தொடரும் மணல் கொள்ளை.. சாட்டையைத் தூக்கிய பசுமைத் தீர்ப்பாயம்..!

தொடரும் மணல் கொள்ளை.. சாட்டையைத் தூக்கிய பசுமைத் தீர்ப்பாயம்!



மணல் கொள்ளை என்பது... இந்தியா முழுக்கவே அரசியல்வாதிகளின் முழு ஆசிகளோடு நடந்தேறிக் கொண்டுதான் இருக்கிறது. தமிழகத்தைப் பொறுத்தவரை அரசாங்கமே முன்நின்று இந்தக் கொள்ளைக்கு சட்டப்பூர்வமாக துணை போய்க் கொண்டிருக்கிறது. ஒரு லோடு மணலுக்கு ரசீது போட்டுவிட்டு, நான்கு லோலு மணலை அனுப்பி வைத்து கமிஷன் பார்த்துக் கொண்டுள்ளனர் அதிகாரிகளும்... அரசியல்வாதிகளும் பல மணல் குவாரிகளிலும்!

இதன் காரணமாக நாடு முழுக்கவே பல பாகங்களிலும் ஆற்றோரத்தின் நிலத்தடி நீராதாரம் படுபாதாளத்துக்குச் சென்றுவிட்டது. பல இடங்களில் பாலங்களே கூட கீழே இடிந்து விழும் அளவுக்கு மணலைத் தோண்டி கொள்ளையடித்துக் கொண்டுள்ளனர். இதற்கு எதிராக சுற்றுச்சூழல் ஆர்வலர்கள் எத்தனையோ போராட்டங்களை நடத்தியும், எந்த அரசும்... அரசியல்வாதியும் கண்டுகொள்ளவே இல்லை. எப்போதாவது நீதிமன்றங்களில் இதுகுறித்து வழக்குப் போடும்போது, அங்கிருந்து கடுமையான தீர்ப்பு வந்தால் மட்டும், கொஞ்சம் 'நாடகம்' போட்டுவிட்டு, பழையபடி கொள்ளைக்கு துணைபோவதுதான் அதிகாரிகளின் வேலையாக இருக்கிறது.

இந்நிலையில், சுற்றுச்சூழல் நலன் கருதி உருவாக்கப்பட்டிருக்கும் 'தேசிய பசுமை தீர்ப்பாயம்' இந்த மணல் கொள்ளைக்கு எதிராக சாட்டையைத் தூக்கியுள்ளது. இதுதொடர்பாக அனைத்து மாநில தலைமைச் செயலர்களுக்கும் இன்று இந்த தீர்ப்பாயம் அனுப்பியுள்ள நோட்டீஸில் ... 'பசுமை தீர்ப்பாயத்தின் அனுமதியின்றி எந்த ஆற்றிலும் மணல் அள்ளக்கூடாது. சட்டவிரோதமாக மணல் அள்ளுவது தேசிய முக்கியத்துவம் வாய்ந்த பிரச்சினை. இந்த விவகாரம் குறித்து வரும் 14-ம் தேதிக்குள் பதில் தரவேண்டும்' என்றும் உத்தரவிடப்பட்டுள்ளது.

சாட்டையைத் தூக்கியிருக்கும் தீர்ப்பாயத்தைப் பாராட்டலாம் என்றுதான் தோன்றுகிறது. ஆனால், கடைசி வரை தன்னுடைய முடிவில் இந்த ஆணையம் உறுதியாக இருக்கும் என்று யார் உறுதிமொழி கொடுப்பது?!

-ஜூனியர் கோவணாண்டி

 இந்தியதாயின் கடைசி மூச்சு நிற்பதற்குள் இதுபோல யாரேனும் ஒரு மாவீரன் எழுச்சி பெற்று வந்து காப்பாற்றினால் தான் உண்டு. இல்லன்னா துண்டு போட்டு விற்றுவிடுவார்கள்