ரிசர்வ் வங்கியின் புதிய கவர்னராக தமிழர் ரகுராம் ராஜன் பொறுப்பேற்றார்

by ராஜு சரவணன் Thu Sep 05, 2013 10:13 am

மத்திய ரிசர்வ் வங்கியின் புதிய கவர்னராக ரகுராம் கோவிந்த் ராஜன் இன்று பொறுப்பேற்றுக் கொண்டார். மத்திய ரிசர்வ் வங்கியின் புதிய கவர்னர் பதவிக்கு நிதி அமைச்சகத்தின் தலைமை பொருளாதார ஆலோசகர் ரகுராம் கோவிந்த் ராஜன்(50) நியமிக்கப்பட்டார்.

இதையடுத்து ராஜன் ரிசர்வ் வங்கியின் புதிய கவர்னராக இன்று பொறுப்பேற்றார். மும்பை மின்ட் தெருவில் உள்ள ரிசர்வ் வங்கி அலுவலகத்திற்கு வந்த ராஜனுக்கு உற்சாக வரவேற்பு அளிக்கப்பட்டது. அவரிடம் தனது பொறுப்புகளை முன்னாள் கவர்னர் சுப்பாராவ் ஒப்படைத்தார்.

ராஜன் ரிசர்வ் வங்கி கவர்னராக 3 ஆண்டுகள் பதவியில் இருப்பார். ரிசர்வ் வங்கியின் இளம் கவர்னர் இவர் தான் என்பது குறிப்பிடத்தக்கது.

தமிழரான ராஜன் டெல்லி ஐஐடி, அகமதாபாத்தில் உள்ள ஐஐஎம் ஆகிய இடங்களில் படித்துவிட்டு அமெரிக்காவில் உள்ள மசாசுசெட்ஸ் இன்ஸ்டிடியூட் ஆப் டெக்னாலஜியில் பிஹெச்டி பட்டம் பெற்றவர். கடந்த ஆண்டு ஆகஸ்ட் மாதம் அவர் நிதி அமைச்சகத்தில் சேர்ந்தார்.

கடந்த 2003ம் ஆண்டு அக்டோபர் மாதம் முதல் 2006ம் ஆண்டு டிசம்பர் மாதம் வரை அவர் சர்வதேச பொருளாதார நிதியத்தின் தலைமை பொருளாதார நிபுணராக இருந்துள்ளார். முன்னதாக பண வீக்கத்தை கட்டுப்படுத்த அவர் அளித்த பரிந்துரைகளை மத்திய ரிசர்வ் வங்கி ஏற்று அமல்படுத்தியது. அவர் ஏற்கனவே பல பொருளாதார ஆலோசனைக் குழுக்களில் இருந்துள்ளார்.

இந்திய ரூபாயின் மதிப்பு வரலாறு காணாத அளவுக்கு வீழ்ச்சி அடைந்துள்ள நேரத்தில் அவர் ரிசர்வ் வங்கியின் கவர்னராக பொறுப்பேற்றுள்ளார். அவர் இந்திய பொருளாதாரத்தை சீர்படுத்த பல அதிரடி நடவடிக்கைகளை எடுப்பார் என்று நம்பப்படுகிறது.

ரகுராம் ராஜன் எதிர்கொள்ளபோகும் சவால்கள்!!!
1) வளர்ச்சி Vs பணவீக்கம்

ரகுராம் ராஜன் பொருளாதார வளர்ச்சியையும் பணவீக்கதையும் எவ்வாறு ஒருசேர கையாளப் போகிறார் என்பதை முடிவு செய்ய வேண்டும். நுகர்வோர் விலை குறியீட்டு பணவீக்கம் (CPI Inflation) இரட்டை இலக்கத்தை தொடும் நிலையில் உள்ளது. மொத்த விலை குறியீட்டு பணவீக்கம் (WPI Inflation) நான்கு ஆண்டு வீழ்ச்சியில் உள்ளது. ரெப்போ வீதத்தை (repo rates) குறைப்பது வளர்ச்சிக்கு உதவும், ஆனால் பணவீக்கத்தை அதிகரித்துவிடும். மிகவும் தர்மசங்கடமான நிலை ரகுராம் ராஜன் கண்முன்னே உள்ளது.

2) அந்நிய செலாவணிச் சந்தையின் விஸ்வரூபம்!!

ரூபாயின் மதிப்பு வரலாறு காணாத வீழ்ச்சியைச் சந்தித்துக்கொண்டிருக்கும் இச்சூழலில் சந்தையில் பதற்றத்தைத் தணித்து அமைதியை நிலைநாட்டுவது முக்கிய சவாலாகும். ரூபாயின் மதிப்பை அதிகரிப்பதைவிட, சந்தையில் நிலவும் பதற்றத்தைக் குறைத்து அந்நிய முதலீட்டார்களின் பயத்தை நீக்குவது மிக முக்கியமான பணியாகும்.

3) புதிய வங்கியின் உரிமங்கள்

ரகுராம் ராஜன் புதிய வங்கி உரிமம் மற்றும் அதனுடன் தொடர்புடைய பணிகளையும் மேற்பார்வையிட வேண்டும். எனினும் எளிதான பணி போல தோன்றினாலும், இந்த நிச்சயமாக ஒரு எளிதான பணி அல்ல.

4) முதலீட்டை ஊக்கப்படுத்த வேண்டும்

ராஜன் ரூபாயின் வீழ்ச்சியைத் தடுக்க டாலர் முதலீட்டை ஊக்குவிக்கும் செயல்களையும் செய்யவேண்டும். கடந்த சில மாதங்களில் , பில்லியன் கணக்கான டாலர்கள் இந்திய பங்கு மற்றும் கடன் சந்தைகளில் இருந்து வெளியேறிவிட்டது.

5) பொருளாதார வளர்ச்சியின் வீழ்ச்சி

கடந்த பத்தாண்டுகளில் இல்லாத அளவுக்கு இப்போது பொருளாதார வளர்ச்சி வீழ்ச்சி அடைந்துவிட்டது. பணவியல் கொள்கைகளின் ஊடாக ரகுராம் ராஜன் வளர்ச்சியை அதிகரிக்க உதவினாலும், பெரும்பான்மையான பொறுப்பு அரசாங்கத்தின் கைகளில் உள்ளது

நன்றி தமிழ்.குட்ரிட்டர்ன்.இன்

by ராஜு சரவணன் Thu Sep 05, 2013 10:20 am

ஆனால் இவருடைய சீர்திருத்த நடவடிக்கை பற்றி பேட்டி ஒன்றில் இவர் சொன்ன சீர்திருத்த திட்டங்கள் நடுத்தர வர்க்கதினரை மேலும் வேதனைக்கு உள்ளாக்கும்படி இருக்கும் என தெரிகிறது.

by யினியவன் Thu Sep 05, 2013 10:26 am

காத்திருப்போம் அவர் செயல் காண

by பூவன் Thu Sep 05, 2013 10:33 am

ராஜு சரவணன் wrote:ஆனால் இவருடைய சீர்திருத்த நடவடிக்கை பற்றி பேட்டி ஒன்றில் இவர் சொன்ன சீர்திருத்த திட்டங்கள் நடுத்தர வர்க்கதினரை மேலும் வேதனைக்கு உள்ளாக்கும்படி இருக்கும் என தெரிகிறது.

நடுத்தர மக்கள் மேலும் நலிவடையாமல் இருந்தால் சரி ...
இவர்கள் சாதனை பசிக்கு நடுத்தரம் சோதனை அடையாமல் இருந்தால் சரி .