பழனி கோயில் உண்டியல் காணிக்கை: 23 நாளில் ரூ.1.15 கோடி வரவு

பழனி மலைக் கோயில் உண்டியல்கள் கடந்த 23 நாள்களில் நிறைந்ததைத் தொடர்ந்து, அவை வியாழக்கிழமை திறக்கப்பட்டு எண்ணப்பட்டதில், காணிக்கை வரவு ரூ. 1.15 கோடியைத் தாண்டியுள்ளது.

உண்டியல்கள் கார்த்திகை மண்டபத்தில் வைத்து எண்ணப்பட்டன. இதில், பக்தர்கள் காணிக்கையாக செலுத்திய ரொக்கப் பணம் வரவு ரூ. 1 கோடியே 15 லட்சத்து 52 ஆயிரத்து 156 கிடைத்தது. உண்டியலில் பக்தர்கள் தங்கத்தாலான காசு, தாலி, செயின், வேல், உருவங்களும் மற்றும் வெள்ளியாலான வேல், உருவம், கொலுசுகள், பார் வெள்ளி, சுவாமி உருவம், கைவிலங்கு, காலணி போன்றவற்றையும் செலுத்தியிருந்தனர்.

அவற்றில், தங்கம் 614 கிராமும், வெள்ளி 5,415 கிராமும் கிடைத்தன. மேலும், மலேசியா, சிங்கப்பூர், அமெரிக்கா, இலங்கை உள்ளிட்ட பல்வேறு நாடுகளின் கரன்சிகள் 810 நோட்டுகள் கிடைத்துள்ளன.

இவை தவிர, ஏராளமான பக்தர்கள் பித்தளைப் பாத்திரங்கள், பட்டுப் புடவைகள், பரிவட்டங்கள், நவதானியங்கள், கைக்கடிகாரங்கள், ஏலக்காய் மாலைகள் உள்ளிட்டவை காணிக்கையாக செலுத்தப்பட்டிருந்தன.

உண்டியல் எண்ணிக்கையின்போது, பழனி கோயில் இணை ஆணையர் (பொறுப்பு) ராஜமாணிக்கம், திண்டுக்கல் இந்து சமய அறநிலையத் துறை உதவி ஆணையர் ரமேஷ், முதுநிலை கணக்கியல் அலுவலர் ஜெயப்பிரகாஷ் உள்ளிட்ட பலர் பங்கேற்றனர்.

உண்டியல் எண்ணிக்கையில், பழனியாண்டவர் மகளிர் கல்லூரி மாணவிகள், திருக்கோயில் பணியாளர்கள், தவில் மற்றும் நாதஸ்வரக் கல்லூரி மாணவர்கள், பழனி இந்தியன் வங்கி, பாரத ஸ்டேட் வங்கி, திண்டுக்கல் மாவட்ட மத்தியக் கூட்டுறவு வங்கி, சிட்டி யூனியன் வங்கி, இந்தியன் ஒவர்ஸீஸ் வங்கிகளின் பணியாளர்கள் என பலர் கலந்துகொண்டனர்.

திருப்பதி உண்டியலை பார்க்கும் போது இது ரொம்ப ரொம்ப கம்மி

இதுபோன்ற கோவில் உண்டியலில் உள்ள பணத்தை கொண்டு டாலர் மதிப்பை சரிக்கட்ட ஆலோசனை ஒன்று ஓடுவதாக தகவல்

கல்விக்குச் செய்யும் உதவி
கடவுளுக்குச் செய்யும் உதவி
இயன்றதைச் செய்வோம்
இல்லாதோர்க்கு