மும்பையில் முதல் மோதல்: வருகிறது புதிய கால்பந்து லீக்

http://imgsports.dinamalar.com/Sports/editorial/sites/vssports.vishwak.com/files/Sunil-Chetri-M_3.jpg
மும்பை: கால்பந்து லீக் தொடரின் முதல் போட்டி வரும் 2014 ஜன., 18ல் மும்பையில் நடக்க உள்ளது.
இந்தியாவில் பிரிமியர் கிரிக்கெட் "டுவென்டி-20' போட்டிகள் பிரபலம் அடைந்தது. இந்த வரிசையில் இந்தியன் பாட்மின்டன் லீக் தொடர், வரும் ஆக. 14 முதல் 31 வரை பல நகரங்களில் நடக்கவுள்ளன.
இப்போது, கால்பந்து லீக் போட்டிகளை, தனியார் நிறுவனத்துடன் இணைந்து, 2014ம் ஆண்டு நடத்த அகில இந்திய கால்பந்து கூட்டமைப்பு (ஏ.ஐ.எப்.எப்.,) சமீபத்தில் ஒப்புதல் வழங்கியது.
டில்லி, மும்பை, புனே, சென்னை, கோல்கட்டா, கோவா, கொச்சி மற்றும் பெங்களூரு என, மொத்தம் 8 அணிகள் பங்கேற்கும் எனத் தெரிகிறது. கவுகாத்தி, ஐதராபாத் ஆகியவை "ரிசர்வ்' அணிகளாக சேர்க்கப்பட்டுள்ளன. வரும் செப்., மாதம் அணிகள் ஏலம் நடக்கும்.
வீரர்கள் ஏலம்: வீரர்கள் ஏலம் வரும் அக்., மாதம் நடக்கவுள்ளது. இதில் குறைந்தது 64 இந்திய வீரர்கள் பங்கேற்பர். ஒவ்வொரு அணியிலும் 22 வீரர்கள் இடம் பெறுவர். இதில் 10 வெளிநாட்டு வீரர்கள் தவிர, 8 உள்ளூர் வீரர்களுடன், 4 பேர் அந்தந்த அணிகள் சார்ந்த பகுதிகளில் இருந்து தேர்வு செய்யப்படுவர்.
எத்தனை போட்டிகள்: முதல் போட்டி 2014, ஜன. 18ல் மும்பை டி.ஒய்.பாட்டீல் மைதானத்தில் நடக்கும் எனத் தெரிகிறது. இதற்கான ஒப்பந்தம் இன்னும் ஒரு சில நாட்களில் செய்யப்படும். மொத்தம் 10 வாரங்கள் நடக்கும் இத்தொடரில், ஒவ்வொரு அணியும் 14 லீக் போட்டிகளில் (7 உள்ளூர், 7 மற்ற நகரங்கள்) விளையாடும்.
முடிவில், புள்ளிப்பட்டியலில் முதல் 4 இடங்களைப் பெறும் அணிகள் அரையிறுதிக்கு முன்னேறும். பைனல் மும்பை, கோல்கட்டா, டில்லி என, ஏதேனும் ஒரு இடத்தில் 2014, மார்ச் 30ல் நடக்கவுள்ளது.

ரகசிய ஒப்பந்தம்
தொடரை நடத்தும் தனியார் நிறுவனம், 37 இந்திய வீரர்கள், 5 தேசிய வீரர்கள் (சையது ரகிம் நபி, கவுரமங்கி சிங், சஞ்சு பிரதான், நிர்மல் சேத்ரி, சுப்ரதோ பால்), பெய்லன் ஆரோஸ் கிளப் அணியின் 20 பேர் உள்ளிட்ட பலரை, ஏற்கனவே ரகசியமாக ஒப்பந்தம் செய்துவிட்டதாக தெரிகிறது. இத்துடன் மேலும் பல கிளப் அணிகள், தங்கள் வீரர்களை தரத் தயாராக உள்ளதாம்.

கேப்டன் சந்தேகம்
பொதுவாக இந்தியாவில் அக்டோபர் முதல் மே வரை ஐ-லீக் கால்பந்து போட்டிகள் நடக்கும். மொத்தம் 14 கிளப் அணிகள், தலா 26 போட்டிகளில் பங்கேற்கும். இந்நிலையில் கால்பந்து லீக் தொடரும் நடக்க இருப்பது, வீரர்களிடையே குழப்பத்தை ஏற்படுத்தியுள்ளது.
இது குறித்து இந்திய கால்பந்து அணியின் கேப்டன் சுனில் செத்ரி கூறுகையில்,""புதிய கால்பந்து லீக் தொடருக்கு சரியான திட்டம் வகுக்காதது போல உள்ளது. இத்தொடரை நடத்தும் தனியார் நிறுவனம் சில வீரர்களை மட்டும் ரகசியமாக ஒப்பந்தம் செய்ததாக தெரிகிறது. இப்போது எழுந்துள்ள சூழ்நிலை குறித்து பலரும் சந்தேகப்படுகின்றனர்,'' என்றார்.
தின மலர் ,,