தூண்களில் வீற்றிருக்கும் தெய்வங்கள்!

by **சாமி** Fri Sep 13, 2013 10:23 am

சிவாலயங்களின் மண்டபத் தூண்களில் கலையழகுக்காகப் பெரிய அளவில் தெய்வத் திருவுருவங்கள் அமைக்கப்பட்டன. காலப்போக்கில் இந்தத் திருவுருவங்கள் தனித்தன்மை பெற்று வழிபாட்டுக்கு

உரியதாகி விட்டன. இவற்றில் சிலவற்றைக் காணலாம்.

• மதுரை மீனாட்சியம்மன் ஆலயத்துக் கம்பத்தடி மண்டபத்தூணில் நெடும் சிலைகளாக அமைந்துள்ள அகோர வீரபத்திரர், அகோர காளி, அக்னி வீரபத்திரர், அக்னி காளி ஆகிய உருவங்கள் இப்போது வழிபாட்டுக்குரியதாக உள்ளன. மக்கள் வெண்ணை உருண்டைகளை இவற்றின் மீது வீசி பிரார்த்தனைகளை நிறைவேற்றுகின்றனர்.

• தொண்டை மண்டலத்தில் ஆலயத்தூண்களில் விளங்கும் சரபேசுவரருக்கு சிறப்பு வழிபாடுகள் செய்து பிரார்த்தனைகளைச் செலுத்துகின்றனர். கோயம்பேடு குசலவபுரீசுவரர் ஆலயத்தின் முன்னேயுள்ள 16 கால் மண்டபத்தில் அமைந்துள்ள சரபேசுவரர் தனிச்சிறப்புடன் வழிபடப்படுகின்றார். ஞாயிற்றுக் கிழமைகளிலும் பிரதோஷ வேளையிலும் ஏராளமான மக்கள் இங்கு வழிபடுகின்றனர்.

• ஆவுடையார் கோயில் என அழைக்கப்படும் திருப்பெருந்துறை ஆத்மநாத சுவாமி ஆலயத்தின் முகமண்டபத் தூணில் பெரிய குதிரை வீரனின் சிலை உள்ளது. இது மாணிக்கவாசகருக்காக இறைவன் குதிரை சேவகனாக வந்த வடிவமாகும். இவரை குதிரைச்சாமி என அழைக்கின்றனர். இவருக்கு சிறப்பு வழிபாடுகள் செய்யப்படுகின்றன. இதே கோயிலில் தூணில் எழுந்தருளியுள்ள வீரபத்திரர் பல குடும்பங்களுக்கு குல தெய்வமாக இருக்கிறார்.

• சிதம்பரம் நடராஜர் ஆலயத்தில் தூண்களில் எழுந்தருளியுள்ள சோமாஸ்கந்தர், தண்டபாணி ஆகிய திருமேனிகளுக்கு சிறப்பு அபிஷேகங்களும் வழிபாடுகளும் நடத்தப்படுகின்றன.

• திருவாரூரில் தியாகராஜர் சபா மண்டபத் தூணில் அமைந்துள்ள மூலாதார கணபதிக்கு சிறப்பு பூசைகள் செய்யப்படுகின்றன.

• திருவண்ணாமலை அண்ணாமலையார் ஆலயத்தில் சிவகங்கை தீர்த்தக் கரையில் பதினாறு கால் மண்டபம் உள்ளது. இதன் ஈசான மூலையிலுள்ள தூணில் முருகப்பெருமான் அருணகிரிநாதரின் வேண்டுகோளின்படி, பிரபுடதேவ மகாராஜன் உள்ளிட்ட பலரும் காண காட்சியளித்த பின் அதில் கல் திருமேனியாக எழுந்தருளினார். அந்தத் தூணை மையப்படுத்தி கருவறை உள் மண்டபம், மகா மண்டபம் ஆகியவற்றை அமைத்துள்ளனர். இது ""கம்பத்திளையனார்'' சந்நிதி என்ற தனிக் கோயிலாக போற்றப்படுகிறது.

• திருப்புகலூர், சிருங்ககிரி முதலிய தலங்களில் தூண்களிலுள்ள விநாயகர் ஸ்தம்ப கணபதி எனும் பெயரில் சிறப்புடன் வழிபடப்படுகின்றார்.

• ஆயிரம் சிவலிங்கங்களை தன்னுள் கொண்ட ஆயிரம் லிங்கத்தை பல தலங்களில் காண்கிறோம். இதனைப் போலவே ஆயிரம் சிறு தூண்களை தன்னுள் கொண்ட பெருந்தூண் ஆவுடையார் கோயிலில் சுவாமி ஆலயத்தில் உள்ளது.

நன்றி-தினமணி