்கு பயந்து, ஊரை காலி செய்த கிராம மக்கள் 100 பேர், மலை அடிவாரத்தில் தங்கினர்.

தேனி அருகே, ஒரு குறிப்பிட்ட சமுதாயத்தினர் வசிக்கும் திருச்செந்தூர் கிராமத்தில், கடந்த ஏப்ரல் மாதம் பொங்கல் விழா நடந்தது. அப்போது இரு தரப்பினரிடையே தகராறு ஏற்பட்டு, தொடர்ந்து மோதிக்கொண்டனர். பழனி செட்டிபட்டி போலீசில், மாறி, மாறி புகார் செய்துள்ளனர். போடி தாலுகா அலுவலகத்தில் அமைதி பேச்சு வார்த்தை நடந்தது.

இந்நிலையில், கடந்த செப்.,8ல், இரு தரப்பினரும் மீண்டும் மோதிக் கொண்டு, போலீசில் புகார் செய்தனர். போலீசார் இரு தரப்பிலும் வழக்கு பதிந்து, விசாரித்து வருகின்றனர். பழனிசெட்டிபட்டி எஸ்.ஐ., வெங்கட் பிரபு, ஒரு தரப்பினருக்கு ஆதரவாக செயல்படுவதாக, மற்றொரு தரப்பினர் எஸ்.பி., பிரவீன்குமார் அபிநபுவிடம் புகார் செய்தனர். நியாயமான நடவடிக்கை எடுக்க எஸ்.பி., உத்தரவிட்டார். இந்நிலையில், தேனி இன்ஸ்பெக்டர் கோபி, எஸ்.ஐ.,வெங்கட் பிரபு தலைமையில் போலீசார், நேற்று முன்தினம் நள்ளிரவு 12 மணிக்கு, இந்த பகுதிக்கு சென்று, ஒரு தரப்பினர் கூறும் ஆட்களை கைது செய்ய முயன்றனர். ராமமூர்த்தி என்பவர் உட்பட பலரை போலீஸ் வேனில் ஏற்ற முயன்றனர். பெண்கள் திரண்டு வந்து வேனை முற்றுகையிட்டதால், அவர்களை விடுவித்தனர். இதனால், போலீசுக்கு பயந்து, இப்பகுதி பெண்கள், மாணவர்கள் உட்பட 120 பேர், நேற்று முன்தினம் ஊரை காலிசெய்து விட்டு, 4 கி.மீ., தூரத்தில், மரக்காமலை அடிவாரத்தில் உள்ள கன்னிமார் கோயில் அருகே கூடாரம் அமைத்து தங்கினர்.

தேனி டி.எஸ்.பி., அய்யனார் தலைமையில் போலீசார் அங்கு சென்று, ""இரு தரப்பினரிடையே அமைதி கூட்டம் நடத்தி, வழக்குகள் உள்ளிட்ட பிரச்னைகளை தீர்த்துக்கொள்வோம்,'' என உறுதி கூறினார். இதையடுத்து, பகல் 2 மணிக்கு, கிராம மக்கள் ஊர் திரும்பினர். டி.எஸ்.பி., கூறுகையில், ""இரு தரப்பினர் மீதும் வழக்குகள் உள்ளது. தாசில்தார் அலுவலகத்தில், அமைதி பேச்சு வார்த்தை நடந்து வருகிறது. இரு தரப்பு புகார்களுக்கும் தீர்வு காணப்படும்,'' என்றார்.

தினமலர்