செம்மொழித் தமிழாய்வு நிறுவனத்துக்கு நிரந்தர இயக்குநரை நியமிக்க வேண்டும்

புது தில்லி / 07 September 2013 / செம்மொழித் தமிழாய்வு மத்திய நிறுவனத்துக்கு (சிஐசிடி) நிரந்தர இயக்குநர் நியமிக்கவும், அதிக நிதி கிடைக்கவும் மத்திய அரசை வலியுறுத்த வேண்டும் என்று தமிழக முதல்வர் ஜெயலலிதாவுக்கு தென்காசி தொகுதி மக்களவை உறுப்பினர் பி. லிங்கம்(படம்) வியாழக்கிழமை கடிதம் எழுதியுள்ளார். அதில் கூறியிருப்பதாவது:

"மிகவும் தொன்மையான பத்து வழக்கு மொழிகளில் தமிழ் மொழியும் ஒன்று.

அத்தகைய மொழியை முழு மனது இல்லாமல் மத்திய அரசு செம்மொழியாக அறிவித்து, செம்மொழி மையத்தையும் உருவாக்கியது.

அந்த மையம் அடிக்கடி இடம் மாறிக்கொண்டே இருக்கிறது. அதற்கான நிதியும் ரூ. 14 கோடியில் இருந்து தற்போது ரூ. 4 கோடியாக குறைக்கப்பட்டுள்ளது. அதனால் தமிழ் மொழி வளர்ச்சிப் பணிகள் நடைபெறாமல் உள்ளன.

செம்மொழி மையத்துக்கு முழு நேர இயக்குநர் நியமிக்கப்படாததால் சரியான தலைமை இல்லாமல் மையம் செயல்படுகிறது.

இந்த விவகாரத்தில் மத்திய அரசு தனது பாராமுகப் போக்கை மாற்றிக் கொள்ள வேண்டும். அது உங்களால்தான் முடியும். தமிழ் மொழிக்கு செம்மொழித் தகுதி கிடைக்க முதலில் குரல் கொடுத்தவர் நீங்கள்தான்.

எனவே, செம்மொழி மையத்துக்கு நிரந்தர இயக்குநர் நியமிக்கவும், அதன் வளர்ச்சிப் பணிகளுக்கு அதிக நிதி கிடைக்கவும் மத்திய அரசை வலியுறுத்த வேண்டும்' என்று கடிதத்தில் லிங்கம் கேட்டுக் கொண்டுள்ளார்.