இசையின் மூலம் திருக்குறளை கற்பிக்க வேண்டும்!

மாணவர்களுக்கு இசையின் மூலம் திருக்குறளைக் கற்பிக்க வேண்டும் என சென்னைப் பல்கலைக்கழகத் துணைவேந்தர் தாண்டவன் தெரிவித்தார்.

சென்னை மேற்கு பகுதி சிபிஎஸ்இ சஹோதயா பள்ளி குழுமம் சார்பில் ஆசிரியர் தின விழா, சென்னை அரும்பாக்கத்தில் உள்ள கோல பெருமாள் செட்டி வைஷ்ணவ பள்ளியில் நடைபெற்றது.

இந்த விழாவில் சிறப்பாகப் பணியாற்றிய 18 ஆசிரியர்களுக்கு விருதுகளை வழங்கி துணைவேந்தர் தாண்டவன் பேசியதாவது:

விருதுகள் வாங்கிய ஆசிரியர்கள் மேலும் தங்களை வளர்த்துக் கொண்டு தேசிய அளவில் விருதுகளை வாங்க வேண்டும். வலியும் தியாகமும் இல்லாமல் சாதனைகள் இல்லை என்று டாக்டர் ராதாகிருஷ்ணன் கூறியதற்கு பொருத்தமாக ஆசிரியர்களாகிய நாம் நடந்து கொள்ள வேண்டும்.

இசை அனைத்து மனித இனத்துக்கும் பொதுவான மொழியாகும். இசையின் மூலம் நல்ல பல கருத்துகளை அனைத்து விதமான மனிதர்களுக்கும் கொண்டு செல்ல முடியும். ஆகையால் திருக்குறளை இசையின் மூலம் 1 ஆம் வகுப்பு முதல் 10 ஆம் வகுப்பு வரை உள்ள மாணவர்களுக்கு இசை ஆசிரியர்கள் கற்றுத்தர வேண்டும்.

மாணவர்கள் பள்ளிக் கல்வியை முடித்துவிட்டு செல்லும் போது திருக்குறளில் உள்ள அனைத்து பாடங்களையும் நன்கு அறிந்து, அதனை தங்களது வாழ்வில் பயன்படுத்தி முன்னேற முடியும்' என்றார்.

விழாவில் கோல பெருமாள் செட்டி வைஷ்ணவ பள்ளியின் முதல்வர் எல்.நீலகண்டன் வரவேற்றார்.

கீழ்ப்பாக்கம் ராஜாஜி வித்யாஸ்ரம பள்ளியின் முதல்வர் அஜித் பிரசாத் ஜெயின் மற்றும் பல்வேறு சிபிஎஸ்இ பள்ளிகளைச் சேர்ந்த ஆசிரியர்கள் கலந்துகொண்டனர்.