மூட நம்பிக்கைக்கு எதிராக மகாராஷ்டிரா அரசு அவசர சட்டம்

புனே: மகாராஷ்டிராவில், மூட நம்பிக்கைகளுக்கு எதிராக குரல் கொடுத்து வந்த சமூக ஆர்வலர், மர்ம நபர்களால் சுட்டுக் கொல்லப்பட்டார். இதனை கண்டித்து புனேயில் மக்கள் போராட்டம் வெடித்துள்ளது. இந்நிலையில் மூட நம்பிக்கைக்கு எதிராக அவசர சட்டத்திற்கு அம்மாநில அமைச்சரவை ஒப்புதல் வழங்கியது.

சமூக ஆர்வலர் சுட்டுக்கொலை

மகாராஷ்டிரா மாநிலம் புனேவை சேர்ந்தவர் நரேந்திர தபோல்கர்(69). "சாதனா' என்ற பத்திரிகையின் ஆசிரியராக பணியாற்றிய இவர், மூடநம்பிக்கைகளுக்கு எதிரான கருத்துக்களை அதிகம் எழுதி வந்தார். மேலும், பொதுக்கூட்டங்கள் மூலமும் மூட நம்பிக்கைகளுக்கு எதிரான கருத்துக்களை பிரசாரம் செய்து வந்தார்.

இவரின் இந்த செயலுக்கு ஆதரவும், எதிர்ப்பும் இருந்தது. இந்நிலையில் நேற்று காலை, ஓம்காரேஷ்வர் என்ற இடத்தில், குண்டுக் காயங்களுடன் தபோல்கர் ரத்த வெள்ளத்தில் கிடந்தார். போலீசார், இவரை மீட்டு மருத்துவமனையில் அனுமதித்தனர். எனினும், சிகிச்சை பலனின்றி தபோல்கர் இறந்தார். இது குறித்து, போலீசார் வழக்குப் பதிவு செய்து விசாரணை நடத்தி வருகின்றனர்.

மூட நம்பிக்கைக்கு எதிராக அவசர சட்டம்

இந்நிலையில் நரேந்திரா த‌ோபல்கர் சுட்டுக்கொல்லப்பட்டதை கண்டித்து இன்று பொதுமக்கள் கண்டன ஆர்ப்பாட்டம் நடத்தினர். புனேயில் பந்த்திற்கு அழைப்புவிடுக்கப்பட்டது. நிலைமை தீவிரமடைந்ததால், முதல்வர் பிருதிவ்ராஜ் சவான், அமைச்சரவைக்கூட்டத்தை கூட்டி ஆலோசித்தார். இதில் தபோல்கரின் மூடநம்பிக்கைக்கு எதிரான கருத்துக்கள் கொண்ட , ‌‌தபோல்கர் வரைவு மசோதா தயாரிக்கப்பட்டது. இந்த மசோதாவில், மூட நம்பிக்கைக்கு எதிராகவும், செய்வினை மற்றும் சித்துவேலை செய்து மக்களை ஏமாற்றுவது ஆகியன சட்டவிரோதம் என வலியுறுத்தப்பட்டு, வரைவு தயாரிக்கப்பட்டது. அந்த அவசர சட்டத்திற்கு அமைச்சரவை இன்று ஒப்புதல் வழங்கியது.

இதற்கிடையே சுட்டுக்கொல்லப்பட்ட நரேந்திரா தபோல்கருக்கு சில அமைப்புகளிடமிருந்து மிரட்டல் வந்ததாக போலீசார் தெரிவித்துள்ளனர். கொலையாளி குறித்து வரைபடம் ஒன்றையும் வெளியிட்டுள்ளனர். மூடநம்பிக்கை மேல் அதீத நம்பிக்கை கொண்டவர்கள் தான் இவரை கொலை செய்திருக்கலாம் எனவும் போலீசார் தெரிவித்துள்ளனர்.

தினமலர்

இந்தியா முழுவதும் இந்த சட்டம் கொண்டு வருவது நன்றாக இருக்கும்

காரணம் அனைத்து இடங்களிலும் மூடநம்பிக்கை தழைத்து இருக்கிறது