Varicose veins - வெரிகோஸ் வெயின்

by **சிவா** Sun Sep 01, 2013 8:51 am

ஆண், பெண் இருவருக்குமே பொதுவாக இருக்கும் ஒரு பிரச்னை வெரிகோஸ் வெயின்! அதாவது கால்களில் நரம்புகள் சுருண்டு பார்ப்பதற்கு பாம்பு போல் நெளிந்து காணப்படுவதுதான். இந்தப் பிரச்னையில் பாதிக்கப்பட்டவர்கள் மிகுந்த வலிக்கு உள்ளாகிறார்கள் என்பது உண்மை.

வெரிகோஸ்வெயின் கால்களில் மட்டுமே வரக்கூடியது. இதயத்திலிருந்து மகாதமனி வழியாக வரும் சுத்தமான ரத்தம் கால்களில் காணப்படும் சிறிய ரத்தக் குழாய்களில் சென்று மீண்டும் அதே வழியில் பயணம் செய்து புவிஈர்ப்பு விசைக்கு எதிராக இதயத்தை நோக்கிச் செல்லவேண்டும் என்பது நியதி. இந்தச் சிறிய ரத்தக் குழாய்களில் ஆங்காங்கே இருக்கும் வால்வுகளைத் தாண்டி ரத்தம் செல்ல முடியாத நிலை ஏற்படும்போது வெரிகோஸ்வெயின் பிரச்னை உண்டாகிறது. பொதுவாக இந்த வால்வுகளானது ரத்தம் செல்லும்போது, “ஒரு வாசலின் இரண்டு தானியங்கி கதவுகள்’ போல செயல் படுகின்றன. ரத்தம் வந்ததும் உள்ளே அனுப்பிவிட்டு சட்டென்று மூடிக்கொள்ளும். பிறகு அந்த ரத்தம் அடுத்த வால்வுக்குச் சென்று, மீண்டும் அங்கிருந்து இன்னொரு வால்வுக்குச் செல்வது என தனது பிரயாணத்தைத் தொடரும். திறந்து மூடிக் கொள்ளும் இவ்வால்வுகள் திறந்தே இருக்கும் நிலை ஏற்பட்டால், ரத்தம் இதயத்தை நோக்கி மேலே செல்வதற்கான போதிய அழுத்தம் இல்லாமல் போகிறது. இதனால் ரத்தம் மீண்டும் இதயத்துக்கு திரும்ப முடியாத நிலை உண்டாகிறது. அதோடு அந்தச் சிறிய ரத்தக் குழாயிலேயே ரத்தம் ஒரே இடத்தில் தேங்கி நின்றுவிடுகிறது. அப்படி அந்த இடத்திலேயே ரத்தம் மீண்டும் மீண்டும் சேரும் நிலை ஏற்படும்போது அது பழுதாகி விடுகிறது. மேலும் நாளடைவில் பெரிதாகி சுருண்டும் விடுகின்றன. இதைத்தான் வெரிகோஸ்வெயின் என்கிறோம்.

வெரிகோஸ்வெயின் பிரச்னையால் ஆண்களைக் காட்டிலும் பெண்கள்தான் அதிகம் பாதிக்கப்படுகிறார்கள். கர்ப்பகாலத்தின் போது, அவர்களது உடல் எடை கூடுதலாகி கீழ்நோக்கி அழுத்தம் ஏற்படுவதால், ரத்த ஓட்டம் தடைப்பட்டு வெரிகோஸ்வெயின் வருவதற்கு ஏதுவாகிறது. டெலிவரிக்குப் பிறகு இந்த வெரிகோஸ் வெயின் தானாகவே சரியாகும் வாய்ப்பு இருக்கிறது. பிரசவ காலத்திலும், டெலிவரிக்குப் பிறகும் கால் உறைகளை அணிந்துக் கொள்வதால் இதனைத் தவிர்க்கலாம். இப்படிச் செய்வதால், சுருங்கி பழைய நிலைக்கு வரும் சாத்தியக்கூறு உண்டு. இதுபோல் செய்யாததால்தான் நிறைய பேருக்கு வெரிகோஸ்வெயின் சரியாகாமல் பிரச்னை பெரிதாகிறது.

இந்த நோயால், நிற்கும்போது கால்களில் வலி, வீக்கம் போன்றவை ஏற்படும். கால் சருமத்தில் கறுப்பான திட்டுகள் மற்றும் கால்களில் புண்கள் உண்டாகும்போது அலட்சியப்படுத்தாமல் உடனடியாக சிகிச்சை எடுத்துக் கொள்ள வேண்டம். கால்களில் ரத்தம் தேங்கி உறைந்து விடம்போது சருமத்தில் கருப்பாகத் தெரிவதுடன், அரிப்பும் இருக்கும். அதை அழுத்தமாக சொரிந்து விட்டாலோ ரத்தம் பீய்ச்சி அடிக்கும். இதுபோன்ற சமயத்தில் அதற்கு நிரந்தர தீர்வாக, அறுவை சிகிச்சை செய்து பழுதான ரத்தக் குழாயை அகற்றி விடுவார்கள்.

நவீன லேசர் சிகிச்சை முறையின் மூலமாக கத்தியின்றி ரத்தமின்றி, பழுதான ரத்தக்குழாயானது முழுவதுமாக சுட்டெரிக்கப்பட்டு விடுவதும் உண்டு. சில நோயாளிகளுக்கு அவர்களது நோயின் தாக்கத்தைப் பொருத்தே நோயாளிகளுக்கான சிகிச்சை முடிவு செய்யப்படும்.

பொதுவாக அதிக நேரம் நின்று கொண்டே வேலை செய்பவர்கள், அதிக எடையுள்ளவர்கள், கால்களை அசைக்காமல் உட்கார்ந்தே நீண்ட நேரம் பணியாற்றுபவர்கள், பிரசவம் ஆன பெண்கள், காவல் துறையினர், ஆசிரியர்கள், ஹோட்டலில் பணிபுரிபவர்கள் போன்றவர்களுக்கு வெரிக்கோஸ் வெயின் பிரச்னை அதிகமாக இருக்கிறது.

by **சிவா** Sun Sep 01, 2013 8:51 am

இத்தகையோர் முன்னெச்சரிக்கையாக இருந்து இதன் தாக்கத்தைக் குறைக்க சில டிப்ஸ்:

* குறிப்பாக, ஓய்வாக இருக்கும்போது கால்களை உயரமாக தூக்கி வைத்துக் கொள்வது நல்லது. இதனால் கால்களிலிருந்து இதயத்துக்கு ரத்தம் சீராகச் செல்லும் வாய்ப்பு அதிகம். அதனால் வெரிக்கோஸ் வெயின் பாதிப்பைக் குறைக்கலாம்.

* வெரிகோஸ்வெயின் காணப்படும் இடங்களில் காலைச் சுற்றி பாண்டேஜ் போட்டுக் கொள்வது நல்ல பலனை அளிக்கும்.

* கால்களில் இறுக்கமான காலுறைகளை அணிவது உடனடி பலனைக் கொடுக்கும்.

* விமானப் பயணத்தின் போதும் உட்கார்ந்து வேலை செய்யும்போதும் கால்களைத் தையல் மெஷினில் வேலை செய்வதுபோல் ஆட்டிக் கொண்டே இருப்பது நல்லது.

அப்பல்லோ மருத்துவமனை - சீனியர் கன்சல்டண்ட் வாஸ்குலர் சர்ஜன், டாக்டர். என். சேகர்

by **T.N.Balasubramanian** Sun Sep 01, 2013 9:45 am

நல்ல பயனுள்ள தகவல், சிவா . நீண்ட நாளைய சந்தேகங்கள் தீர்ந்தன. லேசர் சிகித்சை புதிய தகவல்.

ரமணியன்.

by **SajeevJino** Sun Sep 01, 2013 11:13 am

இதை அங்காடி தெரு திரைப் படத்தில் அழகாகக் கூறியிருப்பார்கள்

by **Muthumohamed** Sun Sep 01, 2013 12:07 pm

பயனுள்ள பதிவு நான் நிறைய பேர்களை வெறிகோஸ் நோயுடன் பார்த்துள்ளேன்

லேசர் சிகிச்சை நல்லது தான் ஆனால் பணம் நிறைய செலவாகிறது. லேசர் சிகிச்சை மூலம் சில மணி நேரங்களில் வெறிகோஸ் சரியாகிவிடுகிறது