தேன் மருத்துவம்

by **சிவா** Wed Aug 28, 2013 3:19 am

தேன் சுவையைப் பிறந்த குழந்தையும் அறியும். தேனில் குழைத்த சூரணத்தை அடம்பிடிக்காமல் முகம் சுளிக்காமல் உண்ணும் குழந்தைகளைக் காண்கிறோம். அம்மா பாலாடையை (சங்கை) எடுத்தாலே அரை கிலோ மீட்டர் ஓடும்

குழந்தைகள்கூட தேன் சுவையில் மயங்கும். தேன் குடித்த வண்டு மயங்குவதும், கரடி தேனைத் தேடி தேன் கூட்டைப் பிழிந்து, தேனீயின் கொட்டலையும் பொருட்படுத்தாமல் தேனை நாக்கினால் நக்கி (ஈக்களையும் சேர்த்து) சுவைக்கும் காட்சிகளைக் கவிஞர்கள் பாடல்களில் பார்க்கிறோம். 'பாலும் தெறிதேனும் பாகும் பருப்பும் இவை நான்கும் கலந்து நானுனக்குத் தருவேன் -வினாயகனே! அதற்குப்பதில் சங்கத் தமிழ் மூன்றும் தா' என்று நாலைத் தந்து மூன்றைப் பெறும் தந்திர பேரத்தையும் ரசிக்கிறோம். இதே வரிசையில் 'தேனார் அமுதே சிவபுரனே என்று மாணிக்கவாசகரும், முக்கனி பிழிந்து வடிகட்டி பின் தேன் சேர்த்து ஸ்பெஷல் கலவை தயாரிக்கிற வள்ளலாரும் தேன் சுகம் கண்டவர்கள். வாரியாரும், கண்ணதாசனும் மலரும் நினைவுகளில் களித்தேன், சுவைத்தேன், பார்த்தேன், படித்தேன் என சொல்லுக்குத் தேனூட்டுவதையும் பார்க்கிறோம்.

தேனில் அப்படி என்ன விசேஷம்? இனிப்புத் தானே! ஆமாம். ஆனால் அந்த இனிப்பைப் பூக்களிலிருந்து தேர்ந்தெடுத்து ரசாயனக் கலவை செய்து சேமிக்கும் தேன் ஈக்களின் chemistry , இன்னமும் புரியாத புதிர்தான்.

தேன் நிறம் புதியதில் இள மஞ்சள். நாட்பட்ட தேன் கருமை கலந்த மஞ்சளாக மாறும். தேனின் மணம், ருசி, குணம்,புஷ்பங்களுக்குத் தக்கவாறு, காலதேசங்களுக்கு எற்றவாறு வித்தியாசப்படும்.

தேன் 12 நாழிகையில் செரிந்து உடலுக்குப் பலத்தைக் கொடுக்கிறதெனச் சித்த மருத்துவம் கூறுகிறது. ஐந்து வகைத் தேன்களில் மலைத்தேன் கபகாசம், இரைப்பு, விக்கல், கண் எரிச்சல், சுரம் இவைகளைப் போக்கும். கொம்புத் தேன் ருசியின்மையை நீக்கும். மரபொந்துத் தேன் பசியைத் தூண்டும்.புற்றுத் தேனை அருந்தினால் கண்ணோய்கள் போகும். கபபோய்களும் அடங்கும். தோல் நோய்களுக்கு மனை (வீட்டு) தேன் சிறப்பாகும்.

புதிய தேனைச் சுவைத்தால் ஆயுள்விருத்தியாகும். உடலுக்கு ஒளியூட்டும். பழைய தேன் வீணாகிறதே என்று உபயோகித்தால், வாதரோகங்கள் ஏற்படுத்துவதுடன், அத்துடன் சேர்க்கும் மருந்துகளையும் கெடுக்கும்.

Apis Mellifica Apis Indka Apis Flora Apis Dorsata என்பன தேனீக்களின் விலங்கினப் பெயர்கள். Hymenoptera குடும்பத்தைச் சேர்ந்தது. Mel என்றால் தேன். Latin மொழியில் இச்சொல்லிலிருந்துதான் melody தேனிசை பிறந்தது. பாரதி சொன்ன, "இன்பத்தேன் வந்து பாயுது காதினிலே" நினைவுக்கு வருகிறது. மது - வடமொழி , மாஷிகா என்றும் கூறுவர். அரபியில் இன்ஜுடான் என்பார்கள்.

தேன் : பழச்சர்க்கரை (Levulose), திராட்சிச் சர்க்கரை (Deztrose/Grapesugar), மெழுகு, எண்ணெய்ப் பசை (Volatile Oil) புரதம் (Protein) வழவழப்பு (Musilage) பார்மிக் அமிலம் (formic acid) நிறப்பொருள் (colowring matter). இவைதான் தேனின் அமைப்பு. மனித உடலில் உள்ள மூலப்பொருள்கள் அனைத்தும் சிறு சிறு அளவுகளில் தேனில் உள்ளது. மனிதனுக்கு என்றே கடவுள் அளித்த வரப்பிரசாதம் தேன்.

சில தேனான குறிப்புகள் :

தேன் ஒரு ரெடிமேட் உணவு! உடனே ஆக்ஷன்! வலுவிழந்தவர்கள், நோயாளிகள் கவனிக்கவும். தேனும் எலுமிச்சைச் சாறும் உள் சுரப்பிகளுக்கு வலுவூட்டும் நல்ல soft drink! குழந்தைகள் முதல் முதியோர் வரை உள்ள சுரப்பிப் பிரச்சனைக்குத் தீர்வு தேன். ஒரு டம்ளர் குளிர்ந்த நீரும், இரண்டு டீஸ்பூன் தேனும் பருகுகுங்கள்! சுகமான நித்திரை. தூங்காமல் சிணுங்கும் குழந்தைகளுக்கும் இது காம்போஸ் மாதிரி!

தேனில் உள்ள கொழுப்பு அமிலங்கள் (fatty acid) பசியைத் தூண்டி விரைவாக உணவைச் செரிக்கச் செய்வதுடன், மலமிளக்கியாகவும் செயல்படுகிறது. (பசியாதோர், செரியாதோர் கவனிக்கவும்.)

தேன் உதிரப்போக்கை (Bleeding) கட்டுப்படுத்தும். தேனும், சுண்ணாம்பும் குழைத்துத் தடவி ரத்தப் பெருக்கை நிறத்துவது பாட்டி வைத்யம். "அறுத்த கைக்குச் சுண்ணாம்பு கூட கொடுக்க மாட்டான் கஞ்சப் பயல்" என்பது தெரிந்தவர்கள் மொழி. அப்படிப்பட்டவன் தேன் வேறு சேர்த்துக் கொடுப்பானா!

தேனும் பார்லி வேகவைத்த நீரும் கலந்து கொடுக்க மலச்சிக்கல் வயறு பொருமல் இரைப்பிருமல் ஜலதோஷம் தொண்டைக்கட்டு, தொண்டைப்புண் (pharyntitis, laryngitis) நீங்கும்.

இதய நோயாளிகளுக்குத் தேன் சிறந்த மருந்து. என டாக்டர் G.N.N.தாமஸ் கூறுகிறார். இதயத்தின் தசைகள் களைப்படைவதால் இதயச் சோர்வு ஏற்பட்டு Ischemia, Infarction எனும் அபாய நிலை வரலாம். தேன் அதைத் தடுத்து ஆட்கொள்ளும் என்கிறார் இதய நோய் நிபுணர். முதியோர்களே! தேன் அருந்துங்கள்! உங்கள் இதயச் சுமையை இறக்கி இளைப்பாருங்கள்!

சர்க்கரை நோயாளிகள் (Diabetic) கூட தேன் அருந்தலாம் அளவுடன். அது அவர்களுடைய அடிப்படைத் தேவைக்கான சக்தியைக் (Basal meta bolic rate) கொடுக்கிறது என மருத்துவர்கள் தேனைப் பரிந்துரைக்கிறார்கள்.

தலைவலி திருகுவலி (Migraine) போகவேண்டுமானால் தேனும், சுண்ணாம்பும் குழைத்து இரு பொட்டுகளிலும் (Templeregion) தடவுங்கள். தீயினால் சுட்ட புண்கள் தேனுக்குப் பணிந்து உங்கள் பட்டுப் போன்ற சருமத்தை மீண்டும் அளித்துவிடும்.

தேனும் கரித்தூளும் (charcoal) கலந்து பல்துலக்க, பளிங்குப் பற்களுடன் நீங்கள் சிரித்து மகிழலாம்.

முலைக்காம்பு விரணத்திற்குத் (Crack Nipple) தேன் தடவ சுகமான தீர்வுகள் தாய்'மார்'களுக்குக் கிடைக்கும்.பிரசவித்த பெண்கள் பத்து நாட்களுக்கு வெந்நீர் கலந்த தேனை உட்கொள்ள கருப்பை உரமாகி தேக ஆரோக்யம் ஏற்படும்.

தேன் உறைந்து கற்கண்டு போல ஆவதுண்டு. அதை அருந்தினால் நல்ல குரல் வளமுண்டாகும். பாடகர்களுக்கு ஒரு வரப்பிரசாதம்!

முக வசீகரத்திற்கு ஒரு அட்வைஸ். முகத்தில் கரும்புள்ளி கருவளையம் இருக்கிறதா! கவலை வேண்டாம். தேனைத் தடவுங்கள். அரை மணி அல்லது ஒரு மணி கழித்து வெந்நீரால் முகத்தைக் கழுவி நல்ல துணியால் ஒற்றிவிடுங்கள். மாசுமறுவற்ற முகத்துடன் மலர்வீர்கள்.

தேனையும் நெய்யையும் சம அளவில் சேர்த்து அருந்தினால் விஷமாகும் என்கிறது சித்த மருத்துவம்.

- டாக்டர் ஜே.ஆர்.கிருஷ்ணமூர்த்தி