பத்தே நிமிடத்தில் மணியார்டர்!

**சாமி** · **சாமி** Sat 17 Aug 2013 - 17:41

பத்தே நிமிடத்தில் பணம் அனுப்ப வசதியாக உடனடி மணியார்டர் சேவையை அறிமுகம் செய்துள்ளது இந்திய தபால்துறை.. இச்சேவை ‘ஐ.எம்.ஓ.’ (Instant Money Order) என்று சுருக்கமாக அழைக்கப்படுகிறது.

சாதாரண மணியார்டரில் பணம் அனுப்பினால் பணம் போய்ச் சேர இரண்டு அல்லது மூன்று நாட்கள் ஆகும். தவிர, அதற்கான சேவைக் கட்டணமும் அதிகம். ஐ.எம்.ஓ. மூலம் அனுப்பினால் நேரமும் மிச்சம். கட்டணமும் குறைவு. இந்தியாவில் இருக்கும் எந்த ஐ.எம்.ஓ. தபால் அலுவலகத்திலும் பணம் அனுப்பவோ, பெறவோ முடியும் என்பது இதன் சிறப்பு.

எப்படி அனுப்புவது?

ஐ.எம்.ஓ. உள்ள தபால் அலுவலகத்தின் ஐ.எம்.ஓ கவுண்டரில் டி.ஆர்.பி-1 (To Remit Payment) என்ற விண்ணப்பத்தைப் பூர்த்தி செய்து கொடுக்கவேண்டும். அதற்கு ரசீது ஒன்று கொடுப்பார்கள். அதில் 16 இலக்க ரகசிய எண் குறிப்பிடப்பட்டிருக்கும். அந்த எண் ரசீது கொடுக்கும் தபால் ஊழியருக்குக்கூட தெரியாது. அந்த ரசீதைப் பிரித்து அதிலிருக்கும் 16 இலக்க எண்ணை யாருக்கு பணம் அனுப்புகிறோமோ அவருக்கு குறுஞ்செய்தியாகவோ, தொலைபேசி வாயிலாகவோ, மின்னஞ்சல் மூலமாகவோ அனுப்பிவிட வேண்டும்.

எப்படி பெறுவது?

ஐ.எம்.ஓ.வின் 16 இலக்க ரகசிய எண் கிடைக்கப்பெற்றதும் குறிப்பிடப்பட்ட தபால்நிலையத்தில் டி.எம்.பி-1 (To Make Payement) என்ற விண்ணப்பத்தைப் பூர்த்தி செய்து உரிய அடையாள அட்டையின் நகல் ஒன்றையும் இணைத்துக் கொடுக்க வேண்டும். இம்முறையில் 1000 ரூபாயில் இருந்து 50,000 ரூபாய் வரை பணம் அனுப்ப முடியும். தபால் அலுவலக சேமிப்புக் கணக்கிலும் பெற்றுக் கொள்ளலாம்.

எவ்வளவு கட்டணம்?

10,000 ரூபாய் வரைக்கும் 100 ரூபாய் கட்டணமும், 10,001 ரூபாய் முதல் 30,000 ரூபாய் வரை 110 ரூபாய் கட்டணமும், 30,001 ரூபாய் முதல் 50,000 வரை 120 ரூபாய் கட்டணமும் வசூலிக்கப்படும்.

அடையாள அட்டை விவரம்

கடவுச் சீட்டு, ஓட்டுநர் உரிமம், வாக்காளர் அடையாள அட்டை, பான் கார்டு, பணம் பெறுபவரின் புகைப்படத்துடன் கூடிய குடும்ப அட்டை, தபால் அலுவலகத்தின் அடையாள அட்டை, அலுவலக அடையாள அட்டை, பள்ளி/கல்லூரி அடையாள அட்டை ஆகியவை.

செய்தி அனுப்ப முடியுமா?

பணம் பெறுபவருக்கு ஏதேனும் வாழ்த்தோ, செய்தியோ கூறவேண்டுமானால் தபால் துறை வைத்திருக்கும் நிலையான செய்திகளில் (Standardised Messages) இருப்பவற்றில் தேவையானதைக் குறிப்பிடலாம். இதற்கு கட்டணம் இல்லை. பிறந்தநாள் வாழ்த்து என்றால் 05, பொங்கல் வாழ்த்து என்றால் 09 என்று ஒவ்வொரு வாழ்த்துக்கும் கொடுக்கப்பட்டிருக்கும் எண்ணை பணம் அனுப்பும் விண்ணப்பத்தில் குறிப்பிட்டால் போதும். இதுபோல் மொத்தம் 33 செய்திகள் உள்ளன.

இந்தியாவின் 22 மாநிலங்களில் நடைமுறைக்கு வந்திருக்கும் இந்த உடனடி மணியார்டர் சேவை தமிழகத்தில் 1,458 தபால் அலுவலகங்களில் வழங்கப்படுகிறது. கணினி மயமாக்கப்பட்ட அனைத்து தபால் அலுவலகங்களிலும் இச்சேவையைப் பெறலாம். இந்தச் சேவை குறித்த மேலதிக விவரங்களை www.indiapost.gov.in/IMOS.aspx> என்ற இணையதளத்தில் சென்று தெரிந்துகொள்ளலாம்.
நன்றி-புதிய தலைமுறை