சென்னைக்கு வயது 374

374 வயது ஆகிறது ‘சென்னை தினம்’ ஒரு மாதம் கொண்டாடப்படுகிறது :

பாரம்பரியமும் வரலாற்று சிறப்பும் மிக்க சென்னை நகருக்கு 374 வயது ஆகிறது. இதையொட்டி சென்னை தினம் (மெட்ராஸ் டே) இந்த ஆண்டு ஒரு மாத காலம் கோலாகலமாக கொண்டாடப்படுகிறது. மேலும், பாரம்பரிய நடைபயணம், கண்காட்சி, கருத்தரங்கம் உள்பட பல்வேறு சிறப்பு நிகழ்ச்சிகளுக்கு ஏற்பாடு செய்யப்பட்டு இருக்கிறது.

சென்னைக்கு வயது 374

தமிழ்நாட்டின் தலைநகராக திகழும் சென்னை நகரம் 22.8.1639 அன்று உதயமானது. பிரான்சிஸ் டே, ஆன்ட்ரு கோகன் ஆகியோர் இதன் நிறுவனர்களாக கருதப்படுகிறார்கள். தற்போது சென்னைக்கு 374 வயது ஆகிறது. சென்னை நகரும் உருவான வரலாற்றை நினைவு கூறும் வகையில் மெட்ராஸ் டே (சென்னை தினம்) கடந்த 10 ஆண்டு காலமாக கொண்டாடப்படுகிறது. வழக்கம்போல் இந்த ஆண்டும் கோலாகலமாக சென்னை தினம் கொண்டாடப்பட உள்ளது. இதையொட்டி பாரம்பரிய நடைபயணம், கண்காட்சி, கருத்தரங்கு, கலைநிகழ்ச்சிகள், வினாடி–வினா உள்பட பல்வேறு சிறப்பு நிகழ்ச்சிகளுக்கு ஏற்பாடு செய்யப்பட்டு இருக்கிறது. இதுதொடர்பாக சென்னை தின விழா ஒருங்கிணைப்பாளரான வரலாற்று ஆய்வாளர் எஸ்.முத்தையா நிருபர்களிடம் கூறியதாவது:–

10–வது ஆண்டு கொண்டாட்டம்

கடந்த 10 ஆண்டு காலமாக சென்னை தின விழா கொண்டாடி வருகிறோம். ஒரு அமைப்பு சார்பில் என்று இல்லாமல் சென்னைவாசிகள் தன்னெழுச்சியாக தாமாகவோ முன்வந்து இந்த விழாவை கொண்டாடி மகிழ்கிறார்கள். பல்வேறு வரலாற்றுச் சிறப்புகள் வாய்ந்த சென்னை நகரத்தில் வாழ்வதை எண்ணி சென்னைவாசிகள் ஒவ்வொருவரும் பெருமை கொள்ளும் வகையில் சென்னை தினம் கொண்டாடப்படுகிறது.

இந்த ஆண்டு சென்னை தின விழா 18–ந் தேதி தொடங்கி அடுத்த மாதம் 7–ந் தேதி வரை கோலாகலமாக கொண்டாடப்பட உள்ளது. சிறப்பு அம்சமாக இந்த ஆண்டு பள்ளி மாணவ–மாணவிகள் அதிகம் பங்கேற்கிறார்கள். வழக்கமாக கொண்டாட்டத்தில் தென்சென்னையின் பங்களிப்பு அதிகளவில் இருக்கும். ஆனால், இந்த முறை வடசென்னையின் பங்கு அதிகம்.

இணையதளத்தில் தினசரி நிகழ்ச்சிகள்

சென்னை நகரின் பெருமைகளையும், பாரம்பரியத்தையும் எடுத்துரைக்கும் நடை பயணம், புகைப்பட கண்காட்சி, கலை நிகழ்ச்சிகள், இசை நிகழ்ச்சிகள், கருத்தரங்கம், விவாதம், மாணவர்களுக்கு வினாடி–வினா, பேச்சுப்போட்டு, கட்டுரை போட்டி, கதை சொல்லுதல், ஓவியப் போட்டி என பல்வேறு சிறப்பு நிகழ்ச்சிகளுக்கு ஆங்காங்கே ஏற்பாடு செய்யப்பட்டு உள்ளது. சென்னை தின கொண்டாட்ட நிகழ்ச்சிகள் குறித்து அனைத்து தகவல்களையும் www.themadrasday.in என்ற இணையதளத்தில் தெரிந்துகொள்ளலாம். இவ்வாறு முத்தையா கூறினார்.

ஒருங்கிணைப்பாளர் வி.ஸ்ரீராம் கூறுகையில், ‘‘சென்னைக்கு தற்போது 374 வயது ஆகிறது. தொடக்கத்தில் அரை நாள், ஒருநாள், ஒரு வாரம் என்று கொண்டாடப்பட்டு வந்த சென்னை தின விழா ஒரு மாதத்திற்கு மேல் கொண்டாடும் வகையில் வளர்ந்துள்ளது. அடுத்த ஆண்டு சென்னையின் 375 ஆண்டுதினத்தை கொண்டாடுவோம்’’ என்றார்.

சென்னையின் அருமை

மற்றொரு ஒருங்கிணைப்பாளரான நடிகர் மோகன் ராமன் கூறும்போது, ‘‘தாய்–தந்தையின் அருமையை அறிந்தவர்கள் அவர்களை கொண்டுபோய் முதியோர் இல்லத்தில் விட மாட்டார்கள். அதேபோல், சென்னையின் அருமையை அறிந்தவர்கள் அதை பாதுகாக்க தவற மாட்டார்கள்’’ என்று குறிப்பிட்டார். இதர ஒருங்கிணைப்பாளர்கள் சசி நாயர், ரேவதி ஆகியோரும் சென்னை தினவிழா கொண்டாட்ட நிகழ்வுகளை எடுத்துரைத்தனர். 

பகிர்வுக்கு நன்றி

சிங்கார சென்னைக்கு வாழ்த்துக்கள்....

ஒருங்கிணைப்பாளர் "சசி நாயர்" இவர்களுக்கும் சென்னையின் 374 வயதுக்கும் என்ன சம்பந்தம்

பகிர்வுக்கும் லிங்க் க்கும் நன்றி வாசுகி

வாழ்துக்கள் சிங்காரி    சென்னைக்கு