நாளை 2 வது ஒருநாள் போட்டி

இரண்டாவது ஒருநாள் போட்டியில் பங்கேற்க உள்ள இந்திய, ஆஸ்திரேலிய வீரர்கள் நாக்பூர் வந்தடைந்தனர். ஆஸ்திரேலியாவின் முன்னணி வேகப்பந்து வீச்சாளர்கள் பிரட் லீ, மைக்கேல் ஜான்சன் காயமடைந்துள்ளது அந்த அணிக்கு பின்னடைவை ஏற்படுத்தியுள்ளது.
இந்தியா வந்துள்ள ஆஸ்திரேலிய அணி, ஏழு ஒருநாள் கிரிக்கெட் போட்டிகள் கொண்ட தொடரில் பங்கேற்று வருகிறது. வதோதராவில் நடந்த பரபரப்பான முதல் போட்டியில் இந்திய அணி, 4 ரன்கள் வித்தியாசத்தில் தோல்வியடைந்தது. இரண்டாவது போட்டி நாளை நாக்பூரில் நடக்கிறது.

வீரர்கள் வருகை:
இந்த போட்டியில் பங்கேற்க உள்ள இந்தியா மற்றும் ஆஸ்திரேலிய வீரர்கள் நேற்று நாக்பூர் வந்து சேர்ந்தனர். இவர்களுக்கு விதர்பா கிரிக்கெட் அசோசியேசன் நிர்வாகிகள் சார்பில் வரவேற்பு கொடுக்கப்பட்டது. பின் விமானநிலையம் அருகில் உள்ள போஷ் ஓட்டலில் தங்கவைக்கப்பட்டனர்.

யுவராஜ் "ரெடி':
நாளை நடக்கும் போட்டியில் யுவராஜ் கலந்து கொள்ள இருக்கிறார். காயம் காரணமாக சாம்பியன்ஸ் டிராபி தொடர் முழுவதும் பங்கேற்காமல் இருந்து வந்த இவர் முதல் போட்டியில் கலந்து கொள்ளவில்லை என்பது குறிப்பிடத்தக்கது.

சந்தேகத்தில் பிரட் லீ:
ஆஸ்திரேலியவேகப்பந்து வீச்சாளர் பிரட் லீ, முழங்கை வலியால் அவதிப்பட்டு வருகிறார் .மற்றொரு வேகப்பந்து வீச்சாளர் ஜான்சன், கணுக்கால் காயத்தினால் பாதிக்கப்பட்டுள்ளார். இவர்கள் இருவரும் நாளைய போட்டியில் பங்கேற்பது சந்தேகம் தான். தவிர, "ஆல் ரவுண்டர்' ஹோப்ஸ், முதல் போட்டியின் போது காலில் காயம் ஏற்பட, 2 ஓவர்கள் வீசிய நிலையில் களத்தில் இருந்து வெளியேறினார். முன்னணி வீரர்கள் காயமடைந்துள்ளது ஆஸ்திரேலியாவுக்கு சிக்கலை ஏற்படுத்தி உள்ளது.

இஷாந்துக்கு பாராட்டு
வேகப்பந்து வீச்சாளர் இஷாந்த் சர்மாவுக்கு பாராட்டு தெரிவித்துள்ளார் இந்திய கேப்டன் தோனி. இது குறித்து அவர் கூறுகையில்,"" சமீபகாலமாக "பார்ம்' இன்றி தவித்து வந்த இஷாந்த், ஆஸ்திரேலியாவுக்கு எதிரான முதல் ஒரு நாள் போட்டியில் சிறப்பாக பந்து வீசி அசத்தினார். சரியான அளவில், துல்லியமாக அமைந்த அவரது பந்து வீச்சு, பாராட்டும் படியாக அமைந்தது,'' என்றார். வதோதரா போட்டியில் 10 ஓவர்கள் வீசிய இஷாந்த் 50 ரன்களை விட்டுக் கொடுத்து 3 விக்கெட் வீழ்த்தினார்.

ஜெயிப்பாங்களா இல்ல................... இந்தியா ஜெயிக்க வாழ்த்துகிறேன்