அழகை கூட்டும் சுவர் அலங்காரம் !

வீட்டின் ஒவ்வொரு அறையும் அனைவரும் ஆச்சரியப்படும் வகையில் அலங்காரத்தில் ஜொலிக்க வேண்டும் என்ற ஆவல் பலரிடம் இருக்கும். அதனால் வீட்டை அழகுப்படுத்த அதிக அக்கறை எடுத்து கொள்வார்கள். சிலர் அதிக செலவு பிடிக்கும் விஷயம் என நினைத்து ஒதுங்க முற்படுவார்கள். ஆர்வமும், சிறிது கற்பனை திறனும் இருந்தால் போதும். அதிக செலவு செய்ய வேண்டிய அவசியம் இல்லை. குறைந்த செலவிலேயே வீட்டை அழகுப்படுத்தி அசத்தி விடலாம். அப்படிப்பட்ட அலங்காரத்தில் ஒன்று தான் சுவர் அலங்காரம்.

சுவருக்கு வர்ணம் பூசுவதுடன் ஆங்காங்கே சிறிய வேலைப்பாடுகளை செய்வதன் மூலம் அழகிய தோற்றத்தை ஏற்படுத்தி விடலாம். அது நமது ரசனையை வெளிப்படுத்துவதுடன் வீட்டுக்கு வருபவர்களின் கண்களுக்கு விருந்து படைப்பதாய் அமையும். சுவரை எப்படி அலங்கரிக்கலாம் என்று பார்ப்போம்.

* வீட்டின் சுவர்களுக்கு வெளிர் நிறம் கொண்ட வர்ணத்தை பூச வேண்டும். அது அறையை வெளிச்சமாக இருக்கும்படி வைப்பதுடன் பொலிவுடன் காட்சி தரும்.

* சுவர்களில் ஆங்காங்கே புகைப்படங்களை தொங்க விடலாம். அது வீட்டில் இருப்பவர்களின் படங்களாகவும் இருக்கலாம். இயற்கை காட்சிகளின் கலவையாகவும் இருக்கலாம். குழந்தைகளின் படங்களை மாட்டுவது சுவரை மட்டுமல்ல, பார்ப்பவர்களின் மனதையும் கவரும்.

* பழைய காலத்தை போலவே கறுப்பு மற்றும் வெள்ளை நிற புகைப்படங்களை வைக்கும் பாங்கு தற்போது அதிகரிக்க தொடங்கி உள்ளது. பழங்கால கோவில்கள், வரலாற்று நினைவு சின்னங்களை கொண்ட பழைய புகைப்படங்களை இடம்பெற செய்வது பழமையை பறைசாற்றுவதுடன் தற்போது அவை எப்படி மிளிருகின்றன என்பதை ஒப்பிடுவதாகவும் அமையும். சுவர்களுக்கு அழகிய தோற்றத்தையும் ஏற்படுத்தி கொடுக்கும்.

* கலை திறன் கொண்ட படைப்புகளை தாங்கிய நிழற்படங்களை சுவரில் பொருத்தலாம். தாள்கள், துணிகளில் வரையப்பட்ட ஓவியங்களை பிரேமில் மாட்டியும் வைக்கலாம். அவை கண்களை ஈர்ப்பதாய் அமையும்.

* மலர்கள், இலைகளை நன்கு நிழலில் உலர விட்டு அதனை பிரேமில் மாட்டி அழகு படுத்தலாம்.

* பழைய பட்டு புடவைகள், கலை வேலைப்பாடுகள் நிறைந்த சேலைகளின் அழகிய வடிவமைப்பு பகுதிகளை கத்தரித்து சுவர்களில் மாட்டி அலங்கரிக்கலாம்.

* கூழாங்கற்கள், மணி கற்கள், உலோகத்தால் ஆன துண்டுகள், கண்ணாடிகள் போன்றவற்றை கொண்டு பழமையான அல்லது புதுமையான அழகிய வடிவங்களை செதுக்கி சுவரை அலங்கரிக்கலாம்.

* சந்தையில் கிடைக்கும் பழங்கால பிரேம்களை வாங்கி கலை வேலைப்பாடுகள் செய்யப்பட்ட துணியை இணைத்து சுவரில் தொங்க விடலாம்.

* அறையில் பெரிய ஜன்னல் இருந்தால் அதன் மேல் புறத்தில் கலைநயமிக்க படங்கள் இணைக்கப்பட்ட பிரேம்களை மாட்டலாம். கறுப்பு மற்றும் வெள்ளை நிற படங்களை வைப்பதும் அறையை பிரமிக்க வைக்கும்.

* சுவரில் அதிக வெற்றிடமாக தென்பட்டால் அதில் ஓவியங்களை வரையலாம். குறிப்பாக தோட்டங்கள், பூங்காவனம் சூழ்ந்த இயற்கை எழில் காட்சிகள், சிற்பங்கள் என பல பரிணாமங்களை இடம்பெற செய்யலாம்.

* சுவரில் கண்ணாடியை தகுந்த இடத்தில் வைத்து அலங்கார பொருட்களின் பிரதிபலிப்பை எதிரொலிக்க செய்வதுடன் அறையின் அளவை விசாலமாகவும் காட்டலாம்.

* பெரிய சுவர் கடிகாரத்தை தொங்க விட்டும் அறையின் அழகை அதிகரிக்க செய்யலாம்.

* கண்களை குளிர்ச்சியாக்கும் அழகிய அம்சங்களை கொண்ட வால்பேப்பர்களை சுவரில் ஒட்டியும் அறையை அலங்கரிக்கலாம்.

* குழந்தைகளின் அறைகளில் அவர்களை கவரும் கார்ட்டூன், படங்களை வரைந்து வைக்கலாம்.

நன்றி தினத்தந்தி

நல்ல பகிர்வும்மா

அழகான அறைன்னு சொன்னவுடன் பயந்துட்டேன்

யினியவன் wrote:நல்ல பகிர்வும்மா

அழகான அறைன்னு சொன்னவுடன் பயந்துட்டேன்

ம...ம.... தலைப்பை சரியா பாருங்கோ அழகை கூட்டும் சுவர் அலங்காரம் ! என்று தானே போட்டிருக்கேன், நீங்க சொன்னாப்புல ஏதும் இல்லையே

உள்ள படிக்கங்கம்மா - அறையை அழகுபடுத்த தான் நிறைய டிப்ஸ் இருக்கு